បង់ក្លាដែស ស្នើឱ្យឥណ្ឌា បញ្ជាក់ពីជំហររបស់ខ្លួន លើសុន្ទរកថាដែលគ្រោងទុករបស់លោកស្រី Hasina

ប្រទេសបង់ក្លាដែសបានស្នើសុំឱ្យប្រទេសឥណ្ឌាបញ្ជាក់ពីជំហររបស់ខ្លួនលើសុន្ទរកថាដែលបានគ្រោងទុករបស់អតីតនាយករដ្ឋមន្ត្រី លោកស្រី Sheikh Hasina ដែលកំពុងរស់នៅក្នុងទីក្រុងញូវដេលី។

យោងតាមអង្គភាពរ៉យទ័រផ្សាយនៅថ្ងៃទី៤សីហានេះថា ការកត់សម្គាល់នេះគឺជាការឆ្លើយតបជាផ្លូវការលើកដំបូងរបស់ប្រទេសបង់ក្លាដែសចំពោះការបង្ហាញខ្លួនដែលបានគ្រោងទុករបស់លោកស្រី Hasina នៅក្នុងព្រឹត្តិការណ៍មួយនៅថ្ងៃទី៥ ខែសីហា ដែលរៀបចំដោយក្លឹបអ្នកឆ្លើយឆ្លងព័ត៌មានបរទេសនៃអាស៊ីខាងត្បូងនៅទីក្រុងញូវដេលី ដែលជាខួបលើក២ឆ្នាំនៃការបះបោរដឹកនាំដោយនិស្សិតដែលបានផ្តួលរំលំរដ្ឋាភិបាលរបស់លោកស្រី។

បញ្ហានេះកើតឡើងនៅពេលដែលទីក្រុងដាកាបន្តស្វែងរកការធ្វើបត្យាប័នរបស់លោកស្រី Hasina ពីប្រទេសឥណ្ឌា ជាកន្លែងដែលបានរស់នៅចាប់តាំងពីរត់គេចខ្លួនពីប្រទេសបង់ក្លាដែសក្នុងខែសីហា ឆ្នាំ២០២៤។ ទោះបីជាមានសំណុំរឿងជាច្រើនប្រឆាំងនឹងលោកស្រីក៏ដោយ ប៉ុន្តែលោកស្រីនៅតែមានគម្រោងត្រឡប់ទៅប្រទេសបង់ក្លាដែសវិញនៅខែធ្នូនេះ។

ជាមួយគ្នានេះ រដ្ឋមន្ត្រីការបរទេសបង់ក្លាដែស លោកស្រី Shama Obaed Islam បានលើកឡើងថា «បង់ក្លាដែសកំពុងឆ្ពោះទៅមុខជាមួយប្រទេសឥណ្ឌាស្របតាមវិធីសាស្រ្តដែលមើលទៅមុខ ហើយឥណ្ឌាត្រូវតែច្បាស់លាស់អំពីជំហររបស់ខ្លួន»។

គូសបញ្ជាក់ថា ទំនាក់ទំនងរវាងប្រទេសជិតខាងទាំងពីរមានភាពតានតឹងចាប់តាំងពីផ្តួលរលំលោកស្រី Hasina ចេញពីអំណាច ទោះបីជាភាគីទាំងពីរថ្មីៗនេះបានបង្ហាញឆន្ទៈក្នុងការកសាងទំនាក់ទំនងឡើងវិញតាមរយៈការចូលរួម និងកិច្ចសហប្រតិបត្តិការកាន់តែច្រើនចាប់តាំងពីរដ្ឋាភិបាលរបស់លោកស្រី Tarique Rahman ឡើងកាន់តំណែងបន្ទាប់ពីការបោះឆ្នោតខែកុម្ភៈក៏ដោយ។

លោកស្រី Hasina នៅតែស្ថិតនៅក្នុងប្រទេសឥណ្ឌាចាប់តាំងពីរដ្ឋាភិបាលរបស់លោកស្រីត្រូវបានផ្តួលរំលំ បន្ទាប់ពីការតវ៉ាដ៏សាហាវអស់រយៈពេលជាច្រើនសប្តាហ៍។ ចាប់តាំងពីពេលនោះមក ប្រទេសបង់ក្លាដែសបានស្វែងរកការធ្វើបត្យាប័នលោកស្រី ហើយនៅឆ្នាំ ២០២៥ លោកស្រីត្រូវបានកាត់ទោសប្រហារជីវិតពីបទឧក្រិដ្ឋកម្មប្រឆាំងនឹងមនុស្សជាតិជុំវិញការបង្ក្រាបនៅឆ្នាំ ២០២៤ ដែលអង្គការសហប្រជាជាតិបានប៉ាន់ប្រមាណថាបានសម្លាប់មនុស្សរហូតដល់ ១,៤០០នាក់។ ប៉ុន្តែលោកស្រី Hasina បានបដិសេធសាលក្រមនេះថាជាមោឃៈតាមផ្លូវច្បាប់៕