សង្គ្រាមរុស្ស៊ី-អ៊ុយក្រែន អូសបន្លាយពេលជាង ៤ឆ្នាំហើយ ដោយគ្មានឃើញសញ្ញាធូរស្រាលឈានឆ្ពោះទៅរកសន្តិភាពសោះ ខណៈភាគីទាំងសងខាង នៅតែច្បាំងគ្នាយ៉ាងក្តៅគគុក បង្កការបំផ្លិចបំផ្លាញ និងស្លាប់មនុស្សអស់រាប់សែននាក់។

នៅថ្ងៃទី២៧ឧសភានេះ ភ្នាក់ងារចារកម្មអង់គ្លេសម្នាក់បានទម្លាយថា ទាហានរុស្ស៊ីជិត៥០ម៉ឺននាក់ បានពលីជីវិតក្នុងសមរភូមិ ចាប់តាំងពីផ្ទុះសង្គ្រាមនៅអ៊ុយក្រែន។

កាលពីឆ្នាំមុន កងកម្លាំងអ៊ុយក្រែន ក៏ធ្លាប់ចេញរបាយការណ៍ដែរថា ចាប់តាំងពីរុស្ស៊ី បើកប្រតិបត្តិការសឹកពេញទំហឹង ក្នុងខែកុម្ភៈឆ្នាំ២០២២មក ទាហានរបស់លោកពូទីន រហូតដល់ទៅ ​១ ០២៧ ​៥៤០​នាក់ ​ត្រូវ​បាន​សម្លាប់។ ខ្ទេចរថក្រោះចំនួន ២២ ៩៦៣គ្រឿង, រថពាសដែក ២២ ៩៦៣គ្រឿង, រថយន្តដឹកសាំងនិងយានជំនិះ ៥៤ ៣៧០គ្រឿង, ប្រព័ន្ធបាញ់កាំភ្លើងធំ ២៩ ៩៩៣គ្រឿង, ប្រព័ន្ធបាញ់រ៉ុកកែតពហុមុខងារ ១ ៤៣២គ្រឿង, ខែលការពារដែនអាកាស ១ ១៩២គ្រឿង, យន្តហោះ ៤២១គ្រឿង, ឧទ្ធម្ភាគចក្រ ៣៤០គ្រឿង, ដ្រូន ៤៤ ០៥៨គ្រឿង, កប៉ាល់និងទូក២៨គ្រឿង និងនាវាមុជទឹកមួយគ្រឿងផងដែរ៕

(អាម៉េរិក)៖ ស៊ីទែនផ្ទុកសារធាតុគីមីមួយកន្លែង នៅក្រុមហ៊ុន GKN Aerospace ក្នុងទីក្រុង Garden Grove ភាគខាងត្បូងរដ្ឋកាលីហ្វ័រញ៉ាបានលេចធ្លាយ និងឡើងកម្ដៅខ្លាំង បង្កឱ្យមានការភ័យខ្លាច បង្ខំឱ្យជម្លៀសពលរដ្ឋជាបន្ទាន់ជាង ៥០,០០០ នាក់ចេញពីផ្ទះសម្បែង។

តាមការផ្សាយរបស់កាសែត CBS Newsនៅថ្ងៃទី២៦ឧសភានេះ បានបញ្ជាក់ថាស៊ីទែននោះ មានផ្ទុកសារធាតុគីមី «មេទីល មេតាក្រីឡាត» (MMA) ចំនួន ៧,០០០ ហ្គាឡុង គេប្រើប្រាស់ក្នុងការផលិតយន្តហោះ ហើយការឡើងកម្ដៅនេះបានធ្វើឱ្យប្រឈមមុខខ្ពស់នឹងបាតុភូតផ្ទុះ BLEVE (ការផ្ទុះនៃចំហាយទឹកដែលរីកមាឌដោយសារអង្គធាតុរាវពុះ)។

អាជ្ញាធរក្នុងតំបន់ បានបញ្ជាក់ថា ស្ថានការណ៍បានធូរស្រាលមួយកម្រិតដែលជួយកាត់បន្ថយសម្ពាធខាងក្នុង និងលុបបំបាត់ហានិភ័យនៃការផ្ទុះ ដែលឱ្យប្រជាពលរដ្ឋអាចត្រឡប់ទៅផ្ទះវិញបានមួយផ្នែក។ ប៉ុន្តែអាជ្ញាធរនៅតែស្នើសុំឱ្យប្រជាពលរដ្ឋប្រហែល ១៦,០០០ នាក់ រស់នៅក្បែរទីតាំងកើតហេតុបំផុត កុំទាន់ត្រឡប់ទៅវិញ ដោយសារតែលទ្ធភាពនៃការលេចធ្លាយសារធាតុពុល ឬការផ្ទុះក្នុងកម្រិតតូចនៅតែអាចកើតមាន។

បច្ចុប្បន្ន ក្រុមពន្លត់អគ្គិភ័យកំពុងដកស្រទាប់ការពារកម្ដៅចេញពីស៊ីទែន និងបន្តបាញ់ស្រោចទឹកត្រជាក់រាប់លានហ្គាឡុងដើម្បីបញ្ចុះកម្ដៅ ខណៈលទ្ធផលនៃការធ្វើតេស្តទឹកហូរចេញពីទីតាំងនោះ បង្ហាញថាពុំទាន់មានការបំពុលសារធាតុគីមីគ្រោះថ្នាក់ចូលក្នុងបរិស្ថានឡើយ៕

ទិន្នន័យដែលចេញផ្សាយដោយរដ្ឋបាលជាតិស្ថិតិចិនកាលពីថ្ងៃទី ១៨ ខែឧសភា បានបង្ហាញថា សេដ្ឋកិច្ចជាតិចិនបានរក្សានិន្នាការអភិវឌ្ឍន៍ប្រកបដោយស្ថិរភាព និងរីកចម្រើនចាប់ពីខែមករាដល់ខែមេសា ឆ្នាំ ២០២៦ នេះ ។ លោក Fu Linghui អ្នកនាំពាក្យរដ្ឋបាលជាតិស្ថិតិចិន បានថ្លែងនៅក្នុងសន្និសីទសារព័ត៌មានរបស់ការិយាល័យព័ត៌មាននៃក្រុមប្រឹក្សាកិច្ចការរដ្ឋចិននៅថ្ងៃដដែលនោះថា ចាប់ពីខែមករាដល់ខែមេសា ប្រទេសចិនបានអនុវត្តគោលនយោបាយម៉ាក្រូសេដ្ឋកិច្ចកាន់តែសកម្ម និងមានប្រសិទ្ធភាព ដែលនាំឱ្យផលិតកម្ម និងការផ្គត់ផ្គង់មានការកើនឡើងជាលំដាប់ ទំហំលក់ដូរក្នុងទីផ្សារបន្តពង្រីក ពាណិជ្ជកម្មជាមួយបរទេសបង្ហាញពីភាពធន់ជាបន្តបន្ទាប់ ឱកាសការងារនិងតម្លៃទំនិញមានស្ថិរភាពជាទូទៅ ហើយការអភិវឌ្ឍប្រកបដោយគុណភាពខ្ពស់ឆ្ពោះទៅរកទិសដៅថ្មី និងប្រសើរជាងមុន។

ចាប់ពីខែមករាដល់ខែមេសា តម្លៃបន្ថែមនៃសហគ្រាសឧស្សាហកម្មធុនមធ្យមនិងធំទូទាំងប្រទេសចិនបានកើនឡើង ៥,៦% បើប្រៀបធៀបនឹងរយៈពេលដូចគ្នានៃឆ្នាំមុន។ សន្ទស្សន៍ផលិតកម្មខាងសេវាកម្មបានកើនឡើង ៤,៩% បើប្រៀបធៀបនឹងរយៈពេលដូចគ្នានៃឆ្នាំមុន។ ទំហំលក់រាយសរុបនៃទំនិញប្រើប្រាស់មានទឹកប្រាក់លើសពី ១៦ទ្រីលានយាន់ប្រាក់ចិន កើនឡើង ១,៩% បើប្រៀបធៀបនឹងរយៈពេលដូចគ្នានៃឆ្នាំមុន។ ទំហំសរុបនៃការនាំចូល និងនាំចេញទំនិញមានទឹកប្រាក់លើសពី ១៦ទ្រីលានយាន់ប្រាក់ចិន កើនឡើង ១៤,៩% បើប្រៀបធៀបនឹងរយៈពេលដូចគ្នានៃឆ្នាំមុន៕