ព័ត៌មានអន្តរជាតិ
អាមេរិក ប្រកាសផ្អាកសម្ភាសន៍ផ្តល់ទិដ្ឋាការអន្តោប្រវេសន៍នៅទូទាំងពិភពលោក ជាបណ្តោះអាសន្ន
ក្រសួងការបរទេសសហរដ្ឋអាមេរិក បានលុបចោលការណាត់ជួបសម្ភាសន៍ទិដ្ឋាការអន្តោប្រវេសន៍ទូទាំងពិភពលោក ប៉ុន្តែទិដ្ឋាការរយៈពេលខ្លីផ្សេងទៀតមិនមានបញ្ហានោះទេ។
អ្នកនាំពាក្យក្រសួងការបរទេសសហរដ្ឋអាមេរិក បានបញ្ជាក់នៅថ្ងៃទី២៦ ខែសីហា ថាការណាត់ជួបលើរឿងទិដ្ឋាការអន្តោប្រវេសន៍ ជាធម្មតារួមបញ្ចូលការសម្ភាសន៍រវាងបេក្ខជននិងមន្ត្រីកុងស៊ុល កំពុងត្រូវបានកែសម្រួល ដើម្បីបណ្តុះបណ្តាលមន្ត្រីការទូត។ ពេលណាមានការផ្លាស់ប្តូរកាលវិភាគសម្ភាសន៍ទិដ្ឋាការ ស្ថានទូត និងស្ថានកុងស៊ុលនឹងជូនដំណឹងដល់បេក្ខជនដោយផ្ទាល់។
អ្នកនាំពាក្យបានគូសបញ្ជាក់ថា ស្ថានទូត និងស្ថានកុងស៊ុលសហរដ្ឋអាមេរិក នៅជុំវិញពិភពលោក ឈប់កំណត់ពេលសម្ភាសន៍ជាមួយបេក្ខជនទិដ្ឋាការអន្តោប្រវេសន៍តែប៉ុណ្ណោះ តែមិនប៉ះពាល់ដល់ទិដ្ឋាការរយៈពេលខ្លីដូចជាការធ្វើដំណើរ ការសិក្សា អាជីវកម្ម ឬការងារបណ្តោះអាសន្នឡើយ។
គួរបញ្ជាក់ថា ទិដ្ឋាការអន្តោប្រវេសន៍សហរដ្ឋអាមេរិករួមមាន ប្រភេទសំខាន់ៗដូចជា ការឧបត្ថម្ភពីគ្រួសារ ការងារ ឬអន្តោប្រវេសន៍វិនិយោគ។ ទិដ្ឋាការទាំងនេះអនុញ្ញាតឱ្យអ្នកដាក់ពាក្យសុំស្នាក់នៅក្នុងសហរដ្ឋអាមេរិករយៈពេលយូរ។
ចាប់តាំងពីវិលត្រឡប់មកកាន់អំណាចវិញកាលពីឆ្នាំមុន ប្រធានាធិបតីសហរដ្ឋអាមេរិក លោក ដូណាល់ ត្រាំ បានរឹតបន្តឹងគោលនយោបាយអន្តោប្រវេសន៍ ដោយធ្វើការវាយឆ្មក់លើជនអន្តោប្រវេសន៍ដែលគ្មានឯកសារ និងរឹតត្បិតការចូលសហរដ្ឋអាមេរិកដោយស្របច្បាប់។
សេតវិមានបានបញ្ជាក់នៅថ្ងៃទី ២៥ ខែសីហា ថា ក្រសួងការបរទេសសហរដ្ឋអាមេរិកនឹងលុបចោលទិដ្ឋាការរយៈពេលខ្លីចំនួន ២០០ ០០០ ចេញចន្លោះឆ្នាំ ២០១៦ និង ២០២៦ សម្រាប់មនុស្សកំពុងស្វែងរកសិទ្ធិជ្រកកោននៅសហរដ្ឋអាមេរិក ដោយហៅថា ជាការលុបចោលទិដ្ឋាការដ៏ធំបំផុតក្នុងប្រវត្តិសាស្ត្រ៕