ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍កាលពីថ្ងៃទី៣០ខែកក្កដានេះថា រដ្ឋមន្ត្រីការបរទេសអ៊ីរ៉ង់ លោក Abbas Araqchi បានជំរុញឱ្យប្រទេសប៊ុលហ្គារីពិចារណាឡើងវិញនូវការសម្រេចចិត្តរបស់ខ្លួនក្នុងការអនុញ្ញាតឱ្យមានការដាក់ពង្រាយយន្តហោះយោធាអាមេរិកជាបណ្តោះអាសន្ននៅមូលដ្ឋានទ័ពអាកាស Bezmer ។
ក្នុងអំឡុងការសន្ទនាតាមទូរស័ព្ទជាមួយសមភាគីប៊ុលហ្គារីរបស់លោកគឺលោកស្រី Velislava Petrova-Chamova លោក Araqchi បាននិយាយថា ការយល់ព្រមរបស់ទីក្រុងសូហ្វីយ៉ា (Sofia) ចំពោះសំណើរបស់អាមេរិកក្នុងការឈរជើងយន្តហោះយោធានៅមូលដ្ឋាននេះដើម្បីគាំទ្រប្រតិបត្តិការយោធាគឺស្មើនឹងការសម្របសម្រួលការឈ្លានពានប្រឆាំងនឹងអ៊ីរ៉ង់ ដោយបន្ថែមថាសកម្មភាពនេះគឺមិនអាចទទួលយកបាន និងផ្ទុយពីទំនាក់ទំនងមិត្តភាពប្រពៃណីរវាងប្រទេសទាំងពីរ។
អ៊ីរ៉ង់បានព្រមានម្តងហើយម្តងទៀតចំពោះប្រទេសដែលអនុញ្ញាតឱ្យទឹកដីរបស់ពួកគេត្រូវបានប្រើប្រាស់សម្រាប់ប្រតិបត្តិការយោធារបស់សហរដ្ឋអាមេរិកប្រឆាំងនឹងខ្លួនថា ពួកគេអាចប្រឈមនឹងផលវិបាក។

លោក Araqchi បានមានការសន្ទនាតាមទូរស័ព្ទដាច់ដោយឡែកមួយជាមួយរដ្ឋមន្ត្រីការបរទេសស៊ីប លោក Constantinos Kombos ក្នុងអំឡុងពេលនោះលោកបានសង្កត់ធ្ងន់លើសារៈសំខាន់នៃការទប់ស្កាត់មូលដ្ឋានទ័ពបរទេសនៅប្រទេសកោះស៊ីប ពីការប្រើប្រាស់ប្រឆាំងនឹងអ៊ីរ៉ង់។
កាលពីសប្តាហ៍មុន សភាប៊ុលហ្គារីបានអនុម័តការដាក់ពង្រាយជាបណ្តោះអាសន្ននូវយន្តហោះដឹកប្រេង KC-135 របស់សហរដ្ឋអាមេរិករហូតដល់ ៨ គ្រឿង និងបុគ្គលិករហូតដល់ ២៥០ នាក់នៅមូលដ្ឋានទ័ពអាកាស Bezmer ទោះបីជាមានការជំទាស់ពីអ៊ីរ៉ង់ក៏ដោយ។ ទីក្រុង Sofia បាននិយាយថា គ្មានអាវុធវាយប្រហារណាមួយនឹងត្រូវបានដាក់ពង្រាយទេ ហើយថាសកម្មភាពនេះពុំបានធ្វើឱ្យប៊ុលហ្គារីក្លាយជាភាគីមួយនៃប្រតិបត្តិការយោធានោះទេ។
កោះស៊ីប បានធ្វើជាម្ចាស់ផ្ទះនៃមូលដ្ឋានយោធាចំនួន២របស់អង់គ្លេស រួមទាំង មូលដ្ឋាន RAF Akrotiri ដែលត្រូវបានវាយប្រហារដោយយានដ្រូនអ៊ីរ៉ង់កាលពីដើមខែមីនា ប៉ុន្មានថ្ងៃបន្ទាប់ពីអ៊ីស្រាអែលនិងអាមេរិករួមដៃគ្នាវាយប្រហារលើអ៊ីរ៉ង់កាលពីថ្ងៃទី២៨ខែកុម្ភៈ២០២៦៕

ប្រទេសអេស្ប៉ាញ កាលពីថ្ងៃទី៣០ ខែកក្កដានេះបាននិយាយថា ខ្លួននឹងបញ្ជូនទាហានទៅកាន់ទីក្រុង Ceuta ដើម្បីធានាសន្តិសុខបន្ទាប់ពីជនអន្តោប្រវេសន៍រាប់រយនាក់បានសម្រុកចូលដែនដីអេស្ប៉ាញនៅអាហ្វ្រិកខាងជើងពីប្រទេសម៉ារ៉ុក ។

ការធ្វើអន្តោប្រវេសន៍ពីប្រទេសម៉ារ៉ុក ចូលទៅក្នុងដែនដីអាហ្វ្រិកខាងជើងចំនួនពីររបស់ប្រទេសអេស្ប៉ាញ មានទីក្រុង Ceuta និង Melilla គឺជាបញ្ហាដ៏រសើបខាងនយោបាយរវាងប្រទេសទាំងពីរជាយូរមកហើយ ខណៈមនុស្សរាប់ពាន់នាក់បានឆ្លងកាត់ព្រំដែន។ ប្រទេសអ៊ីតាលីកាលពីថ្ងៃព្រហស្បតិ៍ បានអំពាវនាវឱ្យប្រទេសអេស្ប៉ាញត្រូវបានផ្អាកពីតំបន់ស៊ែងិន(Schengen) ដែលព្រំដែនបើកចំហ។
អ្នកសារព័ត៌មាន AFP បានឃើញមនុស្សពេញវ័យ និងកុមារជាច្រើននាក់ ភាគច្រើនខ្លួនទទឹកសើម ចូលទៅក្នុងទីក្រុងបន្ទាប់ពីហែលទឹកនៅតំបន់នោះ។ ពោងបណ្តែតទឹកនិងសម្លៀកបំពាក់ដែលបោះចោលត្រូវបានទុកចោលនៅលើមាត់ឆ្នេរ។ ក្រសួងមហាផ្ទៃប្រទេសអេស្ប៉ាញបាននិយាយថា «កងកម្លាំងប្រដាប់អាវុធនឹងពង្រឹងឆ្មាំស៊ីវិលឲ្យអនុវត្តអំណាចរបស់ខ្លួន និងអំណាចផ្សេងទៀតដែលចាំបាច់ដើម្បីរក្សាសន្តិសុខនៅក្នុងទីក្រុង Ceuta»។
ក្រសួងពុំបានបញ្ជាក់ថាតើទាហានប៉ុន្មាននាក់នឹងត្រូវបានបញ្ជូនទៅកាន់ដែនដីតូចដែលមានទំហំ១៨,៥ គីឡូម៉ែត្រក្រឡានោះទេ ប៉ុន្តែបាននិយាយថាកម្លាំងរបស់កងឆ្មាំស៊ីវិលនៅទីនោះនឹងកើនឡើងជិតទ្វេដងពីកម្រិតបច្ចុប្បន្ន៨០នាក់ ហើយក៏នឹងបញ្ជូនក្រុមមុជក្នុងជម្រៅទឹក និងនាវាឆ្មាំល្បាតឆ្នេរផងដែរ។
គណៈប្រតិភូរដ្ឋាភិបាលអេស្ប៉ាញនៅក្នុងតំបន់នោះបានប្រាប់សារព័ត៌មាន AFP ថា សាកសពរបស់ជនអន្តោប្រវេសន៍៩នាក់ដែលបានស្លាប់ខណៈព្យាយាមទៅដល់ទីក្រុង Ceuta ដោយហែលទឹក ត្រូវបានរកឃើញ៕

ចំនួនអ្នកស្លាប់ដោយបំណាក់ដីនៅភាគនិរតីប្រទេសចិនកាលពីដើមខែនេះបានកើនឡើងដល់ ៥១នាក់ ដោយមនុស្ស១០នាក់នៅតែបាត់ខ្លួន។ អាជ្ញាធរបាននិយាយកាលពីថ្ងៃទី៣០ ខែកក្កដានេះ។
បំណាក់ដីដែលបានកើតឡើងកាលពីថ្ងៃទី១៧ ខែកក្កដា នៅក្នុងស្រុក Pengshui ក្រុង Chongqing បានបំផ្លាញអគារលំនៅឋានជាច្រើនខ្នងនៅជើងភ្នំ និងតាមបណ្តោយច្រាំងទន្លេ។
វីដេអូប្រព័ន្ធផ្សព្វផ្សាយរដ្ឋបានបង្ហាញពីគំនរថ្មនិងដីដែលបានបាក់ទៅលើផ្លូវតំបន់លំនៅឋាន និងអាជីវកម្ម ដោយក្រុមអ្នកជួយសង្គ្រោះត្រូវបានដាក់ពង្រាយទៅកាន់កន្លែងកើតហេតុ។
មន្ត្រីស្រុក Pengshui បាននិយាយនៅលើបណ្តាញផ្សព្វផ្សាយសង្គមកាលពីល្ងាចថ្ងៃព្រហស្បតិ៍ថា «បច្ចុប្បន្នមនុស្ស ៥១នាក់ត្រូវបានរកឃើញ និងត្រូវបានបញ្ជាក់ថាស្លាប់ ហើយមនុស្ស ១០នាក់នៅតែបាត់ខ្លួន»។

មន្ត្រីនិយាយថា «នៅក្នុងគ្រោះមហន្តរាយនេះ មនុស្សសរុបជាង១.១០០នាក់ត្រូវបានជម្លៀសចេញដោយសុវត្ថិភាព» ហើយមនុស្ស១០នាក់ត្រូវបានជួយសង្គ្រោះ រួមទាំងបីនាក់ត្រូវបានបញ្ជូនទៅមន្ទីរពេទ្យ។ ប្រតិបត្តិការស្វែងរកនិងជួយសង្គ្រោះ បានដំណើរការចាប់តាំងពីគ្រោះមហន្តរាយកើតឡើង ដោយមានការចូលរួមពីក្រុមអ្នកជួយសង្គ្រោះជាង ១.០៨០នាក់។
ក្រុមអ្នកជួយសង្គ្រោះបានប្រឈមនឹងបញ្ហាលំបាកច្រើនក្នុងអំឡុងពេលប្រតិបត្តិការរយៈពេល៣២៥ ម៉ោង។ ក្រុមអ្នកមុជក្នុងជម្រៅទឹក និងយានរ៉ូបូត បានរុករកតាមដងទន្លេដែលនៅក្បែរនោះ៕