ព័ត៌មានអន្តរជាតិ
បក្សកុម្មុយនីស្តចិន បណ្តេញអតីតនាយឧត្តមសេនីយ៍២រូប ករណីល្មើសវិន័យបក្ស
បន្ទាប់ពីការដាក់ចាប់ឃុំខ្លួន និងដាក់ឲ្យស្ថិតនៅក្រោមការស៊ើបអង្កេតតាំងពីខែមករាឆ្នាំ២០២៦ នាយឧត្តមសេនីយ៍យោធាជាន់ខ្ពស់ពីររូបរបស់ចិន គឺ លោក Zhang Youxia និង លោក Liu Zhenli ដែលជាសមាជិកកំពូលរបស់បក្សកុម្មុយនីស្តចិន (CPC) ត្រូវបានបណ្តាញចេញពីបក្ស ដោយសារការរំលោភបំពានយ៉ាងធ្ងន់ធ្ងរលើវិន័យ និងច្បាប់។ នេះបើយោងសារព័ត៌មាន China daily នៅថ្ងៃទី២២ ខែកញ្ញានេះ។
មេដឹកនាំនៃបក្សកុម្មុយនីស្តចិន (CPC) បានសម្រេចចិត្តកាលពីថ្ងៃចន្ទ បន្ទាប់ពីការស៊ើបអង្កេតអស់រយៈពេលប្រមាណ១០ខែ ចាប់តាំងពីខែមករាដើមឆ្នាំនេះ និងរកឃើញថានាយឧត្តមសេនីយ៍ទាំងពីររូបនេះ បានរំលោភបំពានយ៉ាងធ្ងន់ធ្ងរលើវិន័យ និងច្បាប់។
ទីភ្នាក់ងារសារព័ត៌មានស៊ីនហួរ (Xinhua) បានឲ្យដឹងថា លោក Zhang ធ្លាប់បានបម្រើការជាសមាជិកគណៈកម្មាធិការនយោបាយនៃគណៈកម្មាធិការមជ្ឈិមបក្ស និងជាអនុប្រធានគណៈកម្មាធិការយោធាមជ្ឈិម ខណៈដែលលោក Liu ធ្លាប់ធ្វើជាសមាជិកគណៈកម្មាធិការយោធាមជ្ឈិម (CMC) និងជាប្រធានប្រធានសេនាធិការចម្រុះនៃនាយកនាយកដ្ឋានចម្រុះ នៃនៃគណៈកម្មាធិការយោធាមជ្ឈិម។
ទីភ្នាក់ងារបានបន្តថា គណៈកម្មការអធិការកិច្ចវិន័យនៃគណៈកម្មាធិការយោធាមជ្ឈិម បានបើកការស៊ើបអង្កេតលើលោក Zhang និងលោក Liu ជាយូរមកហើយ។ ការស៊ើបអង្កេតបានរកឃើញថា លោកទាំងពីរ បានក្បត់បំណងប្រាថ្នា និងបេសកកម្មដើមរបស់ពួកគេ ដោយបានចាកចេញឆ្ងាយពីបក្ស បោះបង់ចោលគោលការណ៍បក្ស និងបានឆ្លងខ្សែបន្ទាត់ក្រហម។ ពួកគេបានបង្កើតបក្សពួកនិយម ហើយគ្មានភក្តីភាព និងគ្មានភាពស្មោះត្រង់ចំពោះបក្សនោះឡើយ។
លោកទាំងពីរក៏ត្រូវបានរកឃើញថា បានទទួលអំណោយ (កាដូ) និងប្រាក់ដោយខុសច្បាប់ ហើយបានកេងចំណេញពីតំណែងរបស់ពួកគេ ដើម្បីជួយអ្នកដទៃក្នុងការឡើងតំណែង និងកិច្ចការផ្សេងៗទៀត ជាថ្នូរនឹងការទទួលបានប្រាក់សំណូកយ៉ាងច្រើន។
អនុលោមតាមបទបញ្ញត្តិ និងច្បាប់ពាក់ព័ន្ធរបស់បក្សកុម្មុយនីស្តចិន លោក Zhang និងលោក Liu ត្រូវបានបណ្ដេញចេញពីបក្ស ហើយបញ្ហាសង្ស័យថា ជាបទល្មើសព្រហ្មទណ្ឌរបស់ពួកគេ ត្រូវបានបញ្ជូនទៅកាន់ស្ថាប័នអយ្យការយោធា ដើម្បីពិនិត្យ និងចោទប្រកាន់តាមផ្លូវច្បាប់។ សិទ្ធិទទួលបានគុណសម្បត្តិជាប្រតិភូនៃមហាសន្និបាតជាតិលើកទី២០ នៃបក្សកុម្មុយនីស្តចិនរបស់ពួកគេទាំងពីរ ក៏ត្រូវបានបញ្ចប់ផងដែរ។
គូសបញ្ជាក់ថា វិធានការបណ្ដេញលោក Zhang និងលោក Liu ចេញពីបក្សកុម្មុយនីស្តចិន នឹងត្រូវបញ្ជាក់ទទួលស្គាល់ដោយគណៈកម្មាធិការមជ្ឈិមបក្ស នៅពេលដែលគណៈកម្មាធិការរៀបចំកិច្ចប្រជុំពេញអង្គ៕