ភូមិគ្រឹះកណ្តាលក្រុងទេសចរ Bangkok ក្លាយជាមជ្ឈមណ្ឌល Online Scams ជម្រិតទារប្រាក់ពីជនជាតិជប៉ុន

(ក្រុងបាងកក)៖ ភូមិគ្រឹះមួយកន្លែងក្នុងទីក្រុងបាងកក ប្រទេសថៃ ត្រូវបានក្រុមជនបរទេសមួយក្រុមបានជួលក្នុងតម្លៃជាង ២៧,០០០ ដុល្លារ ក្នុងមួយខែ ដើម្បីបើកប្រតិបត្តិការមជ្ឈមណ្ឌលឆបោកតាមទូរស័ព្ទ (Call Center) ជម្រិតទារប្រាក់ពីជនជាតិជប៉ុន។

យោងតាមកាសែតថៃ Bangkok Post បានផ្សាយថា នគរបាលអន្តោប្រវេសន៍ បានចុះបង្ក្រាប និងឃាត់ខ្លួននៅយប់ថ្ងៃពុធ នៅភូមិគ្រឹះពីរជាន់មួយកន្លែង លើផ្លូវ Ekachai 112 ក្នុងខណ្ឌ Bang Bon បន្ទាប់ពីទទួលបានតម្រុយពីប្រជាពលរដ្ឋ ដែលសង្ស័យលើវត្តមានជនបរទេសយ៉ាងច្រើនសន្ធឹកសន្ធាប់ចេញចូលមិនប្រក្រតី។ ប្រតិបត្តិការនេះបានឈានទៅដល់ការឃាត់ខ្លួនជនសង្ស័យសរុប ១៦ នាក់ ក្នុងនោះមានបុរសជនជាតិចិន ជប៉ុន និងតៃវ៉ាន់ចំនួន ១៥ នាក់ ព្រមទាំងបុរសជនជាតិថៃម្នាក់។

ភូមិគ្រឹះនោះ ក្រុមឆបោកបានតុបតែងឱ្យមានរូបរាងដូចជាអធិការដ្ឋាននគរបាលជប៉ុនបេះបិទ។

ក្នុងប្រតិបត្តិការនោះ អាជ្ញាធរប្រមូលបានវត្ថុតាងជាច្រើនរួមមាន ស្គ្រីបសន្ទនាជាភាសាជប៉ុន ឯកសណ្ឋានក្លែងក្លាយ ប័ណ្ណសម្គាល់ខ្លួន និងផ្លាកសញ្ញានគរបាលជប៉ុន ខណៈដែលជាន់ផ្ទាល់ដីត្រូវបានរៀបចំជាបន្ទប់ខារ៉ាអូខេ និងបន្ទប់លេងល្បែងបៀរ (Poker)។

គូសបញ្ជាក់ថា ក្រុម Online Scams បានប្រើប្រាស់បន្ទប់ដែលតុបតែងដូចប៉ុស្តិ៍ប៉ូលីសទាំងនោះ ធ្វើការហៅចេញជាវីដេអូ (Video Call) ទៅកាន់ជនរងគ្រោះនៅប្រទេសជប៉ុន ដោយបន្លំខ្លួនធ្វើជានគរបាល ហើយប្រាប់ទៅគោលដៅថា ប្រតិបត្តិការហិរញ្ញវត្ថុរបស់ពួកគេមានភាពសង្ស័យ តម្រូវឱ្យវេរប្រាក់មកកាន់ពួកគេដើម្បីធ្វើការផ្ទៀងផ្ទាត់៕