វៀតណាម និងថៃ ប្តេជ្ញាពង្រឹងកិច្ចសហប្រតិបត្តិការឱ្យកាន់តែស៊ីជម្រៅ ក្នុងអំឡុងពេលនៃដំណើរទស្សនកិច្ចជាប្រវត្តិសាស្ត្ររបស់ស្តេចថៃ

(ក្រុងហាណូយ)៖ អគ្គលេខាធិការបក្ស និងជាប្រធានរដ្ឋវៀតណាម លោក To Lam បានជួបពិភាក្សាការងារជាមួយព្រះមហាក្សត្រថៃ Maha Vajiralongkorn Phra Vajiraklaochaoyuhua និងព្រះមហាក្សត្រិយានី Suthida Bajrasudhabimalalakshana នៅទីក្រុងហាណូយ កាលពីព្រឹកថ្ងៃទី១៥ ខែកញ្ញានេះ។

ក្នុងឱកាសនៃដំណើរទស្សនកិច្ចផ្លូវរដ្ឋមកកាន់ប្រទេសវៀតណាម ភាគីទាំងពីរបានសង្កត់ធ្ងន់លើសារៈសំខាន់ជាប្រវត្តិសាស្ត្រនៃដំណើរទស្សនកិច្ចនេះ ដែលជាដំណើរទស្សនកិច្ចលើកដំបូងរបស់ព្រះមហាក្សត្រថៃក្នុងរយៈពេល ៥០ឆ្នាំ ចាប់តាំងពីប្រទេសទាំងពីរបានបង្កើតទំនាក់ទំនងការទូតនៅឆ្នាំ ១៩៧៦។ ដោយបានចាត់ទុកព្រឹត្តិការណ៍នេះថាជាព្រឹត្តិការណ៍ដ៏សំខាន់មួយនៅក្នុងទំនាក់ទំនងមិត្តភាពប្រពៃណីដ៏ល្អប្រសើររវាងវៀតណាម និងថៃ ជាពិសេសបន្ទាប់ពីការដំឡើងកម្រិតទំនាក់ទំនងទ្វេភាគីទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ» នៅឆ្នាំ ២០២៥។

អំឡុងពេលទទួលដំណើរទស្សនកិច្ចនោះ អគ្គលេខាធិការ និងជាប្រធានរដ្ឋ លោក Lam បានសម្តែងការអបអរសាទរចំពោះព្រះរាជាណាចក្រថៃ លើសមិទ្ធផលដ៏លេចធ្លោដែលសម្រេចបានក្រោមព្រះរាជកិច្ចដឹកនាំដ៏ឈ្លាសវៃរបស់ព្រះមហាក្សត្រ ទាំងផ្នែកស្ថិរភាព និងការអភិវឌ្ឍសេដ្ឋកិច្ច-សង្គម ដោយរក្សាបាននូវឋានៈរបស់ប្រទេសថៃជាមហាអំណាចសេដ្ឋកិច្ចដ៏សំខាន់មួយនៅអាស៊ីអាគ្នេយ៍ និងជាមជ្ឈមណ្ឌលទេសចរណ៍ឈានមុខគេមួយរបស់ពិភពលោក។ លោកក៏បានវាយតម្លៃខ្ពស់ចំពោះតួនាទីរបស់ព្រះមហាក្សត្រ និងព្រះរាជវង្សានុវង្ស ក្នុងការលើកកម្ពស់ឯកភាពជាតិ ការរក្សាស្ថិរភាព ការជំរុញការអភិវឌ្ឍសហគមន៍ និងការលើកកម្ពស់គុណភាពជីវិតរបស់ប្រជាជន។

មេដឹកនាំវៀតណាមបានបញ្ជាក់ថា ប្រទេសទាំងពីរនឹងបន្តសហការគ្នា គាំទ្រការអភិវឌ្ឍរបស់គ្នាទៅវិញទៅមក និងរួមចំណែកដល់សន្តិភាព ស្ថិរភាព និងកំណើននៅក្នុងតំបន់។

ជាមួយគ្នានេះ ព្រះមហាក្សត្រថៃ បានសម្តែងព្រះទ័យរីករាយដែលបានយាងមកកាន់ប្រទេសវៀតណាមជាថ្មីម្តងទៀត និងបានវាយតម្លៃខ្ពស់ចំពោះវឌ្ឍនភាពរបស់ប្រទេសនេះក្នុងការអភិវឌ្ឍជាតិ និងការលើកកម្ពស់កម្រិតជីវភាពរស់នៅរបស់ប្រជាជន។ ព្រះអង្គបានចាត់ទុកដំណើរទស្សនកិច្ចនេះថាជាឱកាសមួយដើម្បីពង្រឹងទំនាក់ទំនងទ្វេភាគី និងជំរុញកិច្ចសហប្រតិបត្តិការសម្រាប់ការអភិវឌ្ឍទៅវិញទៅមក ដោយបញ្ជាក់ថា ព្រះអង្គ និងព្រះរាជវង្សានុវង្សថៃ នៅតែបន្តប្តេជ្ញាចិត្តយ៉ាងមុតមាំក្នុងការថែរក្សាទំនាក់ទំនងរវាងប្រទេសទាំងពីរ និងប្រជាជននៃប្រទេសទាំងពីរ ព្រមទាំងពង្រឹងកិច្ចសហប្រតិបត្តិការវៀតណាម-ថៃលើគ្រប់វិស័យ ដើម្បីផលប្រយោជន៍ និងការអភិវឌ្ឍរួមរបស់ប្រទេសទាំងពីរ។ ព្រះមហាក្សត្របានសង្កត់ធ្ងន់ថា ទំនាក់ទំនងដ៏ល្អប្រសើររវាងវៀតណាម និងថៃ នឹងរួមចំណែកយ៉ាងសំខាន់ដល់សន្តិភាព ស្ថិរភាព និងការអភិវឌ្ឍរួមនៅក្នុងតំបន់។

ទន្ទឹមគ្នានេះ មេដឹកនាំទាំងពីរបានវាយតម្លៃខ្ពស់ចំពោះវឌ្ឍនភាពជាវិជ្ជមាននៃទំនាក់ទំនងវៀតណាម-ថៃក្នុងរយៈពេល ៥០ ឆ្នាំកន្លងមកនេះ ដែលបានវិវត្តពីទំនាក់ទំនងមិត្តភាពជិតខាង ទៅជាភាពជាដៃគូយុទ្ធសាស្ត្រនៅឆ្នាំ ២០១៣ និងបានដំឡើងកម្រិតទៅជាភាពជាដៃគូយុទ្ធសាស្ត្រគ្រប់ជ្រុងជ្រោយនៅឆ្នាំ ២០២៥។ ភាគីទាំងពីរក៏បានឯកភាពគ្នាបន្តពង្រឹងទំនុកចិត្តផ្នែកនយោបាយ តាមរយៈការរក្សាការផ្លាស់ប្តូរទស្សនកិច្ច និងទំនាក់ទំនងនៅគ្រប់កម្រិត ការប្រើប្រាស់យន្តការសហប្រតិបត្តិការប្រកបដោយប្រសិទ្ធភាព និងការសម្របសម្រួលដើម្បីអនុវត្តភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-ថៃឱ្យទទួលបានជោគជ័យ។

មេដឹកនាំទាំងពីរបានសម្តែងទំនុកចិត្តថា ដំណើរទស្សនកិច្ចផ្លូវរដ្ឋមកកាន់ប្រទេសវៀតណាមរបស់ព្រះមហាក្សត្រ និងព្រះមហាក្សត្រីថៃ នឹងជួយពង្រឹងបន្ថែមទៀតនូវមិត្តភាព និងទំនុកចិត្តផ្នែកនយោបាយរវាងប្រទេសទាំងពីរ ក៏ដូចជាការយល់ដឹងគ្នាទៅវិញទៅមករវាងប្រជាជននៃប្រទេសទាំងពីរ។ ដំណើរទស្សនកិច្ចនេះក៏នឹងបង្កើតកម្លាំងចលករថ្មីសម្រាប់ភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-ថៃ ឱ្យមានការអភិវឌ្ឍកាន់តែស៊ីជម្រៅ ជាក់ស្តែង ប្រកបដោយប្រសិទ្ធភាព និងនិរន្តរភាព ព្រមទាំងរួមចំណែកកសាងទំនាក់ទំនងសហប្រតិបត្តិការដ៏ល្អប្រសើរគំរូមួយរវាងវៀតណាម និងថៃ៕