ព័ត៌មានអន្តរជាតិ
កូរ៉េខាងជើងបាញ់មីស៊ីលបាលីស្ទិករយៈចម្ងាយខ្លីចំនួន ១០គ្រាប់ ខណៈអាម៉េរិក-កូរ៉េខាងត្បូងត្រៀមធ្វើសមយុទ្ធយោធា
យោធាកូរ៉េខាងត្បូង បានអះអាងថា កូរ៉េខាងជើងបានបាញ់មីស៊ីលបាលីស្ទិករយៈចម្ងាយខ្លីប្រហែល ១០គ្រាប់ ឆ្ពោះទៅសមុទ្រ នៅថ្ងៃទី២០ ខែសីហានេះ។
នាយសេនាធិការចម្រុះរបស់ទីក្រុងសេអ៊ូល បានបញ្ជាក់ថា កូរ៉េខាងជើងបានបាញ់មីស៊ីលទាំងនោះ «ពីតំបន់ព្យុងយ៉ាងរបស់ខ្លួន»។ នៅមុននេះ ការិយាល័យនាយករដ្ឋមន្ត្រីជប៉ុន និងឆ្មាំល្បាតឆ្នេររបស់ប្រទេសនេះ ក៏បានប្រាប់ផងដែរថា ពួកគេបានរកឃើញការបាញ់មីស៊ីលដែលមិនដឹងប្រភេទច្បាស់លាស់។
ហេតុការណ៍នេះបានកើតឡើងក្រោយប៉ុន្មានម៉ោងបន្ទាប់ពីប្រធានាធិបតីអាមេរិក លោក Donald Trump បាននិយាយថា លោកនឹងជួបជាមួយមេដឹកនាំកូរ៉េខាងជើង លោក Kim Jong Un នៅចុងឆ្នាំនេះ។
ហើយជាមួយគ្នានេះ ការបាញ់មីស៊ីលចុងក្រោយបង្អស់នេះ ក៏បានកើតឡើងផងដែរ ខណៈដែលកូរ៉េខាងត្បូង និងសហរដ្ឋអាមេរិក បន្តសមយុទ្ធយោធាដែលគ្រោងនឹងបញ្ចប់នៅថ្ងៃសុក្រ បន្ទាប់ពីមានបញ្ជារបស់លោក Trump ឲ្យកាត់បន្ថយទំហំយ៉ាងច្រើននៃការចូលរួមរបស់សហរដ្ឋអាមេរិក។
ទីក្រុងព្យុងយ៉ាងបានថ្កោលទោសជាយូរមកហើយ ចំពោះសមយុទ្ធរួមគ្នាសហរដ្ឋអាមេរិក-កូរ៉េខាងត្បូងនេះ ដោយចាត់ទុកថា ជាការហាត់សមឈ្លានពាន ដែលជារឿយៗឆ្លើយតបវិញដោយការបាញ់មីស៊ីល៕