អ៊ីរ៉ង់ ប្រកាសថាមិនបើកច្រកសមុទ្រ Hormuz ឡើងវិញឡើយ បើអាម៉េរិកមិនធ្វើតាមទីក្រុងតេអេរ៉ង់

ឆ្មាំបដិវត្តន៍អ៊ីរ៉ង់បានទទូចកាលពីថ្ងៃទី៩ ខែសីហាថាពួកគេនឹងមិនបើកច្រកសមុទ្រ Hormuz ឡើងវិញនោះឡើយ រហូតដល់សហរដ្ឋអាមេរិកគោរពតាមបញ្ជីនៃការទាមទារ រួមទាំងការបង់សំណងសម្រាប់ការខូចខាតដោយសារសង្គ្រាម។

ការបិទផ្លូវថាមពលដ៏សំខាន់របស់អ៊ីរ៉ង់បានធ្វើឱ្យសម្ព័ន្ធមិត្តរង្គោះរង្គើ ធ្វើឱ្យទីផ្សារច្របូកច្របល់ និងជំរុញឱ្យតម្លៃហក់ឡើងខ្ពស់ ប៉ុន្តែប្រធានាធិបតីអាមេរិក Donald Trump បាននិយាយកាលពីថ្ងៃអាទិត្យថា លោកកំពុងបន្ថយល្បឿន ក្នុងវិធីសាស្រ្តរបស់លោកទៅកាន់ទីក្រុងតេអេរ៉ង់ ដោយបង្ហាញថា លោកជឿថាលោកអាចរង់ចាំពួកគេតាមសម្រួល។

ទីក្រុងតេអេរ៉ង់ទទូចរក្សាការគ្រប់គ្រងច្រកសមុទ្រ Hormuz បន្ទាប់ពីសង្គ្រាម ហើយចង់គិតថ្លៃសម្រាប់ការឆ្លងកាត់ ដោយវាយប្រហារម្តងហើយម្តងទៀតលើនាវាដែលខ្លួនចោទប្រកាន់ថាកំពុងព្យាយាមឆ្លងកាត់ផ្លូវទឹកដោយខុសច្បាប់។

ការវាយប្រហារនៅក្នុងផ្លូវទឹក ដែលឆ្លងកាត់ដោយសេរីមុនសង្គ្រាម បាននាំឱ្យមានការដួលរលំនៃបទឈប់បាញ់ខែមេសា ហើយក្រុមអ្នកសម្របសម្រួលបានជំរុញឱ្យភាគីទាំងពីរត្រឡប់ទៅរកលក្ខខណ្ឌនៃអនុស្សរណៈខែមិថុនាជាបន្តបន្ទាប់ ដែលបានកំណត់ផ្លូវសម្រាប់ការចរចាសន្តិភាព។

ទីភ្នាក់ងារសារព័ត៌មាន Tasnim របស់អ៊ីរ៉ង់បានរាយការណ៍ថា ក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់ បានដាក់ចេញនូវបញ្ជីលក្ខខណ្ឌសម្រាប់ការបើកច្រកសមុទ្រឡើងវិញកាលពីថ្ងៃសៅរ៍ រួមទាំងការបញ្ចប់សង្គ្រាមនៅគ្រប់ទិសទី បញ្ឈប់ការបិទផ្លូវកំពង់ផែអ៊ីរ៉ង់ពីសំណាក់អាមេរិក ការបញ្ចប់ទណ្ឌកម្ម ការដោះលែងទ្រព្យសម្បត្តិដែលត្រូវបានបង្កក និងសំណងសម្រាប់ការខូចខាតក្នុងសង្គ្រាម៕