ចំណុចសំខាន់ៗនៃកិច្ចព្រមព្រៀងបញ្ចប់សង្គ្រាមរវាងអាម៉េរិក និងអ៊ីរ៉ង់

ខាងក្រោមនេះជាចំណុចសំខាន់ៗពីកិច្ចព្រមព្រៀងដែលបានចុះហត្ថលេខារវាងសហរដ្ឋអាម៉េរិក និងអ៊ីរ៉ង់ ដើម្បីបញ្ចប់សង្គ្រាមមជ្ឈិមបូព៌ា ដែលអត្ថបទនេះត្រូវបានផ្សព្វផ្សាយជាសាធារណៈដោយទីក្រុងវ៉ាស៊ីនតោន និងទីក្រុងតេអេរ៉ង់៖

ការបញ្ចប់អរិភាពជាអចិន្ត្រៃយ៍

សហរដ្ឋអាម៉េរិក អ៊ីរ៉ង់ និងសម្ព័ន្ធមិត្តរៀងៗខ្លួន «ប្រកាសបញ្ចប់ប្រតិបត្តិការយោធាជាបន្ទាន់ និងជាអចិន្ត្រៃយ៍លើគ្រប់វិស័យទាំងអស់ រួមទាំងនៅក្នុងប្រទេសលីបង់»។

ភាគីទាំងអស់សន្យាថា «មិនចាប់ផ្តើមសង្គ្រាម ឬប្រតិបត្តិការយោធាណាមួយប្រឆាំងនឹងគ្នាទៅវិញទៅមក និងចៀសវាងការគំរាមកំហែង ឬការប្រើប្រាស់កម្លាំងប្រឆាំងនឹងគ្នាទៅវិញទៅមក និងធានានូវបូរណភាពទឹកដី និងអធិបតេយ្យភាពរបស់ប្រទេសលីបង់។

កិច្ចព្រមព្រៀងចុងក្រោយក្នុងរយៈពេល ៦០ថ្ងៃ

អ៊ីរ៉ង់ និងសហរដ្ឋអាម៉េរិកប្តេជ្ញា «ចរចា និងសម្រេចបានកិច្ចព្រមព្រៀងចុងក្រោយក្នុងរយៈពេលអតិបរមា ៦០ថ្ងៃដោយមានការយល់ព្រមគ្នាទៅវិញទៅមក។

ការដកការបិទផ្លូវរបស់សហរដ្ឋអាម៉េរិក

សហរដ្ឋអាមេរិកនឹងចាប់ផ្តើមដកការបិទផ្លូវរបស់ខ្លួនលើកំពង់ផែអ៊ីរ៉ង់ ដែលខ្លួនបានដាក់ចេញនៅថ្ងៃទី១៣ ខែមេសា ហើយនឹងបញ្ចប់វាក្នុងរយៈពេល ៣០ថ្ងៃ។

សហរដ្ឋអាម៉េរិកក៏សន្យាថានឹង «ដកកងកម្លាំងរបស់ខ្លួនចេញពីតំបន់ជិតសាធារណរដ្ឋអ៊ីស្លាមអ៊ីរ៉ង់ក្នុងរយៈពេល  ៣០ថ្ងៃបន្ទាប់ពីកិច្ចព្រមព្រៀងចុងក្រោយ»។

ការបើកច្រកសមុទ្រ Hormuz ឡើងវិញ

អ៊ីរ៉ង់នឹងខិតខំប្រឹងប្រែងឱ្យអស់ពីសមត្ថភាពដើម្បីធានា «ការឆ្លងកាត់ដោយសុវត្ថិភាពរបស់នាវាពាណិជ្ជកម្មដោយមិនគិតថ្លៃ សម្រាប់រយៈពេល ៦០ ថ្ងៃតែប៉ុណ្ណោះ ពីឈូងសមុទ្រពែរ្សទៅកាន់សមុទ្រអូម៉ង់។ ចរាចរណ៍របស់នាវាពាណិជ្ជកម្មនឹងចាប់ផ្តើមភ្លាមៗ» ហើយនឹងត្រូវបានស្តារឡើងវិញយ៉ាងពេញលេញក្នុងរយៈពេល ៣០​ថ្ងៃ នៅពេលដែលច្រកសមុទ្រ Hormuz ត្រូវបានសម្អាតមីន។

ផែនការ ៣០០ ពាន់លានដុល្លារ

សហរដ្ឋអាម៉េរិក និងដៃគូក្នុងតំបន់របស់ខ្លួននឹងរៀបចំផែនការមួយដែលមានយ៉ាងហោចណាស់ ៣០០ ពាន់លានដុល្លារ សម្រាប់ការកសាងឡើងវិញ និងការអភិវឌ្ឍសេដ្ឋកិច្ចរបស់អ៊ីរ៉ង់។

ការដកទណ្ឌកម្ម

សហរដ្ឋអាម៉េរិកសន្យាថានឹង បញ្ចប់ទណ្ឌកម្មគ្រប់ប្រភេទប្រឆាំងនឹងអ៊ីរ៉ង់ និងធ្វើឱ្យមូលនិធិ និងទ្រព្យសម្បត្តិដែលបង្កករបស់សាធារណរដ្ឋអ៊ីស្លាមអ៊ីរ៉ង់អាចប្រើប្រាស់បានពេញលេញនៅពេលអនុវត្តកិច្ចព្រមព្រៀងនេះ។

ក្រសួងរតនាគារសហរដ្ឋអាម៉េរិកនឹងចេញការលើកលែងសម្រាប់ការនាំចេញប្រេងឆៅ ផលិតផលប្រេងកាត និងនិស្សន្ទវត្ថុរបស់អ៊ីរ៉ង់ និងសេវាកម្មពាក់ព័ន្ធទាំងអស់ រួមទាំងប្រតិបត្តិការធនាគារ ការធានារ៉ាប់រងនិងការដឹកជញ្ជូន ដោយមានប្រសិទ្ធភាពភ្លាមៗ រហូតដល់ទណ្ឌកម្មត្រូវបានលើក។

នុយក្លេអ៊ែរ

អ៊ីរ៉ង់បញ្ជាក់ជាថ្មីថាខ្លួននឹងមិនទិញ ឬអភិវឌ្ឍអាវុធនុយក្លេអ៊ែរទេ។

ការបោះចោលអ៊ុយរ៉ាញ៉ូមដែលចម្រាញ់របស់ទីក្រុងតេអេរ៉ង់នឹងត្រូវបានដោះស្រាយដោយ យន្តការមួយដែលនឹងត្រូវបានព្រមព្រៀងគ្នាទៅវិញទៅមក ក្រោមការត្រួតពិនិត្យរបស់ IAEA។

ដោយរង់ចាំកិច្ចព្រមព្រៀងចុងក្រោយ អ៊ីរ៉ង់នឹង «រក្សាស្ថានភាពបច្ចុប្បន្ននៃកម្មវិធីនុយក្លេអ៊ែររបស់ខ្លួន» ហើយសហរដ្ឋអាម៉េរិក «នឹងមិនដាក់ទណ្ឌកម្មថ្មីណាមួយឡើយ ហើយនឹងមិនដាក់ពង្រាយកងកម្លាំងបន្ថែមនៅក្នុងតំបន់នោះទេ»។

ការចុះហត្ថលេខា

នាយករដ្ឋមន្ត្រីប៉ាគីស្ថាន លោក Shehbaz Sharif ជាអ្នកសម្របសម្រួល បានលើកឡើងថា កិច្ចព្រមព្រៀងនេះត្រូវបានចុះហត្ថលេខាតាមប្រព័ន្ធអេឡិចត្រូនិកនៅថ្ងៃព្រហស្បតិ៍ ម៉ោងនៅអ៊ីស្លាម៉ាបាដ ដោយប្រធានាធិបតីអាម៉េរិក លោក Donald Trump និងមេដឹកនាំអ៊ីរ៉ង់ លោក Masoud Pezeshkian។

ពិធីនេះនឹងត្រូវធ្វើឡើងនៅប្រទេសស្វីសនៅថ្ងៃសុក្រ ដើម្បី «រំលឹកដល់ព្រឹត្តិការណ៍ដ៏សំខាន់នេះ និងចាប់ផ្តើមជាមួយនឹងការចរចាកម្រិតបច្ចេកទេស» នេះបើយោងតាមលោក Sharif៕