ឈ្វេងយល់ពីឥទ្ធិពលមីស៊ីលអន្តរទ្វីប Oreshnik ដែលរុស្ស៊ីបានបាញ់ទៅលើអ៊ុយក្រែន

(វិមានក្រឹមឡាំង)៖ កាលពីយប់ថ្ងៃទី២៤ ឧសភាម្សិលម៉ិញនេះ រុស្ស៊ីបានវាយប្រហារទីក្រុងគៀវ និងតំបន់ជុំវិញដោយយន្តហោះគ្មានមនុស្សបើក និងមីស៊ីលរាប់រយគ្រាប់ ដែលជាការបាញ់ផ្លោងដ៏ខ្លាំងក្លាបំផុតមួយនៅក្នុងទីក្រុងចាប់តាំងពីការចាប់ផ្តើមនៃសង្គ្រាមរយៈពេលបួនឆ្នាំ ដោយបានបាញ់មីស៊ីលល្បឿនលឿនជាងសំឡេង Oreshnik តែម្តងគត់ក្នុងខែវិច្ឆិកា ឆ្នាំ២០២៤។ ដូចនេះ តើមីស៊ីល Oreshnik មានលក្ខណៈពិសេស និងជះឥទ្ធិពលខ្លាំងបែបណាដល់ផែនដីទាំងមូល?

មីស៊ីល Oreshnik អាចផ្ទុកក្បាលគ្រាប់ច្រើនគ្រាប់ដែលមានសមត្ថភាពវាយប្រហារគោលដៅផ្សេងៗគ្នាក្នុងពេលដំណាលគ្នា ជាធម្មតាត្រូវបានផ្សារភ្ជាប់ជាមួយនឹងមីស៊ីលបាលីស្ទិកអន្តរទ្វីបរយៈចម្ងាយឆ្ងាយ (ICBM)។

កាលពីខែធ្នូ ឆ្នាំ២០២៤ មន្ត្រីអាម៉េរិកម្នាក់បានអះអាងថា អាវុធនេះមិនត្រូវបានគេមើលឃើញថាជាឧបករណ៍ផ្លាស់ប្តូរហ្គេមនៅលើសមរភូមិនោះទេ ដោយហៅវាថាមានលក្ខណៈពិសោធន៍ ហើយថា រុស្ស៊ីទំនងជាមានអាវុធប្រភេទនេះតិចតួចប៉ុណ្ណោះ។

តើការវាយប្រហារនេះជះផលប៉ះពាល់បែបណា?

ផលប៉ះពាល់បំផ្លិចបំផ្លាញនៅក្នុងខែមករាមានកម្រិតស្រាល ដោយសារតែមីស៊ីលនេះ ដូចនៅឆ្នាំ២០២៤ នៅពេលដែលរុស្ស៊ីបាញ់វាជាលើកដំបូង ត្រូវបានបំពាក់ដោយក្បាលគ្រាប់ក្លែងក្លាយតែប៉ុណ្ណោះ មិនមែនគ្រឿងផ្ទុះទេ។ វាបានវាយប្រហារសហគ្រាសរដ្ឋមួយនៅភាគខាងលិចទីក្រុង Lviv ដែលបណ្តាលឱ្យមានការបំផ្លិចបំផ្លាញតិចតួចនៃរចនាសម្ព័ន្ធបេតុង និងបន្សល់ទុកនូវរណ្ដៅនៅក្បែរនោះ។ នេះបើយោងតាមមន្ត្រីជាន់ខ្ពស់អ៊ុយក្រែនម្នាក់បានអះអាង។

ហេតុអ្វីបានជាត្រូវប្រើក្បាលគ្រាប់ក្លែងក្លាយ?

អ្នកជំនាញសន្តិសុខបានលើកឡើងថា ចំណុចសំខាន់នៃសកម្មភាពរបស់ទីក្រុងមូស្គូមិនមែនដើម្បីបង្កការបំផ្លិចបំផ្លាញដ៏ធំនោះទេ ប៉ុន្តែដើម្បីផ្ញើសញ្ញាព្រមាននៅចំណុចសំខាន់មួយនៅក្នុងសង្គ្រាម ថាប្រទេសរុស្ស៊ីមានមីស៊ីលលឿនជាងសំឡេងដ៏មានអានុភាព និងមានសមត្ថភាពនុយក្លេអ៊ែរ ដែលអាចប្រើដើម្បីវាយប្រហារអ៊ុយក្រែន ឬសមាជិកអឺរ៉ុបនៃអង្គការណាតូ។

ទន្ទឹមគ្នានេះ សម្ព័ន្ធមិត្តអឺរ៉ុបរបស់ទីក្រុងគៀវក៏បានឲ្យដឹងដែរថា ទីក្រុងមូស្គូកំពុងព្យាយាមបំភិតបំភ័យពួកគេឱ្យចេញពីការគាំទ្រអ៊ុយក្រែន។ រុស្ស៊ីខឹងសម្បារចំពោះផែនការរបស់អង់គ្លេស និងបារាំងដែលបានប្រកាសនៅសប្តាហ៍នេះក្នុងការបញ្ជូនកងទ័ពទៅការពារអ៊ុយក្រែន ក្នុងករណីមានបទឈប់បាញ់ក្នុងសង្គ្រាម។

ដោយឡែក​ អ្នកជំនាញនយោបាយមួយចំនួនបានវិភាគថា ទីក្រុងមូស្គូក៏អាចចង់បង្ហាញកម្លាំងយោធារបស់ខ្លួនផងដែរ បន្ទាប់ពីមានការវាយប្រហារទៅលើកិត្យានុភាពរបស់ខ្លួនចាប់តាំងពីដើមឆ្នាំនេះ ជាពិសេសសហរដ្ឋអាម៉េរិកបានផ្តួលរំលំសម្ព័ន្ធមិត្តរបស់លោកពូទីន គឺប្រធានាធិបតី Nicolas Maduro នៃប្រទេសវេណេស៊ុយអេឡា និងការរឹបអូសនាវាដឹកប្រេងដែលមានទង់ជាតិរុស្ស៊ីនៅអាត្លង់ទិកខាងជើង។

តើការបាញ់ប្រហារ ORESHNIK បន្ថែមទៀតទំនងជាកើតឡើងដែរឬទេ?

អ្នកជំនាញវាយតម្លៃថា រុស្ស៊ីមានស្តុកមីស៊ីលប្រភេទនេះតិចតួចបំផុត ហើយនឹងប្រើប្រាស់វាក្នុងកម្រិតតិច។ មានន័យថារុស្ស៊ីទំនងជានឹងចៀសវាងការបាញ់បន្ថែមទៀត ប្រសិនបើខ្លួនវិនិច្ឆ័យថា សាររបស់ខ្លួនត្រូវបានលោកខាងលិចបានដឹងឮពីឥទ្ធិពលអាវុធមួយនេះ៕