អន្តរជាតិ
រញ្ជួយដីកម្រិត ៧.៨ រ៉ិចទ័រវាយប្រហារប្រទេសហ្វីលីពីន ខណៈអាជ្ញាធរព្រមានពីរលកយក្សស៊ូណាមិ
រញ្ជួយដីកម្រិត ៧.៨ រ៉ិចទ័របានវាយប្រហារភាគខាងត្បូងប្រទេសហ្វីលីពីនកាលពីថ្ងៃចន្ទ ដោយបានសម្លាប់មនុស្សយ៉ាងហោចណាស់ម្នាក់ អគារជាច្រើនដួលរលំ និងបង្កឱ្យមានការព្រមានអំពីរលកយក្សស៊ូណាមិនៅទូទាំងតំបន់។
អាជ្ញាធរនៅប្រទេសហ្វីលីពីន និងឥណ្ឌូនេស៊ីបានជំរុញឱ្យប្រជាជននៅតំបន់ឆ្នេរសមុទ្រដែលរងផលប៉ះពាល់ផ្លាស់ទៅកន្លែងខ្ពស់ជាបន្ទាន់ បន្ទាប់ពីរញ្ជួយដីនៅឯនាយសមុទ្របានវាយប្រហារប្រហែល ២៤ គីឡូម៉ែត្រភាគខាងលិចនៃខេត្ត Sarangani នៃកោះ Mindanao នេះបើយោងតាមការស្ទង់មតិភូគព្ភសាស្ត្រសហរដ្ឋអាម៉េរិក។
លោក Robert Dagon ពលបាលឯកនៃប៉ូលីសក្រុង General Santos បានឱ្យដឹងថា គិតត្រឹមពេលនេះមានអ្នកស្លាប់ម្នាក់ និងរបួសបួននាក់ និងអគារមួយចំនួនបានដួលរលំ។
មជ្ឈមណ្ឌលព្រមានរលកយក្សស៊ូណាមិប៉ាស៊ីហ្វិកបានព្រមានបន្ទាន់ថា រលកយក្សស៊ូណាមិអាចកើតឡើង «ក្នុងរយៈពេលបីម៉ោងខាងមុខ» តាមបណ្តោយឆ្នេរសមុទ្រនៃប្រទេសហ្វីលីពីន ឥណ្ឌូនេស៊ី ប៉ាឡាវ តៃវ៉ាន់ និងប៉ាពួញូហ្គីណេ។
ទន្ទឹមគ្នានេះ អាជ្ញាធរជប៉ុនបានចេញការព្រមានអំពីរលកយក្សស៊ូណាមិដាច់ដោយឡែកសម្រាប់តំបន់ឆ្នេរសមុទ្រប៉ាស៊ីហ្វិករបស់ខ្លួន ដោយព្យាករណ៍ថារលកយក្សស៊ូណាមិនឹងវាយប្រហារតំបន់ផ្សេងៗគ្នាចាប់ពីម៉ោង ១១:៣០ ព្រឹក។
ការរញ្ជួយដីកើតឡើងស្ទើរតែរាល់ថ្ងៃនៅក្នុងប្រទេសហ្វីលីពីន ដែលមានទីតាំងនៅលើ «រង្វង់ភ្លើង» ប៉ាស៊ីហ្វិក ដែលជាខ្សែកោងនៃសកម្មភាពរញ្ជួយដីខ្លាំង ដែលលាតសន្ធឹងពីប្រទេសជប៉ុនឆ្លងកាត់អាស៊ីអាគ្នេយ៍ និងឆ្លងកាត់អាងប៉ាស៊ីហ្វិក។
យោងតាមតួលេខរបស់រដ្ឋាភិបាល ការរញ្ជួយដីទាំងនេះបានកើតឡើងបន្ទាប់ពីការរញ្ជួយដីកម្រិត ៦.៩ រ៉ិចទ័រកាលពីប៉ុន្មានថ្ងៃមុន ដែលបានសម្លាប់មនុស្ស ៧៦នាក់ និងបំផ្លាញ ឬខូចខាតអគារចំនួន ៧២,០០០ នៅក្នុងខេត្តសេប៊ូ នៅកណ្តាលប្រទេសហ្វីលីពីន៕
ដោយ៖ ចិន្តា ទីទិ
