ព័ត៌មានអន្តរជាតិ
ការវាយប្រហារដោយយានដ្រូននៅអេហ្ស៊ីបបង្កឱ្យមានការព្រួយបារម្ភផ្នែកសន្តិសុខអំពីការនាំចេញប្រេងតាមព្រែកជីកស៊ុយអេ
(អេហ្ស៊ីប)៖ ការវាយប្រហារដោយយានដ្រូនដែលបានបំផ្លាញនាវាដឹកប្រេងពីរគ្រឿងនៅក្នុងដែនទឹកអេហ្ស៊ីប បានធ្វើឱ្យមានការព្រួយបារម្ភផ្នែកសន្តិសុខថាមពលឡើងវិញនៅព្រែកជីកស៊ុយអេ(Suez) ដែលនៅក្បែរនោះ និងបំពង់បង្ហូរប្រេងពាក់ព័ន្ធ ដែលជាផ្លូវនាំចេញដ៏សំខាន់សម្រាប់ប្រេងអារ៉ាប៊ីសាអ៊ូឌីតចាប់តាំងពីការចាប់ផ្តើមនៃសង្គ្រាមអ៊ីរ៉ង់។
ទោះអ៊ីរ៉ង់ និងសម្ព័ន្ធមិត្តក្រុមហ៊ូទីរបស់ខ្លួនបានបាញ់ប្រហារលើនាវាដឹកប្រេងដែលឆ្លងកាត់ច្រកសមុទ្រ Hormuz និង Bab el-Mandeb ក៏ដោយ ព្រែក Suez និងបំពង់បង្ហូរប្រេង Sumed របស់អេហ្ស៊ីបនៅតែបន្តផ្តល់ផ្លូវនាំចេញដែលមានសុវត្ថិភាព និងឆ្ពោះទៅទិសខាងជើងសម្រាប់ទំនិញថាមពលសមុទ្រក្រហមរបស់អារ៉ាប៊ីសាអ៊ូឌីត។
ខណៈគ្មានភាគីណាមួយអះអាងពីការទទួលខុសត្រូវចំពោះការវាយប្រហារកាលពីថ្ងៃពុធលើនាវាដឹកប្រេងនៅកំពង់ផែ Damietta របស់អេហ្ស៊ីប ដែលមានទីតាំងនៅលើសាខាមួយនៃដីសណ្តទន្លេនីលជិតសមុទ្រមេឌីទែរ៉ាណេ ឬគំរាមកំហែងជាសាធារណៈដល់ព្រែកជីក Suez ហានិភ័យដែលអាចកើតមានចំពោះចំណុចឆ្លងកាត់ដ៏សំខាន់នេះបានបន្ថែមការព្រួយបារម្ភដល់ទីផ្សារសកល។
លោក Saul Kavonic ប្រធានផ្នែកស្រាវជ្រាវថាមពលនៅក្រុមហ៊ុនប្រឹក្សាយោបល់ MST Marquee បានលើកឡើងថា ការឆ្លងកាត់តាមរយៈសមុទ្រក្រហម សូម្បីតែឆ្លងកាត់ផ្លូវទឹកមេឌីទែរ៉ាណេដ៏វែងជាងនេះក៏ដោយ អាចប្រឈមនឹងហានិភ័យ ដែលគំរាមកំហែងដល់ការផ្គត់ផ្គង់ប្រេងរហូតដល់៥លានបារ៉ែលក្នុងមួយថ្ងៃ ដែលបច្ចុប្បន្នអាចឆ្លងកាត់ច្រកសមុទ្រ Hormuz៕
