នៅក្នុងវីដេអូមួយនៅលើបណ្តាញសង្គម Instagram លោក Ronaldo បាននិយាយថា៖ «ចំពោះប្រជាជនព័រទុយហ្គាល់ ថ្ងៃនេះបានមកដល់ហើយ ដែលខ្ញុំត្រូវប្រគល់អាវលេខ ៧ នៃក្រុមជម្រើសជាតិរបស់យើងត្រឡប់ទៅវិញ»។

«ខ្ញុំមិនដែលគិតថាអាវនេះជារបស់ខ្ញុំតែម្នាក់ឯងនោះទេ ប៉ុន្តែអស់រយៈពេល ២៣ ឆ្នាំមកនេះ ខ្ញុំមានកិត្តិយស និងទំនួលខុសត្រូវក្នុងការស្លៀកពាក់វា ការពារកិត្តិយសរបស់វា និងនាំយកវាទៅកាន់កីឡដ្ឋាននានាជុំវិញពិភពលោក»។

«ថ្ងៃនេះ ដល់ពេលដែលត្រូវប្រគល់វាបន្តទៅកាន់អនាគតហើយ។ វាមិនមែនជាការសម្រេចចិត្តដ៏ងាយស្រួលនោះទេ ព្រោះការសម្រេចចិត្តខ្លះមិនមែនធ្វើឡើងដោយការគិតតែមួយមុខប៉ុណ្ណោះទេ ប៉ុន្តែវាក៏កើតចេញពីបេះដូងផងដែរ»។

«ដំណើរមួយដែលបានចាប់ផ្តើមនៅខែសីហា ឆ្នាំ ២០០៣ និងបានផ្លាស់ប្តូរជីវិតរបស់ខ្ញុំជារៀងរហូតនោះ គឺបានឈានដល់ទីបញ្ចប់ហើយ»។

Ronaldo បានចូលរួមប្រកួតក្នុងពានរង្វាន់ជើងឯកអឺរ៉ុប (European Championships) ចំនួន ៦ លើក។ ក្រុមព័រទុយហ្គាល់បានឈ្នះជើងឯករងក្នុងឆ្នាំ ២០០៤ និងឈ្នះជើងឯកក្នុងឆ្នាំ ២០១៦ ប៉ុន្តែក្នុងអាជីពរបស់គាត់ ក្រុមនេះមិនអាចឆ្លងផុតវគ្គពាក់កណ្តាលផ្តាច់ព្រ័ត្រនៃពានរង្វាន់ World Cup បានឡើយ។

ក្នុងនាមជាប្រធានក្រុមជម្រើសជាតិព័រទុយហ្គាល់តាំងពីឆ្នាំ ២០០៨ មក គាត់បានជួយក្រុមឱ្យឈ្នះពានរង្វាន់ Nations League លើកដំបូងបង្អស់ក្នុងឆ្នាំ ២០១៩។

សូមបញ្ជាក់ថា កីឡាករខ្សែប្រយុទ្ធវ័យ ៤១ ឆ្នាំរូបនេះ បានស៊ុតបញ្ចូលទី ១៤៦ គ្រាប់ និងបង្ហាញខ្លួនឱ្យក្រុមជម្រើសជាតិបាន ២៣៤ ប្រកួត ដែលសុទ្ធសឹងជាកំណត់ត្រាពិភពលោក ចាប់តាំងពីការបង្ហាញខ្លួនលើកដំបូងរបស់គាត់ក្នុងឆ្នាំ ២០០៣។

គាត់បានចាកចេញពីជំរុំហ្វឹកហាត់របស់ក្រុមជម្រើសជាតិព័រទុយហ្គាល់កាលពីខែកញ្ញា បន្ទាប់ពីត្រូវបានគេប្រាប់ថាគាត់នឹងមិនមានឈ្មោះក្នុងជម្រើសដំបូងសម្រាប់ការប្រកួតពានរង្វាន់ Nations League ទល់នឹងក្រុមដាណឺម៉ាកឡើយ។ ហេតុការណ៍នេះបានធ្វើឱ្យគាត់ទទួលរងការពិន័យជាប្រាក់ចំនួន ២១៥ ផោន និងត្រូវបានហាមឃាត់មិនឱ្យចូលរួមការប្រកួតរយៈពេល ៣០ ថ្ងៃ៕

បន្ទាប់មានការតវ៉ាពីសាធារណជនយ៉ាងចម្រូងចម្រាសទៅលើច្បាប់មួយ អនុញ្ញាតឱ្យបុគ្គលដែលមានអាយុក្រោម ១៨ឆ្នាំ អាចចុះឈ្មោះជាអ្នកបរិច្ចាគសរីរាង្គ ជាលិកា និងរាងកាយ បន្ទាប់ពីពួកគេទទួលមរណភាព។

រដ្ឋាភិបាលវៀតណាមបានសម្រេចដកចេញនូវសំណើច្បាប់មួយ ដែលពីមុនគ្រោងនឹងអនុញ្ញាតឱ្យបុគ្គលដែលមានអាយុក្រោម ១៨ ឆ្នាំ អាចចុះឈ្មោះជាអ្នកបរិច្ចាគសរីរាង្គ ជាលិកា និងរាងកាយ បន្ទាប់ពីពួកគេទទួលមរណភាព។ ការកែសម្រួលនេះ ត្រូវបានដាក់បញ្ចូលទៅក្នុងសេចក្តីព្រាងច្បាប់ចុងក្រោយ ស្តីពីការបរិច្ចាគ ការដកយក និងការប្តូរសរីរាង្គ និងជាលិកាមនុស្ស ព្រមទាំងការបរិច្ចាគ និងការប្រមូលយកសាកសពមនុស្ស ដែលត្រូវបានលើកយកមកពិភាក្សាដោយរដ្ឋសភាកាលពីថ្ងៃចន្ទ។

នៅក្នុងសេចក្តីព្រាងច្បាប់មុននេះ ដែលបានដាក់ជូនរដ្ឋសភាវៀតណាមកាលពីថ្ងៃទី២១ ខែតុលា រដ្ឋាភិបាលបានស្នើពង្រីកសិទ្ធិដល់អនីតិជនឱ្យអាចចុះឈ្មោះបរិច្ចាគសរីរាង្គក្រោយពេលស្លាប់ (ករណីស្លាប់ផ្នែកខួរក្បាល ឬឈប់បេះដូង) ក៏ដូចជាការអនុញ្ញាតឱ្យអនីតិជនអាចបរិច្ចាគជាលិកាដែលអាចបង្កើតឡើងវិញបាន ខណៈពេលដែលពួកគេនៅរស់ (អាយុពី ១៥ ដល់ក្រោម ១៨ ឆ្នាំ អាចបរិច្ចាគជូនសមាជិកគ្រួសារ និងអាយុក្រោម ១៥ ឆ្នាំ អាចបរិច្ចាគជូនឪពុកម្តាយ ឬបងប្អូនបង្កើត)។

ទោះបីជាមានការដាក់បញ្ចូលនូវវិធានការការពារយ៉ាងតឹងរ៉ឹងក៏ដោយ ក៏ចំណុចដែលអនុញ្ញាតឱ្យអនីតិជនចុះឈ្មោះបរិច្ចាគសរីរាង្គក្រោយពេលស្លាប់នេះ បានបង្កឱ្យមានភាពចម្រូងចម្រាស និងមតិយោបល់ខុសៗគ្នាជាច្រើនពីមហាជន។

ដោយផ្អែកលើការព្រួយបារម្ភទាំងនេះ រដ្ឋាភិបាលបានធ្វើការកែសម្រួលដោយកំណត់ថា មានតែបុគ្គលដែលមានអាយុចាប់ពី ១៨ ឆ្នាំឡើងទៅប៉ុណ្ណោះ ទើបមានសិទ្ធិបង្ហាញឆន្ទៈ និងចុះឈ្មោះដើម្បីបរិច្ចាគជាលិកា សរីរាង្គ ឬរាងកាយរបស់ខ្លួនបាន។

តាមរយៈការកែសម្រួលថ្មីនេះ លក្ខខណ្ឌនានាពាក់ព័ន្ធនឹងការចុះឈ្មោះ ការផ្លាស់ប្តូរ និងការលុបចោលការចុះឈ្មោះរបស់អនីតិជន ត្រូវបានដកចេញទាំងស្រុង ដែលជួយកាត់បន្ថយ និងលុបបំបាត់ជម្លោះដែលអាចកើតមានរវាងអនីតិជន និងតំណាងស្របច្បាប់របស់ពួកគេជុំវិញបញ្ហានេះ៕

តម្លៃប្រេងបានកើនឡើងនៅក្នុងការជួញដូរនៅអាស៊ីថ្ងៃអង្គារនេះ បន្ទាប់ពីអាមេរិកបានវាយប្រហារលើកោះ Qeshm របស់ប្រទេសអ៊ីរ៉ង់ ដែលបង្កឱ្យមានក្តីបារម្ភអំពីការកើនឡើងនៃជម្លោះដែលមានរយៈពេល ៨ ខែមកហើយនេះ និងការរំខានដល់ការផ្គត់ផ្គង់ប្រេងពីមជ្ឈិមបូព៌ាដែលអាចនឹងអូសបន្លាយពេលយូរ។

សូមជម្រាបថា តម្លៃប្រេងឆៅប្រភេទ Brent សម្រាប់ការដឹកជញ្ជូននាពេលអនាគតបានកើនឡើង ៤៨ សេន ឬ ០,៥% ដល់ ១០៥,២៥ ដុល្លារក្នុងមួយបារ៉ែល ខណៈដែលតម្លៃប្រេងឆៅប្រភេទ West Texas Intermediate (WTI) របស់សហរដ្ឋអាមេរិក បានកើនឡើង ៤៧ សេន ឬ ០,៥% ដល់ ៩៦,៩៣ ដុល្លារក្នុងមួយបារ៉ែល។ ប្រភព៖ Reuters