លោក ស៊ី នឹងធ្វើការជាមួយកូរ៉េខាងជើង ដើម្បីប្រយុទ្ធប្រឆាំងនឹងប្រទេសអំណាចផ្តាច់ការ

ប្រធានាធិបតីចិន លោក ស៊ី ជីនពីង បានអះអាងថា វាជាគោលនយោបាយដ៏រឹងមាំរបស់ប្រទេសចិន ក្នុងការធ្វើឱ្យប្រសើរឡើងនូវទំនាក់ទំនងជាមួយកូរ៉េខាងជើង ហើយប្រទេសទាំងពីរនឹងធ្វើការរួមគ្នា ដើម្បីប្រយុទ្ធប្រឆាំងនឹងអនុត្តរភាព និងធ្វើឱ្យរស់ឡើងវិញនូវយោធានិយម នេះបើយោងតាមកាសែតរដ្ឋកូរ៉េខាងជើង Rodong Sinmun កាលពីថ្ងៃទី៨ ខែមិថុនានេះ។

លោក ស៊ី ថាប្រទេសជិតខាងទាំងពីរនឹងពង្រឹងការផ្លាស់ប្តូរនៅក្នុងគ្រប់វិស័យ ដើម្បីចាក់បញ្ចូលសន្ទុះដ៏ខ្លាំងក្លាក្នុងការអភិវឌ្ឍទំនាក់ទំនង និងការពារសណ្តាប់ធ្នាប់សកលដោយយុត្តិធម៌។ លោកបន្ថែមថា យើងត្រូវតែប្រឆាំងនឹងអនុត្តរភាព អំណាចផ្តាច់ការ និងការប៉ុនប៉ង និងការឃុបឃិតគ្នាទាំងអស់ ដើម្បីរស់ឡើងវិញនូវយោធានិយម ដែលបង្កគ្រោះថ្នាក់ដល់សន្តិសុខ និងស្ថិរភាពក្នុងតំបន់។

លោកក៏បានសន្យាថានឹងធ្វើការជាមួយកូរ៉េខាងជើង ដើម្បីលើកកម្ពស់ពហុភាគីនិយមដោយយុត្តិធម៌ និងមានសណ្តាប់ធ្នាប់ និងសកលភាវូបនីយកម្មសេដ្ឋកិច្ចដែលរួមបញ្ចូល ការផ្តល់ផលប្រយោជន៍ដល់ពិភពលោកក្នុងការកសាងសហគមន៍នៃវាសនារួមរបស់មនុស្សជាតិ។

លោក ស៊ី ត្រូវបានគេរំពឹងថានឹងមកដល់ទឹកដីកូរ៉េខាងជើងនៅថ្ងៃចន្ទសប្តាហ៍ក្រោយនេះ សម្រាប់ដំណើរទស្សនកិច្ចរយៈពេលពីរថ្ងៃ ដែលជាលើកដំបូងរបស់លោកក្នុងរយៈពេលប្រាំពីរឆ្នាំ និងជួបពិភាក្សាជាមួយមេដឹកនាំកូរ៉េខាងជើង គីម ជុងអ៊ុន ខណៈដែលទីក្រុងប៉េកាំងព្យាយាមទាញទីក្រុងព្យុងយ៉ាងត្រឡប់ទៅក្នុងគន្លងរបស់ខ្លួនវិញ។

គូសបញ្ជាក់ថាលោក ស៊ី បានទទួលលោក គីម និងមេដឹកនាំដទៃទៀតកាលពីឆ្នាំមុន នៅឯក្បួនដង្ហែរយោធាដ៏ធំមួយនៅទីក្រុងប៉េកាំង ជាកន្លែងដែលលោកបានឈរជាមួយប្រធានាធិបតីរុស្ស៊ី វ្ល៉ាឌីមៀ ពូទីន។ ចាប់តាំងពីពេលនោះមក ទីក្រុងព្យុងយ៉ាងបានបន្តការឆ្លងកាត់នៅតាមព្រំដែនចិន និងបង្កើនការផ្លាស់ប្តូរលើគ្រប់វិស័យ ក្រោយជាប់គាំងក្នុងអំឡុងពេលជំងឺរាតត្បាត COVID-19៕

ដោយ៖ ចិន្តា ទីទិ