អាមេរិកដាក់ទណ្ឌកម្មលើប្រធានតុលាការឧក្រិដ្ឋកម្មអន្តរជាតិ

សហរដ្ឋអាមេរិកនៅថ្ងៃ១៩សីហានេះ បានដាក់ទណ្ឌកម្មប្រឆាំងនឹងប្រធានតុលាការឧក្រិដ្ឋកម្មអន្តរជាតិ (ICC) លោកស្រី Tomoko Akane ជនជាតិជប៉ុន និងមន្ត្រីជាន់ខ្ពស់ម្នាក់ទៀត ដែលជាផ្នែកមួយនៃយុទ្ធនាការរបស់ទីក្រុងវ៉ាស៊ីនតោនប្រឆាំងនឹងអ្វីដែលខ្លួនហៅថាជាស្ថាប័ន «ពុករលួយ និងមាននយោបាយធ្ងន់ធ្ងរ»។

ទីក្រុងវ៉ាស៊ីនតោនក៏បានដាក់ទណ្ឌកម្មលើមេធាវីជាន់ខ្ពស់នៃតុលាការ ICC គឺលោក Abdoulaye Seye ជនជាតិសេណេហ្គាល់ ក្នុងការវាយប្រហារចុងក្រោយរបស់រដ្ឋបាលលោក Trump ប្រឆាំងនឹងតុលាការដែលមានមូលដ្ឋាននៅទីក្រុងឡាអេ។

លោក Marco Rubio រដ្ឋមន្ត្រីការបរទេសសហរដ្ឋអាមេរិកបាននិយាយថា «បុគ្គលទាំងនេះបានចូលរួមដោយផ្ទាល់នៅក្នុងកិច្ចខិតខំប្រឹងប្រែងរបស់ ICC ដើម្បីស៊ើបអង្កេត ចាប់ខ្លួន ឃុំខ្លួន ឬចោទប្រកាន់មន្ត្រីដែលរដ្ឋាភិបាលរបស់ពួកគេមិនបានយល់ព្រមចំពោះយុត្តាធិការរបស់ ICC»។

ជាមួយគ្នានេះ ICC បានឆ្លើយតបថាទណ្ឌកម្មរបស់សហរដ្ឋអាមេរិក «ធ្វើឱ្យខូចដល់នីតិរដ្ឋ»។

តុលាការបាននិយាយនៅក្នុងសេចក្តីថ្លែងការណ៍មួយថា «នៅពេលដែលអ្នកអនុវត្តច្បាប់ត្រូវបានគំរាមកំហែងចំពោះការអនុវត្តច្បាប់ វាគឺជាសណ្តាប់ធ្នាប់ផ្លូវច្បាប់អន្តរជាតិខ្លួនឯងដែលត្រូវបានដាក់ឱ្យស្ថិតក្នុងហានិភ័យ»។

គូសបញ្ជាក់ថា តុលាការ ICC បានបង្កើតឡើងក្នុងឆ្នាំ ២០០២ ដោយកាត់ទោសលើបុគ្គលដែលត្រូវបានចោទប្រកាន់ពីបទឃោរឃៅធ្ងន់ធ្ងរបំផុត និងដើរតួជាជម្រើសចុងក្រោយនៅពេលដែលប្រទេសនានាមិនមានប្រព័ន្ធច្បាប់គ្រប់គ្រាន់ដើម្បីធានាការទទួលខុសត្រូវ។

សហរដ្ឋអាមេរិក ដែលមិនមែនជាភាគីនៃសន្ធិសញ្ញាអន្តរជាតិដែលបានបង្កើត ICC បានដាក់ទណ្ឌកម្មប្រឆាំងនឹងមន្ត្រីមួយចំនួនរបស់តុលាការរួចហើយ។ វិធានការទាំងនេះហាមឃាត់ពួកគេពីការចូលសហរដ្ឋអាមេរិក និងពីការអនុវត្តប្រតិបត្តិការនៅក្នុងប្រព័ន្ធហិរញ្ញវត្ថុរបស់សហរដ្ឋអាមេរិក៕