ព័ត៌មានអន្តរជាតិ
អ៊ីស្រាអែល នឹងជីកប្រឡាយលែងសត្វក្រពើជុំវិញពន្ធនាគារ ដែលដាក់អ្នកទោសប៉ាឡេស្ទីន
អ៊ីស្រាអែល កំពុងពិចារណាអនុវត្តសំណើរដ៏ចម្រូងចម្រាសរបស់រដ្ឋមន្ត្រីសន្តិសុខជាតិ លោក Itamar Ben-Gvir ដើម្បីជីកប្រឡាយទឹកហ៊ុំព័ទ្ធពន្ធនាគារឃុំឃាំងដែលដាក់អ្នកទោសប៉ាឡេស្ទីន ជាមួយនឹងការលែងសត្វក្រពើដ៏ច្រើនសន្ធឹកសន្ធាប់។
យោងតាមសារព័ត៌មាន Channel 7 របស់អ៊ីស្រាអែលឱ្យដឹងថ្ងៃទី១៧ខែកក្កដានេះថា រដ្ឋមន្ត្រីការពារបរិស្ថាន លោកស្រី Idit Silman បានចុះហត្ថលេខាលើបទបញ្ជាមួយ ក្នុងការចាត់ថ្នាក់ក្រពើជាសត្វព្រៃដែលត្រូវបានគ្រប់គ្រង អនុញ្ញាតឱ្យស្ថាប័នរដ្ឋាភិបាល រួមទាំងសេវាពន្ធនាគារអ៊ីស្រាអែល រក្សាពួកវានៅក្នុងកន្លែងលក្ខខណ្ឌជាក់លាក់។
ចលនាមួយនេះ នឹងលុបបំបាត់ផ្លូវច្បាប់របស់ប្រទេស ដោយសារពីមុនក្រពើត្រូវបានចាត់ថ្នាក់ជាសត្វព្រៃដែលត្រូវបានការពារ អាចរក្សាទុកបានតែនៅក្នុងសួនសត្វដែលមានអាជ្ញាប័ណ្ណប៉ុណ្ណោះ។ ការផ្លាស់ប្តូរផ្នែកច្បាប់នេះបានធ្វើឡើង បន្ទាប់ពីការជំទាស់របស់អាជ្ញាធរធម្មជាតិ និងឧទ្យានអ៊ីស្រាអែលចំពោះគម្រោងបើក «ពន្ធនាគារក្រពើ»។
យ៉ាងណាក៏ដោយ លោក Ben-Gvir បានបង្ហាញសំណើនេះប្រហែល ៦ខែមុន ដោយអំពាវនាវឱ្យមានពន្ធនាគារដែលមានសន្តិសុខខ្ពស់ ហ៊ុំព័ទ្ធដោយផ្លូវទឹកពោរពេញដោយក្រពើ ដើម្បីរារាំងការប៉ុនប៉ងរត់គេចខ្លួនរបស់អ្នកទោសប៉ាឡេស្ទីន។
គូសបញ្ជាក់ថា ពន្ធនាគារអ៊ីស្រាអែលបានចាប់ផ្តើមពិនិត្យមើលលទ្ធភាពនៃគម្រោងនេះរួចហើយ ខណៈមន្ត្រីអ៊ីស្រាអែលជឿជាក់ថា ប្រឡាយដែលពោរពេញដោយក្រពើអាចកាត់បន្ថយការចំណាយលើការការពារ ខណៈជួយពង្រឹងសន្តិសុខពន្ធនាគារ៕