លោក ត្រាំ៖ មិនត្រូវការជំនួយពីចិនដើម្បីបញ្ចប់សង្គ្រាមអ៊ីរ៉ង់ទេ

(វ៉ាស៊ីនតោន)៖ ប្រធានាធិបតីអាម៉េរិក ដូណាល់ ត្រាំ បានអះអាងថាលោកមិនដែលគិតថាត្រូវការជំនួយពីចិនដើម្បីបញ្ចប់សង្គ្រាមជាមួយអ៊ីរ៉ង់នោះឡើយ ទោះបីជាក្តីសង្ឃឹមសម្រាប់កិច្ចព្រមព្រៀងសន្តិភាពយូរអង្វែងបានថយចុះ ហើយទីក្រុងតេអេរ៉ង់បានរឹតបន្តឹងការគ្រប់គ្រងរបស់ខ្លួនលើច្រកសមុទ្រហ័រមូសក៏ដោយ។ នេះបើយោងតាមអង្គភាពរ៉យទ័រចេញផ្សាយនៅថ្ងៃទី១២ ខែឧសភានេះ។

មុនពេលកិច្ចប្រជុំកំពូលដែលមានហានិភ័យខ្ពស់នៅទីក្រុងប៉េកាំង លោក ត្រាំ បាននិយាយថា លោកមិនគិតថាលោកនឹងត្រូវជួលប្រធានាធិបតីចិន ស៊ី ជីនពីង ដើម្បីដោះស្រាយជម្លោះនេះទេ។

ជាងមួយខែបន្ទាប់ពីបទឈប់បាញ់ដ៏ផុយស្រួយបានចូលជាធរមាន ភាគីទាំងពីរមិនមានវឌ្ឍនភាពលើកិច្ចព្រមព្រៀងដើម្បីបញ្ចប់អរិភាពនោះទេ។

ទន្ទឹមនឹងនេះ អ៊ីរ៉ង់ហាក់ដូចជាបានពង្រឹងការគ្រប់គ្រងរបស់ខ្លួនលើច្រកសមុទ្រហ័រមូស ដោយកាត់ផ្តាច់កិច្ចព្រមព្រៀងជាមួយអ៊ីរ៉ាក់ និងប៉ាគីស្ថាន ដើម្បីដឹកជញ្ជូនប្រេង និងឧស្ម័នធម្មជាតិរាវពីតំបន់នេះ។

យ៉ាងណាក៏ដោយ ប្រទេសចិន ដែលរក្សាទំនាក់ទំនងជាមួយអ៊ីរ៉ង់ និងនៅតែជាអ្នកទិញប្រេងដ៏សំខាន់មិនបានជំទាស់នឹងការកំណត់លក្ខណៈផ្សេងៗរបស់អ៊ឺរ៉ង់នោះទេ។

គូសបញ្ជាក់ថា លោក ត្រាំ គ្រោងនឹងពិភាក្សាអំពីសង្គ្រាមជាមួយលោក ស៊ី ក្នុងអំឡុងពេលកិច្ចប្រជុំដែលបានគ្រោងទុកចាប់ពីថ្ងៃព្រហស្បតិ៍ដល់ថ្ងៃសុក្រ ហើយត្រូវបានគេរំពឹងទុកយ៉ាងទូលំទូលាយថានឹងលើកទឹកចិត្តប្រទេសចិនឱ្យបញ្ចុះបញ្ចូលទីក្រុងតេអេរ៉ង់ឱ្យធ្វើកិច្ចព្រមព្រៀងជាមួយទីក្រុងវ៉ាស៊ីនតោនដើម្បីបញ្ចប់ជម្លោះ។

គោលដៅរបស់ម៉េរិកគឺទាមទាររួមមានការបញ្ចប់កម្មវិធីនុយក្លេអ៊ែររបស់អ៊ីរ៉ង់ និងការដកការរឹតបន្តឹងនៅលើច្រកសមុទ្រ។ ទន្ទឹមគ្នានេះ អ៊ីរ៉ង់បានឆ្លើយតបជាមួយនឹងការទាមទាររបស់ខ្លួន រួមទាំងសំណងសម្រាប់ការខូចខាតដោយសង្គ្រាម ការដកការបិទផ្លូវរបស់អាម៉េរិក និងការបញ្ចប់សង្គ្រាមនៅគ្រប់ទិសទី រួមទាំងប្រទេសលីបង់ ជាកន្លែងដែលអ៊ីស្រាអែលជាសម្ព័ន្ធមិត្តរបស់អាម៉េរិកកំពុងប្រយុទ្ធប្រឆាំងនឹងពួកសកម្មប្រយុទ្ធហេសបូឡាដែលគាំទ្រដោយអ៊ីរ៉ង់ ប៉ុន្តែលោក ត្រាំ បានច្រានចោលជំហរទាំងនោះថាជា «សំរាម»ទៅវិញ៕