ខ្លាឃ្មុំចេញវាយប្រហារទីក្រុង បង្ខំឱ្យជប៉ុនផ្អាកសាលារៀនចំនួន ៩៤ ទីតាំង

(ក្រុងតូក្យូ)៖ ទីក្រុង Utsunomiya របស់ប្រទេសជប៉ុនបានផ្អាកសាលាបឋមសិក្សា និងមធ្យមសិក្សាចំនួន៩៤សាលារៀន បន្ទាប់ពីប្រទះឃើញខ្លាឃ្មុំជាលើកដំបូងចូលក្នុងទីក្រុងដែលមានប្រជាជនកន្លះលាននាក់ ចម្ងាយប្រហែល ១០០ គីឡូម៉ែត្រ ភាគខាងជើងនៃទីក្រុងតូក្យូ នេះបើយោងតាមមន្ត្រីក្រុងម្នាក់។

យោងតាមអង្គភាពរ៉យទ័រថ្ងៃទី៨ ខែមិថុនានេះបានចេញផ្សាយថា ខ្លាឃ្មុំនេះត្រូវបានគេឃើញជាលើកដំបូងនៅក្នុងតំបន់លំនៅដ្ឋានក្បែរឧទ្យានមួយ។ វានៅតែមិនទាន់រកឃើញនៅឡើយទេ បន្ទាប់ពីការប្រទះឃើញចុងក្រោយនៅថ្ងៃច័ន្ទ ចម្ងាយប្រហែលកន្លះគីឡូម៉ែត្រពីសាលាមធ្យមសិក្សា។

ការវាយប្រហាររបស់ខ្លាឃ្មុំ រួមទាំងនៅតំបន់ទីក្រុងផងដែរ បានកើនឡើងនៅក្នុងប្រទេសជប៉ុន ដែលជំរុញឱ្យរដ្ឋាភិបាលបង្កើតក្រុមការងារមួយនៅឆ្នាំនេះ ដើម្បីកាត់បន្ថយការស្លាប់ និងរបួស។

កាលពីសប្តាហ៍មុន ការវាយប្រហាររបស់ខ្លាឃ្មុំមួយនៅក្នុងទីក្រុងហ្វូគូស៊ីម៉ាភាគឦសានបានបណ្តាលឱ្យមនុស្សយ៉ាងហោចណាស់បួននាក់រងរបួស។ វីដេអូសុវត្ថិភាពពីរោងចក្រដែកថែបហ្វូគូស៊ីម៉ាបង្ហាញថា ខ្លាឃ្មុំខ្មៅមួយក្បាលកំពុងដេញខាំកម្មករម្នាក់នៅច្រកចូលរោងចក្រ។

ខ្លាឃ្មុំខ្មៅអាស៊ីត្រូវបានចុះបញ្ជីជាប្រភេទសត្វងាយរងគ្រោះទូទាំងពិភពលោក ប៉ុន្តែចំនួនរបស់វាត្រូវបានគេប៉ាន់ប្រមាណថាបានកើនឡើងបីដងនៅក្នុងប្រទេសជប៉ុនចាប់តាំងពីឆ្នាំ២០១២ ដោយសារការធ្លាក់ចុះនៃការបរបាញ់។

ការប្រែប្រួលអាកាសធាតុបានបង្ករការខ្វះខាតអាហាររបស់ខ្លាឃ្មុំដូចជាផ្លែអូក និងដើមប៊ីច ខណៈពេលដែលការថយចុះចំនួនប្រជាជននៅតំបន់ជនបទ និងការរីករាលដាលនៃដីស្រែចម្ការដែលគេបោះបង់ចោលបានជំរុញឱ្យពួកវាស្វែងរកអាហារនៅជិតការតាំងទីលំនៅរបស់មនុស្ស៕

ដោយ៖ ចិន្តា ទីទិ