នាយក​រដ្ឋមន្រ្តីកាតា ហៅ​នាយករដ្ឋមន្ត្រីអ៊ីស្រាអែល ថាជា«ឧក្រិដ្ឋជនសង្គ្រាម»​ ជុំវិញ​ការវាយប្រហារនៅហ្គាហ្សា

នាយក​រដ្ឋមន្ត្រី​ប្រទេស​កាតា លោក Sheikh Mohammed bin Abdulrahman Al Thani បាន​ហៅនាយក​រដ្ឋមន្ត្រី​អ៊ីស្រាអែល លោក បេន​ចាមីន ណេតាន់​យ៉ាហ៊ូ ថាជា «​ឧក្រិដ្ឋ​ជន​សង្គ្រាម» ខណៈលោក​​សង្កត់ធ្ងន់ថា ទីក្រុងដូហា​​កំពុង​ខិតខំ​ប្រឹងប្រែងសម្របសម្រួល​​ស្ថានការណ៍តាម​ដែល​អាច​ធ្វើ​ទៅ​បាន​​ ដើម្បីស្តារសន្តិភាពឡើងវិញ។

នាយក​រដ្ឋមន្ត្រី​ប្រទេស​កាតា​​ បានឆ្លើយទៅកាន់អ្នកសារព័ត៌មានថា « ពិតណាស់! អ្វីដែល​បាន​ប្រព្រឹត្តឡើង​នៅ​តំបន់ហ្គាហ្សា គឺជាឧក្រិដ្ឋកម្ម​សង្គ្រាម ហើយអ្នកណា​ដែល​បាន​ធ្វើ​រឿង​នេះ គឺជាឧក្រិដ្ឋជន​សង្គ្រាម»។

លោកបន្ថែមថា «​ មន្ទីរពេទ្យត្រូវ​បានគេ (អ៊ីស្រាអែល​) ​កំណត់ជា​គោលដៅ​វាយ​ប្រហារ សាលារៀនក៏ត្រូវបាន​គេកំណត់​ជាគោលដៅ​វាយប្រហារដែរ។ ទោះ​បីជាមានហេតុផល ឬការលើកឡើង​បែបណាក៏​ដោយ ក៏គ្មានអ្វីអាចយក​មកធ្វើជាលេស​ ដើម្បីបង្ហាញថា​ទង្វើនោះ​ជា​រឿងត្រឹមត្រូវ​ឡើយ»។

នាយក​រដ្ឋ​មន្រ្តី​ប្រទេស​កាតា​ក៏បាន​ចោទប្រកាន់​ លោក ណេតាន់​យ៉ាហ៊ូ ថា បាន​វាយប្រហារប្រទេស​កាតា​តាម​រយៈ​ឆាក​នយោបាយ ដើម្បីបង្វែរ​ចំណាប់អារម្មណ៍​ចេញពីសកម្មភាព​​​របស់រដ្ឋាភិបាលរបស់​​​​ខ្លួន​។

ទោះបីជាយ៉ាងណាក៏ដោយ នាយករដ្ឋមន្ត្រីរូបនោះ បានថ្កោលទោស​​ជាថ្មី​ ចំពោះការវាយ​ប្រហាររបស់​អ៊ីស្រាអែល​ទៅលើ​ទីក្រុង​ដូហា​ កាលពីថ្ងៃទី៩ ខែកញ្ញា ឆ្នាំ ២០២៥ ​ដោយ​កំណត់គោលដៅ​លើមន្ត្រី​ក្រុមហាម៉ាស ខណៈប្រទេស​កាតាកំពុង​ ចូលរួម​សម្របសម្រួល។ ការវាយប្រហារនោះ​បានសម្លាប់​សមាជិកក្រុមហាម៉ាសចំនួន ៥នាក់ និងមន្ត្រីសន្តិសុខកាតា​ម្នាក់។

ទន្ទឹមគ្នានេះ ប្រទេសកាតា​នឹងបន្តផ្តល់​អាទិភាព​ផ្នែក​ការទូត ហើយការចរចា​ឬទំនាក់ទំនង​នៅពីក្រោយ​ឆាក នៅ​តែជាមធ្យោបាយដ៏មានប្រសិទ្ធភាព​បំផុត​ក្នុងការសម្រេចបាន​នូវ​វឌ្ឍនភាព៕