អន្តរជាតិ
ការវាយប្រហាររបស់អាម៉េរិកនិងអ៊ីស្រាអែល បានសម្លាប់មនុស្សជាង៣៤០០នាក់នៅអ៊ីរ៉ង់
មូលនិធិកិច្ចការទុក្ករបុគ្គល និងអតីតយុទ្ធជន (Foundation of Martyrs and Veterans Affairs) ដែលគ្រប់គ្រងដោយរដ្ឋរបស់អ៊ីរ៉ង់ បានប្រកាសនៅថ្ងៃទី១៨ ខែមេសានេះថា សង្គ្រាមជាមួយសហរដ្ឋអាម៉េរិក និងអ៊ីស្រាអែលបានសម្លាប់មនុស្សជាង ៣៤០០នាក់ ទូទាំងសាធារណរដ្ឋអ៊ីស្លាមអ៊ីរ៉ង់។ ចំពេលបទឈប់បាញ់រយៈពេលពីរសប្តាហ៍ជិតផុតកំណត់ បន្ទាប់ពីសង្គ្រាមបានផ្ទុះឡើងនៅចុងខែកុម្ភៈកន្លងទៅ។
ប្រធានមូលនិធិ លោក Ahmad Mousavi បានសង្កត់ធ្ងន់ៗថា ប្រជាជនរងទុកលំបាករហូតដល់បាត់បង់ជីវិតមានចំនួន ៣៤៦៨នាក់ ក្នុងអំឡុងពេលជម្លោះថ្មីៗនេះ។
ដូចគ្នានេះដែលកាលពីថ្ងៃទី៧ ខែមេសា ទីភ្នាក់ងារសារព័ត៌មានសកម្មជនសិទ្ធិមនុស្ស (HRANA) ដែលមានមូលដ្ឋាននៅសហរដ្ឋអាម៉េរិក បានឱ្យដឹងថា យ៉ាងហោចណាស់មនុស្សចំនួន ៣៦៣៦នាក់ ត្រូវបានសម្លាប់ រួមទាំងជនស៊ីវិលចំនួន ១៧០១នាក់ ក្នុងចំណោមនោះយ៉ាងហោចណាស់កុមារចំនួន ២៥៤នាក់ ក៏ដូចជាបុគ្គលិកយោធាចំនួន ១២២១នាក់ និងមនុស្សចំនួន ៧១៤នាក់។
ទន្ទឹមគ្នានេះ កងកម្លាំងការពារជាតិអ៊ីស្រាអែល (IDF) បានចេញសេចក្តីថ្លែងការណ៍កាលថ្ងៃទី១៨ខែមេសា ដោយអះអាងថា ខ្លួនបានបាញ់ប្រហារអ៊ីរ៉ង់ជិត១១០០០លើក ខណៈការបាញ់ប្រហារដោយកាំភ្លើងធំជាង ១៤៩០០ ដង នៅប្រទេសលីបង់។ យោធាអ៊ីស្រាអែល ក៏បានវាយប្រហារតាមអាកាសចំនួន ២៥០០ ដងនៅក្នុងប្រទេសលីបង់ ហើយបានបំផ្លាញអគារច្រើនជាន់ប្រហែល ១៦៥ អាគារ បណ្តាលឱ្យស្លាប់មនុស្ស ២១០០ នាក់ហើយមនុស្សជាងមួយលាននាក់ ត្រូវបានផ្លាស់ទីលំនៅ៕
