ព័ត៌មានទូទៅ

មានការលួចចាក់ដីចូលទន្លេជាង៧០ម៉ែត្រ ដោយអាជ្ញាធរពុំបានដឹង

Published

2 years ago

18/04/2025

Netra Media

កំពង់ឆ្នាំង៖ មានការលួចចាក់ដីចូលទន្លេជាង៧០ម៉ែត្រ ដោយអាជ្ញាធរពុំបានដឹង

1,108 Views

កំពង់ឆ្នាំង៖ ដីគ្រួសក្រហមរាប់រយឡាន ត្រូវបានឈ្មួញម្នាក់ដឹកចាក់ចូលទៅក្នុងទន្លេដើម្បីការពារម៉ាស៊ីនបូមទឹកស្អាតកុំអោយមានកំប្លោកហូរចូល។

ពាក់ព័ន្ធនឹងការចាក់ដីលយជ្រៅចូលទៅក្នុងទន្លេសាប ប្រវែងប្រមាណ៧០ម៉ែត្រនេះ លោក អឿ សារឿន ប្រធានមន្ទីរធនធានទឹកស្តីទី បានបញ្ជាក់ថា៖ ខាងក្រុមហ៊ុនទឹកស្អាត បានដាក់ពាក្យស្នើសុំកាយជាអាងក្នុងទន្លេប្រវែង២០ម៉ែត្របួនជ្រុង ប៉ុន្តែមន្ទីរមិនព្រមទេ។ លោកបន្តថា៖ កាលពីមុនរដូវចូលឆ្នាំថ្មីប្រពៃណីខ្មែរ ក្រុមហ៊ុនលក់ទឹកស្អាតក្នុងខេត្តកំពង់ឆ្នាំង បានសុំគាត់ជីកដីបាតទន្លេធ្វើជាស្រះទឹកទំហំ២០ម៉ែត្រ គុណ២០ម៉ែត្រ ដើម្បីការពារម៉ាស៊ីនបូមទឹក តែលោក អឿ សារឿន មិនយល់ព្រម ហើយគាត់បានឱ្យក្រុមការងារចំរុះ ចុះពិនិត្យមើលថែមទៀតផង។ ពេលនេះមន្ទីរបានរាយការណ៍ជូនក្រសួងធនធានទឹករួចហើយ និងរង់ចាំខាងក្រសួង រួមនឹងអាជ្ញាធរខេត្តមានចំណាត់ការតែប៉ុណ្ណោះ។ ឯកឧត្តម ស៊ុនសុវណ្ណារិទ្ធិ អភិបាលខេត្តកំពង់ឆ្នាំង បានឱ្យដឹងថា៖ ក្រុមហ៊ុនទឹកស្អាត បានសុំជីកស្រះយកទឹកស្អាតចែកជូនប្រជាពលរដ្ឋ ក៏ប៉ុន្តែឯកឧត្តមបានអោយក្រុមហ៊ុនទឹកស្អាតនោះ ស្នើសុំទៅខាងមន្ទីរក្រសួងធនធានទឹក និងស្ថាប័នពាក់ព័ន្ធ ដើម្បីពិនិត្យលើបច្ចេកទេស។ ឯកឧត្តមក៏មិនបានដឹង ក្រុមហ៊ុនចាក់ដីចូលទន្លេនោះឡើយ ព្រោះរវល់រៀបចំពិធីចូលឆ្នាំថ្មី។

ទីតាំងដែលក្រុមហ៊ុនបានដឹកដីចាក់ចូលទន្លេសាបនេះ គឺនៅចំណុចផែថ្មី ស្ថិតក្នុងភូមិទី១ សង្កាត់ខ្សាម ជាប់នឹងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង។

គួរកត់សំគាល់ថា៖ ទន្លេសាបចំនុចផ្សារក្រោមនេះ បាននិងកំពុងរីងរាក់ទៅៗ ដែលបញ្ហានេះមានផលប៉ះពាល់ដល់ចរាចរត្រី ចរន្តទឹក និងបញ្ហាផ្សេងៗទៀតផងដែរ៕

ប្រភព ៖ BTV