​មន្ត្រី​គ្រប់​គ្រង​គ្រោះ​មហន្តរាយ​ ​នៅ​ថ្ងៃ​ទី​២​ ​ខែ​វិច្ឆិកា​នេះ​ ​បាន​ឲ្យ​ដឹង​ថា​ ​ភ្លៀង​ធ្លាក់​យ៉ាង​ដ៏​ខ្លាំង​ ​និង​ការ​ជន់​លិច​នៅ​ភាគ​កណ្តាល​នៃ​ប្រ​ទេស​វៀតណាម​ ​ក្នុង​សប្តាហ៍​នេះ​ ​បាន​បណ្ដាល​ឲ្យ​មនុស្ស​យ៉ាង​ហោច​ណាស់​ ​៣៥​នាក់​បាត់​បង់​ជីវិត​ ​ខណៈ​យ៉ាង​តិច​៥​នាក់​ទៀត​កំពុង​បាត់​ខ្លួន​នៅ​ក្នុង​ទឹក​ជំនន់​។​
​ភ្លៀង​ខ្លាំង​ចាប់​តាំង​ពី​ចុង​សប្តាហ៍​មុន​បង្ក​ឲ្យ​មាន​កម្រិត​ទឹក​កម្ពស់​រហូត​ដល់​ ​១​,​៧​ម៉ែត្រ​ ​ក្នុង​រយៈ​ពេល​ត្រឹម​២៤​ម៉ោង​។

​អាជ្ញា​ធរ​គ្រប់​គ្រង​គ្រោះ​មហន្តរាយ​វៀតណាម​ ​បាន​រាយ​ការណ៍​ថា​ ​អ្នក​ស្លាប់​ចំនួន​ ​៣៥​នាក់​ ​មាន​នៅ​ក្នុង​ខេត្ត​ ​Hue​, ​Da​ ​Nang​,​ ​Lam​ ​Dong​ ​និង​ ​Quang​ ​Tri​។​
​ទី​ក្រុង​បុរាណ​ ​Hoi​ ​An​ ​ដែល​ជាតំ​បន់​បេ​តិក​ភណ្ឌ​ពិ​ភព​លោក​របស់​អង្គ​ការ​យូ​ណេ​ស្កូ​ ​(​UNESCO​)​ ​ត្រូវ​បាន​ជន់​លិច​ជម្រៅ​ត្រឹម​ចង្កេះ​ ​ដោយ​មាន​អ្នក​ស្រុក​ធ្វើ​ដំណើរ​ក្នុង​ទី​ក្រុង​តាម​ទូក​ឈើ​ ​បន្ទាប់​ពី​ទឹក​ទន្លេ​បាន​ឡើង​ហៀ​រពោរ​ពាស​ក្នុង​កម្រិត​ខ្ពស់​ជា​លើក​ដំ​បូង​ ​ក្នុង​រយៈ​ពេល​ ​៦០​ឆ្នាំ​មក​នេះ​។​
​ពេល​នេះ​មាន​ផ្ទះ​សម្បែង​ជាង​ ​១៦.៥០០​ខ្នង​ ​ត្រូវ​បាន​ជន់​លិច​ ​ខណៈ​ដែល​សត្វ​ចិញ្ចឹម​ជាង​ ​៤០.០០០​ក្បាល​ ​ត្រូវ​បាន​ទឹក​ជំ​នន់​ហូរ​នាំ​ទៅ​ ​ហើយ​ផ្ទៃ​ដី​ដំ​ណាំ​ជាង​ ​៥.៣០០​ហិកតា​ ​បាន​លិច​ក្នុង​ទឹក​។​
​ក្រ​សួង​ប​រិស្ថាន​របស់​វៀតណាម​ ​បញ្ជាក់​ថា​ ​ផ្ទះ​សម្បែង​សរុប​ជាង​ ​១០០.០០០​ខ្នង​ ​ត្រូវ​បាន​ជន់​លិច​ ​ហើយ​មាន​ការ​រាយ​ការណ៍​ពី​បំ​ណាក់​ដី​ ​មាន​ច្រើន​ជាង​ ​១៥០​កន្លែង​៕​