អង្គការសហប្រជាជាតិ និងនេប៉ាល់ព្រមានអំពីការគំរាមកំហែងអាកាសធាតុបន្ទាប់ពីទឹកជំនន់ដ៏សាហាវសម្លាប់មនុស្សជិត ៣០០០នាក់

រដ្ឋមន្ត្រីការបរទេសនេប៉ាល់ និងប្រធានអាកាសធាតុអង្គការសហប្រជាជាតិកាលពីថ្ងៃសៅរ៍ទី២៩សីហាននេះ បានព្រមានអំពីការគំរាមកំហែងកាន់តែខ្លាំងឡើងពីការឡើងកំដៅផែនដីដល់តំបន់ហិម៉ាឡៃយ៉ា ខណៈដែលក្រុមអ្នកជួយសង្គ្រោះកំពុងប្រណាំងប្រជែងគ្នាដើម្បីស្វែងរកមនុស្សរាប់ពាន់នាក់ដែលបាត់ខ្លួនបន្ទាប់ពីទឹកជំនន់យ៉ាងខ្លាំងតាមបណ្តោយព្រំដែនជាមួយប្រទេសចិន។

មជ្ឈមណ្ឌលស្ទង់ភូមិសាស្ត្រសហរដ្ឋអាមេរិកបាននិយាយថា គ្រោះមហន្តរាយនៅជិតព្រំដែនរយៈកម្ពស់ខ្ពស់នេះ បណ្តាលមកពីការដួលរលំផ្ទាំងទឹកកក ដែលបានបញ្ជូនកម្ទេចកម្ទីយ៉ាងច្រើនទៅខាងក្រោម ដោយមានមនុស្សជិត ៣,០០០ នាក់បាត់ខ្លួន និង ៦៨២ នាក់ត្រូវបានបញ្ជាក់ថាស្លាប់។

ខណៈពេលដែលមូលហេតុពិតប្រាកដនៃការដួលរលំមិនទាន់ច្បាស់លាស់ ការប្រែប្រួលអាកាសធាតុកំពុងបណ្តាលឱ្យផ្ទាំងទឹកកករលាយទូទាំងពិភពលោក ដែលបង្កើនហានិភ័យនៃគ្រោះមហន្តរាយបែបនេះ។

ទន្ទឹមគ្នានេះ រដ្ឋមន្ត្រីការបរទេសនេប៉ាល់ Shisir Khanal បាននិយាយតាមទូរស័ព្ទជាមួយសមភាគីចិនលោក Wang Yi ដោយយល់ព្រមបង្កើនការចែករំលែក «ទិន្នន័យជលសាស្ត្រជាក់ស្តែង» នេះបើយោងតាមសេចក្តីថ្លែងការណ៍មួយ។

នៅក្នុងសេចក្តីថ្លែងការណ៍របស់ក្រសួងការបរទេសចិន លោក Wang ថា ទីក្រុងប៉េកាំងបាន «ចែករំលែកព័ត៌មានសំខាន់ៗជាមួយប្រទេសនេប៉ាល់ រួមទាំងរូបភាពតំបន់គ្រោះមហន្តរាយ ទិន្នន័យផ្កាយរណប និងជលសាស្ត្រ ក៏ដូចជាការព្រមានជាមុនអំពីបឹងរបាំងខាងលើ»។

លោក បានបន្ថែមថា «ប្រទេសចិន និងនេប៉ាល់ត្រូវបានចងភ្ជាប់ដោយភ្នំ និងទន្លេ ចែករំលែកវាសនារួម»។

យ៉ាងណាម៉ិញ លោក Khanal មុននេះបានប្រាប់អ្នកយកព័ត៌មានថា ប្រទេសនេប៉ាល់ត្រូវការការស្រាវជ្រាវបន្ថែមទៀតដើម្បី «យល់ពីសក្ដានុពលប្រែប្រួលនៃប្រព័ន្ធអេកូឡូស៊ីហិម៉ាឡៃយ៉ា» និងហានិភ័យដែលពួកគេបង្កឡើងចំពោះប្រទេសដែលគ្មានឆ្នេរសមុទ្រ ដែលហ៊ុំព័ទ្ធដោយប្រទេសឥណ្ឌា និងចិន។

នោះមិនត្រឹមតែរួមបញ្ចូលហានិភ័យ «ចំពោះប្រទេសនេប៉ាល់ និងសហគមន៍ខាងក្រោមប៉ុណ្ណោះទេ ប៉ុន្តែថែមទាំងចំពោះប្រទេសជិតខាងភាគខាងជើងរបស់យើង គឺប្រទេសចិនផងដែរ»។

ផ្ទាំងទឹកកកហិម៉ាឡៃយ៉ា ដែលផ្តល់ទឹកដ៏សំខាន់ដល់មនុស្សជិតពីរពាន់លាននាក់ កំពុងរលាយលឿនជាងមុន នៅពេលដែលភពផែនដីឡើងកំដៅ ដែលធ្វើឱ្យសហគមន៍ប្រឈមនឹងគ្រោះមហន្តរាយដែលមិនអាចទាយទុកជាមុនបាន និងចំណាយច្រើន៕