លោកនាយករដ្ឋមន្ត្រីសិង្ហបុរី Lawrence Wong បានប្រកាសកាលពីថ្ងៃទី២៣សីហានេះថា កុមារសិង្ហបុរីម្នាក់ៗ នឹងទទួលបានការគាំទ្រផ្នែកហិរញ្ញវត្ថុ ដោយផ្ទាល់ប្រមាណ ៥៥ ១៤០ដុល្លារអាមេរិក រហូតដល់ពួកគេមានអាយុគ្រប់ ១៧ឆ្នាំ។

លោកបានបញ្ជាក់ថា គម្រោងថ្មីនេះ នឹងផ្តល់ការគាំទ្របន្ថែម មិនត្រឹមតែនៅពេលកុមារទើបកើតមកប៉ុណ្ណោះទេ ប៉ុន្តែនឹងគាំទ្រក្នុងអំឡុងពេលដែលពួកគេធំធាត់ដែរ។ កញ្ចប់ថវិកានោះ នឹងរួមបញ្ចូលនូវសមាសភាគផ្សេងៗដូចជា កាដូសាច់ប្រាក់ ប្រាក់ឧបត្ថម្ភសេវាសុខាភិបាល (MediSave) ឥណទានកុមារ និងផ្សេងៗទៀត។

លោកបានហៅគម្រោងថ្មីនេះថា កញ្ចប់គាំទ្រកុមារសិង្ហបុរី ពោលគឺជាគម្រោងដែលនឹងបង្រួម ហើយចូលមកជំនួសឱ្យការគាំទ្រផ្នែកហិរញ្ញវត្ថុ ដែលបច្ចុប្បន្នត្រូវបានផ្តល់ជូនតាមរយៈគម្រោងប្រាក់ឧបត្ថម្ភទារក និងគម្រោងគ្រួសារ ដែលមានសមាជិកច្រើន។

គិតត្រឹមខែមិថុនា ឆ្នាំ២០២៦ មានកុមារច្រើនជាង ៦១០ ០០០នាក់ ដែលមានអាយុ ១៧ឆ្នាំ និងតិចជាងនេះ នៅតាមគ្រួសារសរុបប្រមាណ ៣៨០ ០០០គ្រួសារ នឹងទទួលបានផលប្រយោជន៍ពីគម្រោងកញ្ចប់ថវិកានេះ៕

បន្ទាប់ពីមានប្រសាសន៍របស់សម្តេចធិបតី ហ៊ុន ម៉ាណែត លោកគ្រូអ្នកគ្រូ និងសិស្សានុសិស្សនៃសាលាដូង នៅលើភ្នំគីរីរម្យ ក្នុងភូមិសាស្រ្តខេត្តកំពង់ស្ពឺ បានប្រែសកម្មភាពពីការរុះរើចេញដោយកងកម្លាំងទាហាន មកជាការចូលទៅពិនិត្យមើលដោយស្នាមញញឹមរាក់ទាក់ពីថ្នាក់ដឹកនាំជាន់ខ្ពស់ក្រសួង និងអាជ្ញាធរដែនដី ដើម្បីសួរសុខទុក្ខ ស្វែងយល់ពីស្ថានភាពនៃដំណើរការរៀន និងបង្រៀនរបស់សាលារៀននៅក្នុងតំបន់ តបតាមការចង្អុរបង្ហាញរបស់សម្តេចនាយករដ្ឋមន្ត្រី។

សូមបញ្ជាក់ថា កន្លងមកនេះ លោក អ៊ុក វណ្ណដេ ស្ថាបនិកសាលាដូងនៅលើភ្នំគិរីរម្យ បានចូលរួមបង្កើតសាលាដូង ជាមួយនឹងការខិតខំខ្នះខ្នែងកៀរគរធនធានពីសប្បុរសជន មកបណ្តុះបណ្ដាលកុមារចំនួនជាង១៥០នាក់ ដែលជាកូនចៅប្រជាពលរដ្ឋនៅក្នុងមូលដ្ឋាន លើការអប់រំបំណិនជីវិត។

ដើម្បីស្វែងយល់លើបញ្ហានេះ សម្តេច ហ៊ុន ម៉ាណែត ដែលបានជួបផ្ទាល់ជាមួយលោក វណ្ណដេ បានចាត់ទុកថា នេះគឺជាសកម្មភាពដែលផ្តល់ផលប្រយោជន៍វិជ្ជមានពិតៗដល់សង្គមនិងប្រជាជន។ សម្តេចធិបតី គាំទ្រឲ្យសាលាដូងបន្តដំណើរការទៅមុខ និងគ្រូអាចស្នាក់នៅផ្ទះជាធម្មតា ដើម្បីបង្រៀនសិស្ស។

ការចាត់តាំងមន្ត្រី ជំនាញចុះពិនិត្យនិងផ្ទៀងផ្ទាត់ជាបន្ទាន់នៅលើទីតាំងជាក់ស្តែង ដើម្បីរៀបចំដំណោះស្រាយមួយឲ្យបានសមស្រប និងមានចីរភាព ដែលអាចធានាថាសាលាដូងអាច នៅបន្តដំណើរការបណ្ដុះបណ្ដាលរបស់ខ្លួនដល់ក្មេងៗនៅទីនោះ។

ប្រកាសជាសាធារណៈនៅព្រឹកថ្ងៃនេះ សម្តេចបានចូលរួមសម្រួលបន្ទុកលើដំណើរការសាលាដូង ដោយផ្ដល់ការឧបត្ថម្ភជាថវិកាចំនួន ៥លានរៀល និងអង្ករ ១តោន ក្នុងមួយខែៗ ដោយគិតចាប់ពីខែកញ្ញា ឆ្នាំ២០២៦ នេះតទៅ។
មហាជនបានសាទរ និងចាត់ទុកថា នេះជាការដោះស្រាយការងារដោយភាពជាក់ស្តែងរបស់នាយករដ្ឋមន្រ្តីលើបញ្ហាសង្គម ដែលមិនផ្អែកតែលើការរាយការណ៍របស់មន្រ្តីតែម្យ៉ាង៕

ទូរទស្សន៍សាធារណៈ CCTV នៅ​ថ្ងៃទី​៦ ខែសីហានេះ បាន​រាយការណ៍ថា ភ្លៀងធ្លាក់ខ្លាំង និងទឹកជំនន់ ក្នុងខេត្ត Shaanxi នៅ​ភាគពាយ័ព្យនៃ​ប្រទេសចិន បានបណ្តាលឱ្យផ្លូវថ្នល់ខូចខាត​​ ហើយ​បាន​បំផ្លាញស្ពាន ហេដ្ឋារចនាសម្ព័ន្ធថាមពល និងទំនាក់ទំនង ដែលបង្ខំឱ្យមានការជម្លៀសមនុស្សជាង ២៥.០០០នាក់ ក្នុងរយៈពេល ២៤ម៉ោងកន្លងមកនេះ។

ប្រព័ន្ធ​ផ្សព្វផ្សាយ​នេះ​បានបង្ហាញពី​រូប​ភាព​វីដេអូនៃផ្លូវដែលត្រូវ​ទឹក​ជំនន់​ហូរច្រោះ និង​បុគ្គលិកជួយសង្គ្រោះដែលកំពុងជួយជញ្ជូនសម្ភារៈសង្គ្រោះ រួមមាន​ទឹក និងអង្ករ ដោយថ្មើរជើង នៅតំបន់ Zhen’an ក្នុងទីក្រុង Shangluo របស់​ខេត្ត Shaanxi។

ទូរទស្សន៍ CCTV បន្ត​ថា ភ្លៀងធ្លាក់ខ្លាំងត្រូវបានគេរំពឹងថា នឹងបន្តមាន​នៅក្នុងតំបន់នេះ ហើយដោយ​សំអាង​ដល់​អាជ្ញាធរមូលដ្ឋាន ប្រព័ន្ធផ្សព្វផ្សាយ​នេះ បាន​ឱ្យដឹង​ទៀតថា ​មនុស្សជាង ១៤០.០០០នាក់ ត្រូវបានជម្លៀសចេញនៅខេត្ត​ Shaanxi ចាប់តាំងពីថ្ងៃទី៣០​ ខែកក្កដាមក​។

ការ​ជម្លៀសនេះ​កើតឡើងនៅពេលដែលចិនកំពុងត្រៀមខ្លួន សម្រាប់ព្យុះទីហ្វុង Dolphin ដែលត្រូវបានគេរំពឹងថា នឹងវាយប្រហារតាមឆ្នេរសមុទ្រភាគខាងកើតរបស់ប្រទេស ពីទីក្រុង Shanghai ដល់ Fujian ចន្លោះថ្ងៃទី ៩-១០​ ខែសីហា។ គេរំពឹងថា ព្យុះ​នេះ​នឹងនាំមកនូវភ្លៀងធ្លាក់ខ្លាំង និងខ្យល់ខ្លាំង។

អាជ្ញាធរបានប្រាប់​ថា បន្ទាប់ពីបានបោកបក់ដល់ដីគោក ព្យុះទីហ្វុងនេះអាចនឹងមានប្រតិកម្មជាមួយខ្យល់ត្រជាក់ ដែល​នាំមកនូវភ្លៀងធ្លាក់ខ្លាំងជាងមុននៅ​​ភាគខាងជើងប្រទេសចិន ជាជាងនៅឆ្នេរសមុទ្រភាគខាងកើត។

អាជ្ញាធរបានបន្ថែម​ថា តំបន់ជាច្រើន​របស់​ប្រទេស រួមទាំងនៅ Heilongjiang, Jilin, Shaanxi, Hunan, Guizhou, Yunnan, Guangxi និង​ Hainan នឹងមាន​ភ្លៀងធ្លាក់ ពី​ខ្លាំងទៅកាន់​តែខ្លាំង ខណៈដែលព្រមានប្រជាជនឱ្យប្រុងប្រយ័ត្ន ចំពោះបំណាក់​ដី ទឹកជំនន់ និងគ្រោះមហន្តរាយផ្សេងៗទៀត៕