អន្តរជាតិ
ថៃ នឹងប្តឹងទៅ WTO និងអាស៊ាន ករណីម៉ាឡេស៊ីមិនទិញបង្គារបស់ខ្លួន
(បាងកក)៖ ប្រទេសថៃបានត្រៀមខ្លួនរួចជាស្រេចដើម្បីដាក់ពាក្យបណ្តឹងនៅអង្គការពាណិជ្ជកម្មពិភពលោក (WTO) និងអាស៊ាន អំពីការផ្អាកជាបណ្ដោះអាសន្នរបស់ប្រទេសម៉ាឡេស៊ីលើការនាំចូលបង្គាថៃ ប្រសិនបើការចរចាទ្វេភាគីមិនអាចដោះស្រាយបញ្ហានេះបាន នេះបើយោងតាមអ្នកនាំពាក្យរដ្ឋាភិបាលថៃ។
យោងតាមលោកស្រី Ratchada Thanadirek បានលើកឡើងថា ក្រសួងពាណិជ្ជកម្មបានណែនាំការិយាល័យទីក្រុងគូឡាឡាំពួររបស់ខ្លួនឱ្យតាមដានការវិវត្តន៍យ៉ាងដិតដល់អំពីសកម្មភាពអាក់អនស្រពោនចិត្តរបស់ថៃ បន្ទាប់ពីការផ្អាកនេះ ដែលចូលជាធរមាននៅថ្ងៃទី១ ខែមិថុនា។
ចលនារបស់ប្រទេសម៉ាឡេស៊ីគឺជាផ្នែកមួយនៃការគ្រប់គ្រងយ៉ាងតឹងរ៉ឹងលើផលិតផលនេសាទពីប្រទេសថៃ។ ដោយម៉ាឡេស៊ីអះអាងថា ប្រភេទសត្វដែលរងផលប៉ះពាល់គឺ បង្គាខ្លាពណ៌ត្នោត (Penaeus esculentus), បង្គាចេក (Fenneropenaeus merguiensis), បង្គាជើងស (Penaeus vannamei), បង្គាខ្លាយក្ស (Penaeus monodon), និងបង្គាពណ៌ខៀវ (Penaeus stylirostris)។
យ៉ាងណាក៏ដោយ រដ្ឋាភិបាលថៃនៅតែប្តេជ្ញាដោះស្រាយបញ្ហានេះតាមរយៈការពិភាក្សាទ្វេភាគី ប្រសិនបើបញ្ហានេះនៅតែមិនទាន់ដោះស្រាយបាន ប្រទេសថៃបានត្រៀមខ្លួនរួចជាស្រេចដើម្បីលើកបញ្ហានេះទៅកាន់អង្គការពាណិជ្ជកម្មពិភពលោក (WTO) និងអាស៊ាន។
លោកនាយករដ្ឋមន្ត្រីថៃ Anutin Charnvirakul បានសម្តែងការព្រួយបារម្ភអំពីផលប៉ះពាល់ដែលអាចកើតមានលើអ្នកចិញ្ចឹមបង្គា ជាពិសេសអ្នកនៅភាគខាងត្បូងប្រទេសថៃ ហើយបានណែនាំភ្នាក់ងារពាក់ព័ន្ធឱ្យទប់ស្កាត់ការធ្លាក់ចុះនៃតម្លៃកសិដ្ឋាន។
គូសបញ្ជាក់ថា ជម្លោះនេះ គឺផ្តើមចេញពីថៃមុន ដែលហាមឃាត់ការនាំចូលត្រីឆ្ពុង ពីម៉ាឡេស៊ី ដោយអះអាងថា រកឃើញសារធាតុគីមីក្នុងត្រីនោះ ទើបម៉ាឡេស៊ី សងសឹកវិញ ដោយហាមឃាត់ ការនាំចូលបង្គាថៃ ចំនួន៥ប្រភេទ ចាប់អនុវត្តនៅថ្ងៃទី១ ខែមិថុនា កន្លងទៅ។
ម៉ាឡេស៊ី គឺជាទីផ្សារបង្គាដ៏សំខាន់មួយរបស់ថៃ ដោយមួយឆ្នាំៗការនាំចេញបង្គាថៃទៅ ម៉ាឡេស៊ី មានបរិមាណចន្លោះពី ១៥ ០០០ ទៅ ២៥ ០០០ តោន បើគិតជាទឹកប្រាក់ គឺស្មើនឹងប្រហែលពី ៦០ ទៅ ៩០ លានដុល្លារអាមេរិក៕
ដោយ៖ ចិន្តា ទីទិ
