អាម៉េរិកបានចំណាយលុយដល់ ៣៧,៥ ពាន់លានដុល្លារ វាយប្រហារអ៊ីរ៉ង់

ការវាយប្រហារថ្មីៗរបស់សហរដ្ឋអាម៉េរិកបានបង្កឱ្យមានការការពារដែនអាកាសយ៉ាងម៉ត់ចត់នៅទីក្រុងតេអេរ៉ង់ បន្ទាប់ពីប្រធានាធិបតី ដូណាល់ ត្រាំ បានព្រមានថា លោកមិនទាន់បញ្ចប់សង្គ្រាមជាមួយអ៊ីរ៉ង់ ខណៈអាម៉េរិកបានខាតបង់ទឹកប្រាក់ ៣៧,៥ ពាន់លានដុល្លាររួចទៅហើយ។ នេះបើយោងតាមការផ្សាយរបស់ AFP។

បន្ទាប់ពីការប្រយុទ្ធគ្នាលើច្រកសមុទ្រយុទ្ធសាស្ត្រ Hormuz បាននាំឱ្យមានការបំផ្លាញនៃកិច្ចព្រមព្រៀងបឋម។ យ៉ាងណាក៏ដោយ អ្នកការទូតកំពូលអាម៉េរិក លោក Marco Rubio បានបញ្ជាក់ជាថ្មីថា ខ្លួនមានឆន្ទៈក្នុងការប្រើប្រាស់ការទូតដើម្បីស្វែងរកកិច្ចព្រមព្រៀងជាមួយទីក្រុងតេអេរ៉ង់។

លោក Rubio បានបញ្ជាក់នៅក្នុងកិច្ចប្រជុំរដ្ឋមន្ត្រីអាស៊ានមួយនៅទីក្រុងម៉ានីលថា «បញ្ហាដែលយើងកំពុងប្រឈមមុខនាពេលបច្ចុប្បន្ននេះគឺថា ពួកគេមិនយកចិត្តទុកដាក់ចំពោះការចរចាយ៉ាងម៉ត់ចត់នោះទេ»។

ការវាយប្រហារជុំចុងក្រោយបំផុតនៅមជ្ឈិមបូព៌ារួមមានកងកម្លាំងអាម៉េរិកវាយប្រហារគោលដៅដូចជា «ហេដ្ឋារចនាសម្ព័ន្ធភស្តុភារយោធា» ខណៈដែលប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ពីការវាយប្រហារជុំវិញប្រទេស រួមទាំង Bushehr ដែលជាទីតាំងរោងចក្រថាមពលនុយក្លេអ៊ែរ។

យ៉ាងណាក៏ដោយ លោក Pete Hegseth បានបញ្ជាក់ថាអាម៉េរិកបានចំណាយទឹកប្រាក់កើនឡើងដល់ ៣៧.៥ ពាន់លានដុល្លារ ស្របពេលអ្នករិះគន់ដាក់សំណើរការពារ កុំឱ្យបន្ថែមថវិការាប់សិបពាន់លានដុល្លារសម្រាប់យោធាបន្តទៀត។

ថ្មីៗនេះយោធាអាម៉េរិក បានចាប់ផ្តើមការវាយប្រហារជាបន្តបន្ទាប់លើកទី១១ ប្រឆាំងនឹងអ៊ីរ៉ង់ ដោយខ្លួនបានកំណត់គោលដៅទីតាំងយោធាដើម្បី «ធ្វើឱ្យសមត្ថភាពរបស់អ៊ីរ៉ង់ក្នុងការគំរាមកំហែងដល់ការដឹកជញ្ជូនពាណិជ្ជកម្មនៅក្នុងច្រកសមុទ្រ Hormuz ចុះខ្សោយបន្ថែមទៀត»។

ជាការឆ្លើយតប អ៊ីរ៉ង់បានគំរាមកំហែងសងសឹក ដោយបញ្ជាការយោធា Khatam Al-Anbiya ថាខ្លួននឹង «ចាត់ទុកវាជាការពង្រីកសង្គ្រាមនៅក្នុងតំបន់» ប្រសិនបើការវាយប្រហារបែបនេះត្រូវបានអនុវត្ត ដោយគំរាមកំហែងវាយប្រហារលើ «ផលប្រយោជន៍ទាំងអស់របស់អាម៉េរិក សម្ព័ន្ធមិត្ត និងអ្នកគាំទ្រ»។

ការព្រមាននេះបានកើតឡើងនៅពេលដែលទីក្រុងតេអេរ៉ង់បានពង្រីកការវាយលុករបស់ខ្លួនប្រឆាំងនឹងរដ្ឋឈូងសមុទ្រដែលមានសម្ព័ន្ធមិត្តជាមួយសហរដ្ឋអាម៉េរិក បន្ទាប់ពីសម្ព័ន្ធមិត្ត Houthi របស់ខ្លួនបានគំរាមកំហែងបិទកំពង់ផែអារ៉ាប៊ីសាអូឌីត។

គូសបញ្ជាក់ថា អារ៉ាប៊ីសាអូឌីត និងពួកហ៊ូធីបានបាញ់ប្រហារគ្នាកាលពីសប្តាហ៍មុនជាលើកដំបូងក្នុងរយៈពេលជាច្រើនឆ្នាំ ដោយគំរាមកំហែងដល់បទឈប់បាញ់ឆ្នាំ ២០២២ ប៉ុន្តែពួកឧទ្ទាមភាគច្រើននៅតែខាងក្រៅតំបន់ចាប់តាំងពីអ៊ីស្រាអែល និងសហរដ្ឋអាម៉េរិកបានវាយប្រហារអ៊ីរ៉ង់នៅចុងខែកុម្ភៈ៕