​ប្រ​ទេស​ហ្វី​លី​ពីន​បាន​ជម្លៀស​ប្រ​ជា​ជន​ជាង​ ​១០០.០០០​ ​នាក់​នៅ​ទូ​ទាំង​តំ​បន់​ភាគ​ខាង​កើត​ ​និង​ភាគ​ខាង​ជើង​របស់​ខ្លួន​ ​ខណៈ​ព្យុះ​ ​Fung​-​wong​ ​បាន​បង្កើន​កម្លាំង​ទៅ​ជា​ព្យុះ​ទី​ហ្វុង​ដ៏​មាន​ឥទ្ធិពល​ ​នៅ​ថ្ងៃ​អាទិត្យ​ ​៩​ ​វិច្ឆិកា​នេះ​ ​មុន​ពេល​ការ​ព្យា​ករណ៍​បង្ហាញ​ថា​ ​អាច​នឹង​មាន​ភ្លៀង​ធ្លាក់​ខ្លាំង​ ​ខ្យល់​បក់​ខ្លាំង​ ​និង​រលក​យក្ស​។​

​ព្យុះ​ ​Fung​-​wong​ ​បោក​បក់​លើ​ហ្វី​លី​ពីន​ ​ប៉ុន្មាន​ថ្ងៃ​កន្លង​មក​ ​បន្ទាប់​ពី​ប្រទេស​នេះ​ត្រូវ​បាន​រង​ការ​វាយ​ប្រ​ហារ​ពី​ព្យុះ​ទី​ហ្វុង​ ​Kalmaegi​ ​ដែល​បាន​ផ្ដាច់​ជី​វិត​មនុស្ស​២០៤​នាក់​ ​និង​ការ​បំផ្លិច​បំផ្លាញ​ដ៏​ធ្ងន់​ធ្ងរ​មុន​ពេល​បោក​បក់​ទៅ​វៀត​ណាម​សម្លាប់​មនុស្ស​៥​នាក់​។

​តាម​សញ្ញា​ព្រ​មាន​អំ​ពី​ព្យុះ​ដែល​ត្រូវ​បាន​ដំឡើង​នៅ​ទូ​ទាំង​តំ​បន់​ធំ​ៗ​របស់​ប្រ​ទេស​ហ្វី​លី​ពីន​ ​រលក​សញ្ញា​ទី៥​ដែល​ជា​ការ​ព្រ​មាន​កម្រិត​ខ្ពស់​បំ​ផុត​ ​បាន​ប្រ​កាស​អាសន្ន​​នៅ​ភាគ​អាគ្នេយ៍​នៃ​កោះ​ ​Luzon​ ​រួម​ទាំង​កោះ​ ​Catanduanes​ ​និង​តំបន់​ឆ្នេរ​សមុទ្រ​ ​Camarines​ ​​Norte​ ​និង​ ​Camarines​ ​Sur​ ​ខណៈ​ទី​ក្រុង​រណប​ម៉ា​នីល​ ​និង​តំបន់​ជុំវិញ​ស្ថិត​នៅ​ក្រោម​សញ្ញា​ទី​ ​៣​។​

​ព្យុះ​ទី​ហ្វុង​ ​Fung​-​wong​ ​ដែល​មាន​ល្បឿន​ខ្យល់​​បក់​ខ្លាំង​រហូត​ដល់​ ​១៨៥​ ​គី​ឡូ​ម៉ែត្រ​ក្នុង​មួយ​ម៉ោង​ ​ត្រូវ​បាន​គេ​ព្យា​ករណ៍​ថា​ ​នឹង​បោក​បក់​ចូល​ខេត្ត​ ​Aurora​ ​ក្នុង​ភាគ​កណ្តាល​កោះ​ ​Luzon​ ​នៅ​យប់​ថ្ងៃ​អាទិត្យ​នេះ​។

​ផ្នែក​នា​នា​នៃ​តំ​បន់​ ​Eastern​ ​Visayas​ ​បាន​ជួប​ប្រ​ទះ​ការ​ដាច់​ចរន្ត​អគ្គិសនី​។​ ​ចំ​ណែក​ជើង​ហោះ​ហើរ​ក្នុង​ស្រុក​ ​និង​អន្តរ​ជាតិ​ជាង​ ​៣០០​ ​ត្រូវ​បាន​លុប​ចោល​៕​