ព័ត៌មានអន្តរជាតិ
នាយករដ្ឋមន្ត្រីកាតា៖ សង្គ្រាមមជ្ឈិមបូព៌ា ធ្វើឱ្យសេដ្ឋកិច្ចក្នុងតំបន់រង្គោះរង្គើយ៉ាងខ្លាំង
ដោយសេដ្ឋកិច្ចធ្លាក់ចុះបណ្តាលមកពីសង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ នាយករដ្ឋមន្ត្រីកាតា លោក Sheikh Mohammed bin Abdulrahman bin Jassim Al Thani បានអំពាវនាវឱ្យបណ្តារដ្ឋនានាគោរពអធិបតេយ្យភាព ដែលជាលក្ខខណ្ឌចាំបាច់សម្រាប់សន្តិសុខនៅតំបន់មជ្ឈិមបូព៌ា ព្រមទាំងព្រមានពីវដ្តនៃភាពតានតឹងកាន់តែខ្លាំង។
បើយោងតាមសារព័ត៌មាន Al Jazeera ផ្សាយនៅថ្ងៃទី២០ ខែកញ្ញាថា លោក Sheikh Mohammed បានពណ៌នាពីផលប៉ះពាល់ផ្នែកសេដ្ឋកិច្ច បណ្តាលមកពីជម្លោះរវាងសហរដ្ឋអាមេរិក-អ៊ីស្រាអែល លើប្រទេសអ៊ីរ៉ង់ថា ប្រៀបដូចជា គ្រោះរញ្ជួយដីមួយ ដែលមានរលក រាលដាលហួសពីព្រំដែននៃតំបន់មជ្ឈិមបូព៌ា ហើយបង្កជាបញ្ហាប្រឈមដល់សន្តិសុខ និងស្ថិរភាព។
លោកបន្តថា « អំឡុងមានវិបត្តិ ការសន្ទនាស្ទើរតែទាំងអស់បានចាប់ផ្តើមដោយប្រធានបទស្តីពីសន្តិសុខ និងការកាត់បន្ថយភាពតានតឹង បន្ទាប់មកបានងាកទៅរកបញ្ហាការផ្គត់ផ្គង់ថាមពល និងផ្លូវដឹកជញ្ជូនតាមផ្លូវសមុទ្រ ខណៈផែនការវិនិយោគរបស់យើង នៅតែបន្តដំណើរការ។ ទាំងនេះគឺជាទម្រង់ផ្សេងៗគ្នានៃសំណួរតែមួយ។ ពេលអ្វីៗជាច្រើនត្រូវបានរំខាន តើមានអ្វីខ្លះដែលយើងនៅតែអាចពឹងផ្អែកបាន?»
លោកបន្ថែមថា « ប្រទេសកាតាបានឆ្លងកាត់ការសាកល្បងដែលប៉ះពាល់ដល់មូលដ្ឋានគ្រឹះសេដ្ឋកិច្ច និងសន្តិសុខរបស់ប្រទេស ប៉ុន្តែជម្លោះ កំពុងបន្តកើតមានក្នុងតំបន់នេះ កំពុងរងផលប៉ះពាល់។ សន្តិសុខដ៏ស្ថិតស្ថេរមិនអាចកសាងឡើង តាមរយៈការរៀបចំដែលទុកឱ្យរដ្ឋណាមួយប្រឈមមុខនឹងអសន្តិសុខជាអចិន្ត្រៃយ៍នោះទេ។ យើងត្រូវតែដោះស្រាយប្រភពនៃភាពតានតឹង និងកសាងទំនុកចិត្ត»៕