ព័ត៌មានទូទៅ
មេដឹកនាំមីយ៉ាន់ម៉ានឹងបំពេញទស្សកិច្ចកម្ពុជា ខណៈការរិះគន់កាន់កក្រើកឡើង
មេដឹកនាំមីយ៉ាន់ម៉ា លោក មីន អ៊ុងឡាំង នឹងបំពេញទស្សនកិច្ចផ្លូវការមកកាន់កម្ពុជា នាដើមខែកញ្ញាខាងមុខនេះ «ដើម្បីពង្រឹងទំនាក់ទំនងទ្វេភាគី»។ ទស្សនកិច្ចនេះធ្វើឡើងបន្ទាប់ពីលោកបញ្ចប់បានបេសកកម្មនៅសហព័ន្ធរុស្ស៊ីជួបជាមួយលោក វ្លាឌីមៀ ពូទីន ខណៈអ្នកវិភាគមើលឃើញថា មេដឹកនាំរូបនេះកំពុងព្យាយាមឲ្យពិភពលោកទទួលស្គាល់លោកជាមេដឹកនាំស្របច្បាប់របស់មីយ៉ាន់ម៉ា។
ដំណឹងអំពីទស្សនកិច្ចរបស់លោក មីន អ៊ុងឡាំង មកកម្ពុជា ត្រូវបានបញ្ជាក់ដោយទំព័រហ្វេសប៊ុករបស់ព្រឹទ្ធសភា ក្នុងពេលដែលលោក គុយ សុផល រដ្ឋមន្ត្រីក្រសួងព្រះបរមរាជវាំង និងលោក ឈិន កេតនា អនុប្រធានអចិន្ត្រៃយ៍ និងជាអគ្គលេខាធិការគណៈកម្មាធិការជាតិរៀបចំបុណ្យជាតិ-អន្តរជាតិ ចុះពិនិត្យទីកន្លែងសម្រាប់ត្រៀមរៀបចំទទួលស្វាគមន៍លោក មីន អ៊ុងឡាំង។
យោងតាមលោក ជា ធីរិទ្ធ អ្នកនាំពាក្យប្រធានព្រឹទ្ធសភា បានឱ្យដឹងតាមរយៈអង្គភាពភ្នំពេញផុសថា ដំណើរទស្សនកិច្ចរបស់មេដឹកនាំមីយ៉ាន់ម៉ានេះគឺ «ជាការពង្រឹងបន្ថែមទៀតនូវចំណងមិត្តភាពរវាងកម្ពុជា និងមីយ៉ាន់ម៉ា ឲ្យកាន់តែល្អប្រសើរ។ កិច្ចសហប្រតិបត្តិការរវាងប្រទេសទាំងពីរមានភាពចាំបាច់ដែលត្រូវការគ្នាទៅវិញទៅមក ដើម្បីផលប្រយោជន៍ទៅវិញទៅមក»។
យ៉ាងណាក៏ដោយ ដំណើរទស្សកិច្ចរបស់លោក មីន អ៊ុងឡាំង ទៅកាន់ប្រទេសនានាដូចជា ឥណ្ឌា ចិន ឡាវ ថៃ និងរុស្ស៊ី តែងរងការរិះគន់ពីក្រុមសិទ្ធិមនុស្ស និងក្រុមអ្នកគាំទ្រលទ្ធិប្រជាធិបតេយ្យ ព្រោះបញ្ហាការរំលោភសិទ្ធិមនុស្ស បណ្តាលឱ្យស្លាប់ជនស៊ីវិល ១០ម៉ឺននាក់ ចាប់តាំងពីការធ្វើរដ្ឋប្រហារទម្លាក់លោកស្រី អ៊ុងសាន ស៊ូជី កាលពីឆ្នាំ២០២១៕