ម៉ាឡេស៊ីនឹងបញ្ជូនពលរដ្ឋមីយ៉ាន់ម៉ាប្រមាណ ១៥០០នាក់ត្រឡប់ទៅស្រុកវិញនៅខែកញ្ញា

រដ្ឋាភិបាលម៉ាឡេស៊ីបានប្រកាសកាលពីថ្ងៃទី២៧សីហានេះថា ប្រទេសម៉ាឡេស៊ីបានបញ្ចប់ដំណាក់កាលដំបូងនៃកម្មវិធីធ្វើមាតុភូមិនិវត្តន៍ដោយស្ម័គ្រចិត្តដែលពាក់ព័ន្ធនឹងជនជាតិមីយ៉ាន់ម៉ាដែលមានសិទ្ធិ ដោយមានមនុស្សជិត ១,៥០០ នាក់ត្រូវបានគេរំពឹងថានឹងវិលត្រឡប់មកស្រុកកំណើតវិញនៅថ្ងៃទី២៩ ខែកញ្ញា។

នាយករដ្ឋមន្ត្រី អាន់វ៉ា អ៊ីប្រាហ៊ីម បានប្រកាសកាលពីខែកក្កដាថា ប្រទេសមីយ៉ាន់ម៉ាបានយល់ព្រមទទួលយកសមាជិកជនជាតិភាគតិចរ៉ូហ៊ីងយ៉ាចំនួន ៥,០០០ នាក់ដែលត្រូវបានធ្វើទុក្ខបុកម្នេញ ក្នុងការជំរុញការធ្វើមាតុភូមិនិវត្តន៍ដ៏កម្រមួយ ដែលបានបង្កឱ្យមានការព្រួយបារម្ភពីក្រុមសិទ្ធិមនុស្ស។

ប្រទេសម៉ាឡេស៊ីទទួលជនភៀសខ្លួន និងអ្នកស្វែងរកសិទ្ធិជ្រកកោនជាង ២១៥,០០០ នាក់ដែលបានចុះបញ្ជីជាមួយទីភ្នាក់ងារជនភៀសខ្លួនរបស់អង្គការសហប្រជាជាតិ រួមទាំងជនជាតិរ៉ូហ៊ីងយ៉ាជាង ១២៦,០០០ នាក់មកពីប្រទេសមីយ៉ាន់ម៉ា ដែលជាសហគមន៍ជនភៀសខ្លួនធំបំផុត។

ជាមួយគ្នានេះ ក្រសួងមហាផ្ទៃម៉ាឡេស៊ីបានចេញសេចក្តីថ្លែងការណ៍មួយថា «ដំណាក់កាលដំបូងនៃកម្មវិធីធ្វើមាតុភូមិនិវត្តន៍ដោយស្ម័គ្រចិត្តនឹងធ្វើឡើងនៅថ្ងៃទី២៩ ខែកញ្ញា ដែលពាក់ព័ន្ធនឹងជនជាតិមីយ៉ាន់ម៉ាចំនួន ១,៤៧៦ នាក់ ដែលត្រូវបានកំណត់អត្តសញ្ញាណដោយរដ្ឋាភិបាលមីយ៉ាន់ម៉ាតាមរយៈកំណត់ចំណាំការទូត»។

ក្រសួងមហាផ្ទៃម៉ាឡេស៊ីបញ្ជាក់ថា «ដំណើរការ​ធ្វើមាតុភូមិនិវត្តន៍នឹងប្រើប្រាស់នាវាចម្បាំងកងទ័ពជើងទឹកមីយ៉ាន់ម៉ាពីរគ្រឿង និងនាវាមន្ទីរពេទ្យមួយគ្រឿង»។

ក្រសួងបាននិយាយថា បុគ្គលចំនួន ៤.០០៨ នាក់នឹងឆ្លងកាត់កម្មវិធីសម្រាប់ជនភៀសខ្លួនដែលបានចុះឈ្មោះ ខណៈដែល ៥.០០០ នាក់ផ្សេងទៀតនឹងឆ្លងកាត់ការធ្វើមាតុភូមិនិវត្តន៍ដោយស្ម័គ្រចិត្ត ដូចដែលបានព្រមព្រៀងគ្នាដោយរដ្ឋាភិបាលមីយ៉ាន់ម៉ា។

ប្រទេសម៉ាឡេស៊ី ដែលជាជម្រករបស់ជនភៀសខ្លួនធំជាងគេមួយនៅអាស៊ីអាគ្នេយ៍ មិនមែនជាប្រទេសចុះហត្ថលេខាលើអនុសញ្ញាជនភៀសខ្លួនឆ្នាំ ១៩៥១ ទេ ហើយមិនទទួលស្គាល់ឋានៈជាជនភៀសខ្លួនជាផ្លូវការទេ។

គូសបញ្ជាក់ថា ជនជាតិរ៉ូហ៊ីងយ៉ាភាគច្រើនជាក្រុមមូស្លីម បានរត់គេចខ្លួនពីប្រទេសមីយ៉ាន់ម៉ា ក្នុងអំឡុងពេលបង្ក្រាបដោយយោធាដ៏ឃោរឃៅមួយក្នុងឆ្នាំ ២០១៧៕