ព្រៃវែង៖ កណ្តាលអាធ្រាត ថ្ងៃទី៣ ខែមេសា ឆ្នាំ២០២៦ ក្រុមការងារត្រួតពិនិត្យចល័តរបស់ក្រសួង ដឹកនាំដោយរដ្ឋមន្ត្រីក្រសួងសាធារណការ និងដឹកជញ្ជូន បានចុះត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ នៅទីតាំងចំណុចផ្លូវលេខ៣៨៤ ក្នុងសង្កាត់តាកោ ក្រុងព្រៃវែង ខេត្តព្រៃវែង។
បើតាមការផ្សព្វផ្សាយរបស់ផេកផ្លូវការក្រសួង បង្ហាញថា ក្រុមការងារឃាត់បានរថយន្តចំនួន២គ្រឿង ខ​ណៈរថយន្តទាំង២ ផ្ទុកទម្ងន់សរុបចន្លោះពី ៤២ តោន ដល់ ៨៨ តោន គឺលើសទម្ងន់អនុញ្ញាតចន្លោះពី ១៧ តោន ដល់ ៤៣ តោន។
បើគិតជាភាគរយគឺលើសចន្លោះពី ៦៨% ដល់ ៩៥% នៃច្បាប់ស្តីពីផ្លូវថ្នល់ មាត្រា៦០។

ទោះជាមានការចុះឆ្មក់មើលពីថ្នាក់ដឹកនាំកំពូលក្រសួង វេលាម៉ោង ១២កន្លះយប់ទៅហើយក្តី តែអ្វីដែលជាការកត់សំគាល់ និងបើតាមប្រភពពីពលរដ្ឋនៅតាមដងផ្លូវបានឱ្យដឹងថា បច្ចុប្បន្នរថយន្តដឹកទំនិញប្រភេទធំៗ កំពុងចរាចរណ៍យ៉ាងច្រើននៅលើដងផ្លូវទាំងភូមិសាស្រ្តខេត្តព្រៃវែង និងស្វាយរៀង ហើយការផ្ទុកទំនិញគឺលើសពីតួយានយន្តច្រើនណាស់ ទាំងកម្ពស់ និងបណ្តោយ គ្រាន់តែពួកគាត់មិនអាចដឹងថា លើសទម្ងន់ ឬត្រឹមត្រូវ ដោយសារបានត្រឹមតែឃើញនឹងភ្នែក។

ទាំងលោករដ្ឋមន្រ្តី និងពលរដ្ឋ សំណូមពរឱ្យមានការគិតគូរចំនុចនេះពីអ្នកដឹកជញ្ជូន ខណៈគ្រោះថ្នាក់ចរាចរណ៍បាននិងកំពុងកើតឡើងរៀងរាល់ថ្ងៃគួរឱ្យព្រួយបារម្ភ៕

ថ្លែងក្នុងសិក្ខាសាលាស្តីពី «ការកសាងបណ្តាញ និងពង្រឹងភាពជាដៃគូនៅតំបន់ឆ្នេរ និងសមុទ្រ» នាថ្ងៃទី២៦ ខែមីនា ឆ្នាំ២០២៦ នៅខេត្តកំពត កញ្ញា អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លើកឡើងថា៖ បណ្ដាញដៃគូនៃការអនុវត្តគម្រោងនៅតាមតំបន់ឆ្នេរ និងសមុទ្រ នឹងក្លាយជាកម្លាំងចលករដ៏មុតស្រួចក្នុងការគ្រប់គ្រង ការពារ និងអភិរក្សធនធានជលផលសមុទ្រនៅកម្ពុជា ប្រកបដោយប្រសិទ្ធភាព និងប្រសិទ្ធផលខ្ពស់។

កញ្ញា អ៊ឹម រចនា បានគូសបញ្ជាក់ថា ការរៀបចំសិក្ខាសាលាឡើងក្នុងគោលដៅកសាងទំនាក់ទំនងល្អ នឹងឈានទៅសម្រេចបានការបង្កើតបណ្ដាញ និងពង្រឹងភាពជាដៃគូនៅតំបន់ឆ្នេរនិងសមុទ្រ ដើម្បី៖ គ្រប់គ្រង ការពារ អភិរក្ស និងអភិវឌ្ឍធនធានជលផលសមុទ្រ។ ការងារនេះអនុវត្តជាដៃគូ រវាងរដ្ឋាភិបាល ជាពិសេសក្រសួងកសិកម្ម ដែលមានអគ្គនាយកដ្ឋានជលផលជាសេនាធិការផ្ទាល់ ខណ្ឌរដ្ឋបាលជលផល អាជ្ញាធរមូលដ្ឋាន ជាមួយអង្គការមិនមែនរដ្ឋាភិបាល វិស័យឯកជន បណ្តាញសហគមន៍ នឹងរួមគ្នាលើកកម្ពស់ជីវភាពសហគមន៍ប្រកបដោយនិរន្តរភាព។

ទន្ទឹមនឹងនោះ អនុរដ្ឋលេខាធិការដដែល បានថ្លែងអំណរគុណដល់ នាយកដ្ឋានអភិរក្សជលផល នៃអគ្គនាយកដ្ឋានជលផល សហការជាមួយអង្គការ WEA, ActionAid និង NGO Forum រៀបចំសិក្ខាសាលានេះឡើង។

តាមរយៈការចូលរួមពិភាក្សា ផ្លាស់ប្ដូរយោបល់យ៉ាងសកម្មពីសិក្ខាកាម និងចែករំលែកបទពិសោធន៍ ពីអង្គការដៃគូទាំងអស់ អនុរដ្ឋលេខាធិការរូបនេះ ជឿជាក់ថា ការគ្រប់គ្រងធនធានជលផលសមុទ្ររបស់កម្ពុជា នឹងកាន់តែមានប្រសិទ្ធភាព និងប្រសិទ្ធផលខ្ពស់ជាងមុន ដើម្បីធានានិរន្ដរភាពធនធានជលផលសមុទ្រកម្ពុជា ឲ្យបានគង់វង្ស ឋិតឋេរ ធំធាត់ សម្រាប់កូនចៅជំនាន់ក្រោយ៕