អតីតរបបសឹកយោធាមីយ៉ាន់ម៉ា បានមកកាន់ទឹកដីឡាវដើម្បីពង្រឹងអំណាច

មេដឹកនាំរដ្ឋប្រហារមីយ៉ាន់ម៉ាដែលបានក្លាយជាប្រធានាធិបតីនៅដើមឆ្នាំនេះ លោក មីន អ៊ុង ឡាំង បានទៅដល់ប្រទេសឡាវនៅព្រឹកថ្ងៃទី៣ ខែកក្កដានេះ ដែលជាដំណើរទស្សនកិច្ចផ្លូវរដ្ឋលើកដំបូងរបស់លោកទៅកាន់ប្រទេសអាស៊ានមួយចាប់តាំងពីទទួលបានតំណែងជាមេដឹកនាំស៊ីវិល។

លោក មីន អ៊ុង ឡាំង បានធ្វើឱ្យប្រទេសមីយ៉ាន់ម៉ាធ្លាក់ចូលទៅក្នុងសង្គ្រាមស៊ីវិលនៅឆ្នាំ ២០២១ នៅពេលដែលលោកបានបញ្ជាឱ្យធ្វើរដ្ឋប្រហារយោធាផ្តួលរំលំរដ្ឋាភិបាលជាប់ឆ្នោតលោកស្រី អ៊ុង សាន ស៊ូជី ដោយឃុំខ្លួនលោកស្រី និងបញ្ចប់ការពិសោធន៍រយៈពេលមួយទសវត្សរ៍ជាមួយលទ្ធិប្រជាធិបតេយ្យ។

លោកបានគ្រប់គ្រងដោយផ្ទាល់ជាប្រមុខយោធារយៈពេលប្រាំឆ្នាំ មុនពេលក្លាយជាប្រធានាធិបតីស៊ីវិលនៅខែមេសា បន្ទាប់ពីរៀបចំការបោះឆ្នោតដែលត្រូវបានរារាំងពីឧទ្ទាម ដោយមិនរាប់បញ្ចូលគណបក្សរបស់លោកស្រី ស៊ូជី និងអ្នកប្រឆាំង។

ក្នុងបរិបទថ្មីនេះ អ្នកវិភាគបានលើកឡើងថា រដ្ឋបាលថ្មីរបស់លោកកំពុងជំរុញឱ្យមានភាពត្រឹមត្រូវជាអន្តរជាតិ រួមទាំងនៅក្នុងប្លុកសមាគមប្រជាជាតិអាស៊ីអាគ្នេយ៍ (អាស៊ាន) ដែលមានសមាជិក ១១ ប្រទេស ដែលភាគច្រើនបានបង្កកប្រទេសមីយ៉ាន់ម៉ាចាប់តាំងពីរដ្ឋប្រហារមក។

គូសបញ្ជាក់ថាលោក មីន អ៊ុង ឡាំង បានទៅដល់ប្រទេសឡាវដោយសុវត្ថិភាព អមដោយភរិយារបស់លោក គឺលោកស្រី គ្យូគ្យូ ឡាំង។

ក្នុងដំណើរទស្សនៈកិច្ចនេះ លោក មីន អ៊ុង ឡាំង នឹងជួបជាមួយប្រធានាធិបតីឡាវ លោក ថងលូន ស៊ីស៊ូលីត និងនាយករដ្ឋមន្ត្រី សុនសៃ ស៊ីផាន់ដូន។ បន្ថែមពីនោះ លោកនឹងចូលរួមក្នុងការផ្លាស់ប្តូរទស្សនៈដោយស្និទ្ធស្នាល និងបើកចំហ ដើម្បីជំរុញការពង្រឹងទំនាក់ទំនងមិត្តភាពដែលមានស្រាប់រវាងប្រទេសទាំងពីរ។

នេះជាដំណើរទស្សនកិច្ចលើកទីបីរបស់លោក មីន អ៊ុង ឡាំង ចាប់តាំងពីឡើងកាន់តំណែងជាប្រធានាធិបតីស៊ីវិល ខណៈកាលពីខែមុន លោកបានធ្វើដំណើរទៅកាន់ប្រទេសឥណ្ឌា និងចិន៕