ក្រុមហ៊ុន OpenAI Anthropic និង Google កំពុងសហការគ្នាបង្កើតស្ថាប័នកំណត់ស្តង់ដាសម្រាប់បច្ចេកវិទ្យា AI

ក្រុមហ៊ុន OpenAI ដែលជាអ្នកបង្កើតកម្មវិធី ChatGPT កាលពីថ្ងៃអង្គារ១៥ កញ្ញា សប្ដាហ៍នេះបាននិយាយថា ក្រុមហ៊ុន AI ធំៗបំផុតរបស់ពិភពលោកកំពុងធ្វើការរួមគ្នាដើម្បីបង្កើតស្ថាប័នកំណត់ស្តង់ដាគុណភាព ស្របពេលមានការព្រួយបារម្ភកាន់តែខ្លាំងឡើងអំពីហានិភ័យនៃបច្ចេកវិទ្យា AI និងមានសម្ពាធក្នុងការបង្កើតទម្រង់ថ្មីដែលមានសុវត្ថិភាពជាងមុនសម្រាប់បច្ចេកវិទ្យានេះ។

ក្រុមហ៊ុន OpenAI បាននិយាយថា ខ្លួនកំពុងសហការជាមួយក្រុមហ៊ុន Anthropic និង Google លើគំនិតមួយដែលផ្តើមចេញពីសំណើរបស់លោក Demis Hassabis CEO នៃស្ថាប័នស្រាវជ្រាវ Google DeepMind សម្រាប់ការបង្កើតស្ថាប័នស្វ័យគ្រប់គ្រង(self-regulatory body) មួយ ដែលមានគំរូប្រតិបត្តិការស្រដៀងនឹងស្ថាប័ន Financial Industry Regulatory Authority (FINRA) ដែលមានតួនាទីត្រួតពិនិត្យក្រុមហ៊ុនសម្របសមស្រួល និងក្រុមហ៊ុនវិនិយោគនានារបស់សហរដ្ឋអាមេរិក។

កាលពីខែកក្កដា លោក Hassabis បានអំពាវនាវឱ្យសហរដ្ឋអាមេរិកបង្កើតស្ថាប័នមួយដើម្បីធ្វើតេស្តប្រព័ន្ធ AI ដែលមានសមត្ថភាពខ្លាំងបំផុត មុនពេលប្រព័ន្ធទាំងនោះត្រូវបានដាក់ឱ្យប្រើប្រាស់ជាសាធារណៈ។

លោក Hassabis បានសរសេរថា ការផ្តល់មូលនិធិត្រូវតែមានចំនួនច្រើន ហើយទំនងជាភាគច្រើនមកពីវិស័យឧស្សាហកម្មផ្ទាល់ ដើម្បីអាចទាក់ទាញអ្នកជំនាញបច្ចេកទេសកម្រិតពិភពលោក និងផ្តល់ធនធានកុំព្យូទ័រចាំបាច់សម្រាប់ការធ្វើតេស្តក្នុងកម្រិតធំ ។

កាលពីថ្ងៃអង្គារដដែលនោះ លោក Sam Altman នាយកប្រតិបត្តិក្រុមហ៊ុន OpenAI បានបង្ហាញការគាំទ្រចំពោះកិច្ចសហប្រតិបត្តិការក្នុងវិស័យឧស្សាហកម្មនេះ និងបានទទួលស្គាល់ពីការព្រួយបារម្ភរបស់សាធារណជនថា ការប្រកួតប្រជែងរវាងក្រុមហ៊ុន និងប្រទេសនានា អាចនឹងធ្វើឱ្យបញ្ហាសុវត្ថិភាពត្រូវបានគេមើលរំលង៕

ប្រភព៖ BTV NEWS