អន្តរជាតិ
ជនភៀសសឹកលីបង់ប្រមាណ ១.៦លាននាក់ កំពុងជួបវិបត្តិធ្ងន់ធ្ងរ
ប្រទេសលីបង់ កំពុងរងការវាយប្រហារពីអ៊ីស្រាអែលស្ទើរតែរៀងរាល់ថ្ងៃ ដោយសារតែហេតុផលចង់បំផ្លាញ់ក្រុមហេសបូឡាដែលជាបក្សសម្ព័ន្ធរបស់អ៊ីរ៉ង់ និងហេតុផលផ្សេងទៀតរបស់មេដឹកនាំអ៊ីស្រាអែល។ ប្រជាជនលីបង់ចំនួន ១.៦លាននាក់ ដែលត្រូវបានផ្លាស់ទីលំនៅ កំពុងប្រឈមនឹងវិបត្តិមនុស្សធម៌យ៉ាងខ្លាំង ដោយកន្លែងស្នាក់នៅមានភាពតូចចង្អៀត កង្វះខាតសម្ភារៈចាំបាច់ជាមូលដ្ឋាន និងការទទួលបានសេវាថែទាំសុខភាពមានកម្រិតខ្សោយ ដោយ ៨៧% ពឹងផ្អែកលើការព្យាបាលតាមផ្ទះ។
មនុស្សទាំងអស់នោះ កំពុងស៊ូទ្រាំនឹងរបួសផ្លូវចិត្តដ៏ធ្ងន់ធ្ងរ ដោយផ្លាស់ទីលំនៅដោយបង្ខំ មិនអាចត្រឡប់ទៅកន្លែងសុវត្ថិភាពវិញបាន។ នេះបើយោងតាមគេហទំព័រគណៈកម្មាធិការជួយសង្គ្រោះអន្តរជាតិ(IRC) ចេញផ្សាយចុងខែមេសា ឆ្នាំ២០២៦។
ខាងក្រោមនេះជាបញ្ហាធំៗដែលជនភៀសសឹកលីបង់កំពុងជួបបប្រទះ៖
១. កង្វះខាតជម្រក៖ ជម្រកផ្លូវការមានមនុស្សច្រើន បង្ខំឱ្យមនុស្សផ្សេងទៀតចូលទៅក្នុងកន្លែងសាធារណៈ រថយន្ត ឬអគារចង្អៀតណែន មិនមានសុវត្ថិភាព ឬមិនទាន់សាងសង់រួច ដោយប្រឈមមុខនឹងការគំរាមកំហែងបណ្តេញចេញពីម្ចាស់ទីតាំង។
២. សុខភាព និងអនាម័យ៖ កង្វះខាតលទ្ធភាពទទួលបានទឹកស្អាត អាហារ និងថ្នាំពេទ្យ រួមជាមួយនឹងស្តង់ដារអនាម័យមិនល្អ បង្កើនហានិភ័យសុខភាព។ ស្ត្រីមានផ្ទៃពោះប្រឈមមុខនឹងគ្រោះថ្នាក់សម្រាលកូនដោយគ្មានការថែទាំត្រឹមត្រូវ ហើយមនុស្សស្រីជាច្រើនប្រឈមនឹងកង្វះអនាម័យ អំឡុងពេលមករដូវ។
៣. ការរំខានដល់ការអប់រំ៖ កុមារជាង ១៥០ ០០០នាក់ កំពុងប្រឈមនឹងការរំខានដល់ការអប់រំ ដោយសារសាលារៀនជាច្រើនត្រូវបានប្រើជាជម្រកស្នាក់នៅ។
៤. សុវត្ថិភាព និងការការពារ៖ មានអត្រាខ្ពស់នៃអំពើហិង្សាផ្អែកលើយេនឌ័រ (GBV) ភាពតានតឹងផ្លូវចិត្តធ្ងន់ធ្ងរ ជាពិសេសក្នុងចំណោមស្ត្រី កុមារ និងក្រុមងាយរងគ្រោះ។
៥. ការដួលរលំសេដ្ឋកិច្ច៖ ការបាត់បង់ប្រាក់ចំណូលយ៉ាងខ្លាំង ការជួលមានតម្លៃខ្ពស់ និងវិបត្តិសេដ្ឋកិច្ចលីបង់កាន់តែអាក្រក់ ធ្វើឱ្យគ្រួសារគ្មានលទ្ធភាពទិញសម្ភារៈចាំបាច់។
៦. ភាពងាយរងគ្រោះរបស់ជនអន្តោប្រវេសន៍៖ សហគមន៍ជនអន្តោប្រវេសន៍ប្រឈមមុខនឹងហានិភ័យធ្ងន់ធ្ងរនៃការកេងប្រវ័ញ្ច និយោជកបោះបង់ចោល បាត់បង់សិទ្ធិចូលប្រើឯកសារផ្សេងៗ និងជួបប្រទះនឹងការរើសអើង ឬការដកចេញពីជំនួយ។
៧. ការថយចុះលទ្ធភាពទទួលបានជំនួយមនុស្សធម៌៖ ជម្លោះកើនឡើង អសន្តិសុខ និងការវាយប្រហារលើបុគ្គលិកពេទ្យបានរារាំងសមត្ថភាពរបស់ភ្នាក់ងារមនុស្សធម៌ក្នុងការជួយដល់អ្នកដែលត្រូវការជំនួយ៕
