មេដឹកនាំលោក គីម ជុងអ៊ុន (Kim Jong Un) បានថ្លែងកោតសរសើរដល់កងទ័ពដែលកំពុងចូលរួមក្នុង «ប្រតិបត្តិការយោធានៅក្រៅប្រទេស» ក្នុងអំឡុងពេលថ្លែងសុន្ទរកថាអបអរសាទរខួបនៃការបង្កើតប្រទេសកូរ៉េខាងជើង។ ការលើកឡើងនេះត្រូវបានគេមើលឃើញថា ជាការទទួលស្គាល់ដោយប្រយោលចំពោះការជួយជ្រោមជ្រែងរបស់ទីក្រុងព្យុងយ៉ាងដល់ទីក្រុងមូស្គូ នៅក្នុងសង្គ្រាមប្រឆាំងនឹងអ៊ុយក្រែន។ នេះបើយោងតាមប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃព្រហស្បតិ៍ ទី១០ កញ្ញានេះ។

អ្នកវិភាគបានលើកឡើងថា ចាប់តាំងពីប្រទេសរុស្ស៊ីបានបើកការឈ្លានពានទ្រង់ទ្រាយធំលើអ៊ុយក្រែនក្នុងឆ្នាំ២០២២ មក កូរ៉េខាងជើងបានក្លាយជាសម្ព័ន្ធមិត្តដ៏សំខាន់របស់វិមានក្រឹមឡាំង ដោយបានបញ្ជូនកងទ័ពទៅគាំទ្រកិច្ចខិតខំប្រឹងប្រែងធ្វើសង្គ្រាមរបស់ទីក្រុងមូស្គូ ជាថ្នូរនឹងផលប្រយោជន៍សេដ្ឋកិច្ច និងបច្ចេកវិទ្យាយោធា។

ទីភ្នាក់ងារសារព័ត៌មានផ្លូវការ KCNA បានរាយការណ៍នៅថ្ងៃព្រហស្បតិ៍នេះថា នៅក្នុងសុន្ទរកថាអបអរសាទរខួបនៃការបង្កើតប្រទេសកូរ៉េខាងជើង (ថ្ងៃទី៩ ខែកញ្ញា ឆ្នាំ១៩៤៨) លោក គីម បានថ្លែងកោតសរសើរដល់ពលរដ្ឋដែលរស់នៅក្រៅប្រទេស ប៉ុន្តែបានផ្តល់ការគោរពជាពិសេសដល់កងទ័ពដែលត្រូវបានដាក់ពង្រាយនៅក្រៅប្រទេស។

លោក គីម បានលើកឡើងក្នុងឱកាសខួបលើកទី ៧៨ ថា «ខ្ញុំក៏សូមថ្លែងអំណរគុណយ៉ាងពិសេស និងការគោរពយ៉ាងជ្រាលជ្រៅចំពោះមេបញ្ជាការ និងទាហាននៃកងទ័ពរបស់យើង ដែលកំពុងចូលរួមក្នុងប្រតិបត្តិការយោធានៅក្រៅប្រទេស»។

លោកបានបន្ថែមថា «ឧត្តមគតិរបស់យើងកំពុងក្លាយជាការពិតយ៉ាងឆាប់រហ័ស ដោយសារស្មារតីស្នេហាជាតិ ការស្ម័គ្រចិត្តបម្រើជាតិ និងការរួមចំណែកដ៏មុតមាំរបស់ប្រជាពលរដ្ឋទាំងអស់ ដែលតែងតែបួងសួងសុំឱ្យប្រទេសជាតិមានភាពរីកចម្រើនរុងរឿង»។

យោងតាមកូរ៉េខាងត្បូង ទាហានកូរ៉េខាងជើងប្រហែល ២,០០០ នាក់ត្រូវបានសម្លាប់នៅក្នុងសង្គ្រាមរវាងរុស្ស៊ី និងអ៊ុយក្រែន។

ទន្ទឹមគ្នានេះ កាលពីខែសីហា អ៊ុយក្រែនបានអះអាងថា ទីក្រុងមូស្គូបានបាញ់បង្ហោះមីស៊ីលផ្លោង (ballistic missiles) របស់កូរ៉េខាងជើង នៅក្នុងការវាយប្រហារមួយដែលបានសម្លាប់មនុស្សយ៉ាងហោចណាស់ ៩ នាក់ និងធ្វើឱ្យមនុស្សរាប់សិបនាក់ផ្សេងទៀតរងរបួស។

ទីក្រុងគៀវ (Kyiv) ក៏បានលើកឡើងផងដែរថា ទាហានកូរ៉េខាងជើងរហូតដល់ ៥០,០០០ នាក់ គ្រោងនឹងត្រូវដាក់ពង្រាយទៅកាន់ប្រទេសរុស្ស៊ី ទោះបីជាមិនមានការផ្តល់ភស្តុតាងដើម្បីគាំទ្រការអះអាងនេះ ឬការបញ្ជាក់អំពីពេលវេលាជាក់លាក់សម្រាប់ការដាក់ពង្រាយក៏ដោយ៕

មន្ត្រីនគរបាលម្នាក់ជាប្តីបានបាញ់សម្លាប់ប្រពន្ធរបស់ខ្លួនដែលជាគ្រូបង្រៀន នៅឯសាលាមត្តេយ្យមួយក្នុងប្រទេសថៃកាលពីថ្ងៃពុធ ទី៩កញ្ញានេះ ដោយមិនមានមូលហេតុ ខណៈកុមារទាំងអស់មានសុវត្ថិភាព។

យោងតាមការផ្សាយរបស់អង្គភាព AFPបានឱ្យដឹងថា ខ្មាន់កាំភ្លើងរូបនេះបានត្រឡប់ទៅផ្ទះវិញបន្ទាប់ពីការបាញ់ប្រហារប្រពន្ធនៅក្នុងខេត្ត Chonburi (ជុនបុរី) ដែលស្ថិតនៅភាគអាគ្នេយ៍នៃទីក្រុងបាងកក។

ការបាញ់ប្រហារនេះបានបង្កការភ្ញាក់ផ្អើលនៅក្នុងប្រទេសថៃ មួយខែបន្ទាប់ពីយុវជនម្នាក់បានបាញ់សម្លាប់ជីដូនជីតារបស់ខ្លួន រួចបាញ់សម្លាប់បុគ្គលិក ៥ នាក់ និងសិស្សម្នាក់នៅសាលារៀនរបស់ខ្លួន មុនពេលធ្វើអត្តឃាត។

ប្រទេសថៃមានអត្រាខ្ពស់មួយនៃការកាន់កាប់អាវុធនៅក្នុងតំបន់ ហើយការសន្យាកន្លងមកក្នុងការរឹតបន្តឹងច្បាប់ស្តីពីអាវុធមិនអាចទប់ស្កាត់ការបាញ់ប្រហារដែលកើតឡើងដដែលៗនោះទេ។

យោងតាមលោក Sayan Klomaon ប្រធានក្រុមប្រឹក្សាឃុំ Nong Pla Lai បានឱ្យដឹងថា ខ្មាន់កាំភ្លើងរូបនេះ ដែលជានគរបាលក្នុងតំបន់ បានមកដល់សាលារៀននៅម៉ោងប្រហែល ១០:៣០ ព្រឹក ហើយបាននិយាយជាមួយប្រពន្ធរបស់គាត់ មុនពេលបាញ់សម្លាប់នាង។

លោកបន្តថា គ្មានសិស្សណាម្នាក់បានឃើញហេតុការណ៍នេះទេ ដោយសារវាបានកើតឡើងនៅខាងក្រៅថ្នាក់រៀន។ លោកបានបន្ថែមថា ខ្មាន់កាំភ្លើងបានចាកចេញទៅផ្ទះវិញ ហើយចាប់តាំងពីពេលនោះមក កុមារទាំងអស់ត្រូវបានគេមកទទួលយកទៅផ្ទះអស់ហើយ។

នៅក្នុងសេចក្តីថ្លែងការណ៍មួយនៅលើ Facebook លោក Naris Niramaiwong អភិបាលខេត្ត Chonburi បានបញ្ជាក់ថា កុមារចំនួន ៤៤ នាក់ត្រូវបានជម្លៀសចេញដោយសុវត្ថិភាព រួមជាមួយគ្រូបង្រៀន ៣ នាក់ និងបុគ្គលិក ៣ នាក់ផ្សេងទៀត។

យ៉ាងណាម៉ិញ មូលហេតុនៃហេតុការណ៍នេះនៅមិនទាន់ច្បាស់លាស់នៅឡើយទេ។

កាលពីឆ្នាំ២០២២ អតីតនគរបាលម្នាក់ដែលប្រដាប់ដោយកាំភ្លើង និងកាំបិត បានសម្រុកចូលសាលាមត្តេយ្យមួយនៅភាគខាងជើងប្រទេសថៃ ហើយបានសម្លាប់កុមារ ២៤ នាក់ និងមនុស្សពេញវ័យ ១២នាក់ ដែលជាហេតុការណ៍សម្លាប់រង្គាលដ៏សាហាវបំផុតមួយនៅក្នុងប្រទេសថៃ៕

មនុស្ស ៥ នាក់បានស្លាប់នៅក្នុងហេតុការណ៍ធ្លាក់ឧទ្ធម្ភាគចក្រមួយគ្រឿង នៅឯទីលានចុះចតដាច់ស្រយាលមួយក្នុងតំបន់ដីគោកនៃរដ្ឋ Sarawak នៅឆ្នេរសមុទ្រភាគពាយ័ព្យនៃកោះ Borneo។ នេះបើយោងតាមការផ្សាយរបស់អង្គភាព AFPនៅថ្ងៃទី១០ ខែកញ្ញានេះ។

មន្ត្រីគ្រប់គ្រងគ្រោះមហន្តរាយបានឱ្យដឹងថា ឧទ្ធម្ភាគចក្រប្រភេទ BO-105 ដែលប្រតិបត្តិការដោយសេវាកម្មគ្រូពេទ្យតាមផ្លូវអាកាស (Flying Doctor Service) របស់ប្រទេសនេះ បានធ្លាក់កាលពីរសៀលថ្ងៃអង្គារ នៅចម្ងាយប្រហែល ៣១៥ គីឡូម៉ែត្រ (១៩៥ ម៉ាយ) ភាគអាគ្នេយ៍នៃទីក្រុង Miri។

លោក Galong Luang ប្រធានគណៈកម្មាធិការគ្រប់គ្រងគ្រោះមហន្តរាយទីក្រុង Miri បានឱ្យដឹងថា មនុស្សទាំង ៥ នាក់នៅលើឧទ្ធម្ភាគចក្រនោះបានស្លាប់បាត់បង់ជីវិត ដែលត្រូវបានបញ្ជាក់ដោយរបាយការណ៍ពីនាយកដ្ឋានពន្លត់អគ្គិភ័យ និងសង្គ្រោះ (Bomba) និងក្រសួងសុខាភិបាល។

យោងតាមប្រព័ន្ធផ្សព្វផ្សាយក្នុងស្រុក អ្នកបើកបរ គ្រូពេទ្យម្នាក់ ជំនួយការផ្នែកវេជ្ជសាស្ត្រម្នាក់ និងគិលានុបដ្ឋាក/គិលានុបដ្ឋាយិកាពីរនាក់ ស្ថិតក្នុងចំណោមអ្នកដែលបានស្លាប់នោះ។

វីដេអូនៃហេតុការណ៍ធ្លាក់ដែលបានបង្ហោះលើបណ្តាញសង្គម បានបង្ហាញឱ្យឃើញឧទ្ធម្ភាគចក្រនោះមានផ្សែងហុយចេញមក មុនពេលវាធ្លាក់ចុះមកលើដី។

ទន្ទឹមគ្នានេះ អាជ្ញាធរអាកាសចរណ៍ស៊ីវិលម៉ាឡេស៊ីបានឱ្យដឹងថា ក្រុមស៊ើបអង្កេតករណីធ្លាក់យន្តហោះរបស់ម៉ាឡេស៊ី ត្រូវបានរំពឹងថានឹងទៅដល់ទីតាំងកើតហេតុនៅថ្ងៃពុធ។ មកទល់ពេលនេះ គេនៅមិនទាន់ដឹងច្បាស់នៅឡើយទេថា តើអ្វីជាមូលហេតុដែលបណ្តាលឱ្យមានការធ្លាក់នេះ៕

យ៉ាងណាម៉ិញ សេវាកម្មគ្រូពេទ្យតាមផ្លូវអាកាសរបស់ម៉ាឡេស៊ី ផ្តល់ជំនួយដល់សហគមន៍ជនជាតិដើមភាគតិច ដែលពឹងផ្អែកយ៉ាងខ្លាំងលើការដឹកជញ្ជូនតាមផ្លូវអាកាស ដោយសារតំបន់ដីគោករបស់ប្រទេសនេះសម្បូរទៅដោយព្រៃក្រាស់ និងមានភូមិសាស្ត្រលំបាកក្នុងការធ្វើដំណើរ។

ជាធម្មតា ក្រុមការងារដែលរួមមានមន្ត្រីវេជ្ជសាស្ត្រ ជំនួយការមន្ត្រីវេជ្ជសាស្ត្រ គិលានុបដ្ឋាក/គិលានុបដ្ឋាយិកា និងបុគ្គលិកសុខាភិបាលផ្សេងទៀត ធ្វើដំណើរដោយឧទ្ធម្ភាគចក្រ ឬយន្តហោះខ្នាតតូច ទៅកាន់ភូមិ និងផ្ទះសហគមន៍ (longhouses) តាមកាលវិភាគផ្លាស់ប្តូរវេនប្រចាំខែ ឬរៀងរាល់ពីរខែម្តង៕