ដំណើរទស្សនកិច្ចទីក្រុងប៉េកាំងទំនងជាមិនអាចបន្ធូរបន្ថយបញ្ហារបស់លោក ត្រាំ នៅអាម៉េរិកបានទេ!

(ទីក្រុងប៉េកាំង​)៖ ទីក្រុងប៉េកាំងក្នុងរយៈពេល២ថ្ងៃនេះ ជាកន្លែងដែលប្រធានាធិបតី ដូណាល់ ត្រាំ មានក្តីសុខបំផុតក្នុងឆាកជីវិតដែលត្រូវបានស្វាគមន៍ដោយក្មេងៗគ្រវីទង់ជាតិ ក្រុមតន្រ្តី និងផ្លូវដើរលេងដែលមានផ្កាតម្រៀបជាជួរ។ ប៉ុន្តែទិដ្ឋភាពនេះត្រូវបានគ្របដណ្ដប់ដោយភាពចលាចលទូទាំងពិភពលោកដែលបង្កឡើងដោយសង្គ្រាមរបស់លោក ត្រាំ លើអ៊ីរ៉ង់។

តាមការផ្សាយរបស់រ៉យទ័រនៅថ្ងៃទី១៤ឧសភានេះថា ប្រធានាធិបតីចិន ស៊ី ជីនពីង បានស្វាគមន៍លោក ដូណាល់ ត្រាំ មកកាន់ប្រទេសចិនជាមួយនឹងភាពរុងរឿងរបស់អធិរាជក្នុងសម័យបច្ចុប្បន្ន រួមទាំងអាហារពេលល្ងាចឯកជននៅវិមានហាមឃាត់ ជាកន្លែងរបស់ថ្នាក់ដឹកនាំបុរាណ។ ទិដ្ឋភាពនេះបានផ្តល់នូវការសម្រាកមួយរយៈពេលខ្លីពីបញ្ហានយោបាយរបស់លោក ត្រាំនៅអាម៉េរិក។

លោក ត្រាំ បានត្រលប់មកទីក្រុងប៉េកាំងវិញនៅសប្តាហ៍នេះក្នុងដំណើរទស្សនកិច្ចលើកដំបូងរបស់លោកក្នុងរយៈពេលជិតមួយទសវត្សរ៍។ លោក ស៊ី បានដើរលើកំរាលព្រំក្រហមម្តងទៀត ដោយដើរឆ្លងកាត់ទីលានយោធាដ៏រំភើប និងទៅទស្សនាប្រាសាទបុរាណដែលមានអាយុកាលរាប់សតវត្ស ហើយសន្យាថានឹងធ្វើការរួមគ្នាដើម្បីដោះស្រាយបញ្ហារបស់ពិភពលោក។

ទោះជាយ៉ាងណាក៏ដោយ ក្នុងចំណោមបដិសណ្ឋារកិច្ច ក៏មានការព្រមានយ៉ាងចំៗចំពោះលោក ត្រាំ អំពីតៃវ៉ាន់ផងដែរ។ លោក ស៊ី បានព្រមានថា ការបរាជ័យនៃការទូតអាចនាំឱ្យមាន «ស្ថានភាពគ្រោះថ្នាក់ខ្លាំង»។

ដំណើរទស្សនកិច្ចនៅប្រទេសចិន គឺជាការលេងល្បែងនយោបាយសម្រាប់លោក ត្រាំ ដែលកំពុងស្វែងរកកិច្ចព្រមព្រៀងដើម្បីពន្លឿនពាណិជ្ជកម្ម និងការវិនិយោគរវាងប្រទេសទាំងពីរ រួមទាំងការលក់យន្តហោះ Boeing បន្ថែមទៀតទៅឱ្យប្រទេសចិន។ នាយកប្រតិបត្តិកំពូលៗមួយចំនួនរបស់ពិភពលោកបានអមដំណើរលោក ត្រាំ ដើម្បីបង្ហាញអាជីវកម្មរបស់ពួកគេ។ ទិដ្ឋភាពនេះបានបង្ហាញឱ្យឃើញថា លោក ត្រាំ ហាក់ចង់បានជំនួយពីប្រទេសចិនក្នុងការដោះស្រាយសង្គ្រាមជាមួយអ៊ីរ៉ង់។

ដំណើរទស្សនកិច្ចទៅកាន់ប្រទេសចិនផ្តល់ឱកាសឱ្យលោក ត្រាំ ផ្លាស់ប្តូរប្រធានបទដ៏ក្តៅគគុកពីសង្គ្រាម បញ្ហានយោបាយ និងតម្លៃសាំងឡើងខ្ពស់ទៅជាឱកាសកិច្ចព្រមព្រៀងល្អៗសម្រាប់ជនជាតិអាម៉េរិក។

ប៉ុន្តែកិច្ចព្រមព្រៀងណាមួយដែលសម្រេចបាននឹងមិនធ្វើឱ្យសង្គ្រាមជាមួយអ៊ីរ៉ង់ថយចុះ នោះទេ។ បន្ទាប់ពីដំណើរទស្សនកិច្ចនេះ លោក ត្រាំ នឹងត្រលប់ទៅរកការពិតដ៏លំបាកមួយនៅក្នុងស្រុកវិញ ដែលពោរពេញទៅដោយសង្គ្រាម៕