កីឡាករ​គុន​ខ្មែរ ៥ រូប​នឹង​ចេញ​ទៅ​ប្រកួត​នៅ​សង្វៀនលំដាប់អន្តរជាតិ​ក្នុង​ប្រទេស​ជប៉ុន​នា​ខែ​កញ្ញា​ខាង​មុខ​នេះ​ ដែល​ជា​ឱកាស​ដ៏​កម្រ​ក្នុងការផ្សព្វផ្សាយសិល្បៈគុនខ្មែរ និងវប្បធម៌ជាតិ ជាពិសេស​ចាប់​យក​ឱកាស​ទី​ផ្សារ​ប្រកួតលើ​ឆាក​អន្តរជាតិកាន់តែច្រើនបន្ថែមទៀត។

ជើងខ្លាំង​គុន​ខ្មែរទាំង៥រូបនោះរួមមាន លន បញ្ញា និង ធន់ ម៉េងហុង ទទួល​បាន​ឱកាស​ជា​លើក​ដំបូង​ក្នុង​ការ​ប្រកួត​នៅ​សង្វៀន​ឃីក​បុក​ស៊ីង​លំដាប់​ពិភព​លោក K-1 ចំឡែកកីឡាករ ម៉ឺន មេឃា អេ អាំម៉ារីនភូថង និង គោរមៈ ច័ន្ទរាជ ត្រូវ​ចេញ​ទៅ​ប្រកួត​នៅ​សង្វៀន Knock Out ក្នុង​ខែ​ជា​មួយ​គ្នា។

សម្រាប់​សង្វៀន Knock Out នឹង​រៀបចំ​ការ​ប្រកួត​នៅ​ថ្ងៃ​ទី​៥ ខែ​កញ្ញា ឆ្នាំ ២០២៦ ដែល​អ្នក​លេង​គុន​ខ្មែរ ម៉ឺន មេឃា ត្រូវ​តទល់​នឹង​កីឡាករ​ Rikito ក្នុង​ទម្ងន់ ៦៤គីឡូក្រាម​ ខណៈ អេ អាំម៉ារីនភូថង ត្រូវ​ប្រកួត​ជា​មួយ​កីឡាករ Hikaru Terashima ក្នុង​ទម្ងន់ ៦៦​គីឡូក្រាម​ និង​កីឡាករ​វ័យ​ក្មេង គោរមៈ ច័ន្ទរាជ ត្រូវ​ប្រកួត​ជា​មួយ​កីឡាករ Leona Pettas ក្នុង​ទម្ងន់ ៦១គីឡូក្រាម។

ដោយឡែករំលង​​តែ​ ៧ ថ្ងៃ​ក្រោយ​ នៅ​សង្វៀន K-1 កីឡាករ លន បញ្ញា ត្រូវ​ប្រឈម​មុខ​នឹង​​កីឡាករ​ជប៉ុនកាត់ហ្វីលីពីន Kazuki Matsumoto វគ្គជម្រុះ​ខ្សែ​ក្រវាត់​ឃីក​បុក​ស៊ីង​ពិភព​លោក​ទម្ងន់ ៧០ គីឡូក្រាម (K-1 WORLD MAX)​ ខណៈ ធន់ ម៉េងហុង ត្រូវ​ជួប​ជើង​ខ្លាំង​ជប៉ុន​​ Tomoya Yokoyama ដើម្បី​ដណ្តើម​ខ្សែ​ក្រវាត់​ឃីក​បុក​ស៊ីង​ពិភព​លោក ​K-1 ទម្ងន់ ៦០ គីឡូក្រាម​ នា​ថ្ងៃទី​១២ ខែ​កញ្ញា ឆ្នាំ ២០២៦៕