ព័ត៌មានអន្តរជាតិ
៤១ប្រទេស ជំរុញឱ្យមហាអំណាចនុយក្លេអ៊ែរ ជូនដំណឹង២៤ម៉ោងមុនបាញ់សាកល្បង
៤១ប្រទេស ក្នុងនោះមានសហរដ្ឋអាមេរិក ជប៉ុន កាណាដា អាល្លឺម៉ង់ និងហ្វីលីពីនជាដើម បានអំពាវនាវឱ្យប្រទេសដែលមានអាវុធនុយក្លេអ៊ែរគោរពនូវពិធីសារជូនដំណឹងជាមុនយ៉ាងតឹងរ៉ឹង សម្រាប់ការសាកល្បងមីស៊ីលបាលីស្ទិករយៈចម្ងាយឆ្ងាយ ដោយព្រមានថា ការបាញ់បង្ហោះដោយមិនបានប្រកាសជាមុន បង្កគ្រោះថ្នាក់ដល់សន្តិភាពក្នុងតំបន់ និងសន្តិសុខពិភពលោក។ នេះបើយោងតាមសារព័ត៌មាន Middle East Monitor ផ្សាយនៅថ្ងៃទី១២ ខែសីហា ឆ្នាំ២០២៦នេះ។
សេចក្តីថ្លែងការណ៍រួមមួយថ្លែងក្នុងសន្និសីទស្តីពីការរំសាយអាវុធនៅទីក្រុងហ្សឺណែវ និងចេញផ្សាយដោយបេសកកម្មសហរដ្ឋអាមេរិកប្រចាំអង្គការអន្តរជាតិ ប្រទេសហត្ថលេខីបានគូសបញ្ជាក់ពីក្តីបារម្ភកាន់តែខ្លាំងឡើង ជុំវិញការរីកសាយអាវុធមីស៊ីល និងបានជំរុញឱ្យប្រកាន់ខ្ជាប់នូវយន្តការតម្លាភាព ជាពិសេសក្រមប្រតិបត្តិទីក្រុងឡាអេប្រឆាំងនឹងការរីកសាយអាវុធមីស៊ីលបាលីស្ទិក(HCOC)។
សេចក្តីថ្លែងការណ៍នោះលើកឡើងថា «ការធ្វើតេស្តមីស៊ីលបាលីស្ទិក ដែលមានសមត្ថភាពនុយក្លេអ៊ែរដោយគ្មានការជូនដំណឹងជាមុន និងព័ត៌មានលម្អិតគ្រប់គ្រាន់គឺមានគ្រោះថ្នាក់ រំខានដល់សន្តិភាព និងសន្តិសុខរបស់ប្រទេសពាក់ព័ន្ធ នៅជិតការសាកល្បងទាំងនោះ»។ ដោយបន្ថែមថា ការខកខានមិនអនុវត្តតាមការអនុវត្តស្តង់ដារនៃការដោះស្រាយជម្លោះ បង្កើនហានិភ័យនៃការគណនាខុស និងធ្វើឱ្យប៉ះពាល់ដល់ស្ថិរភាពពិភពលោក។
សេចក្តីថ្លែងការណ៍នេះធ្វើឡើងបន្ទាប់ពីប្រទេសចិននិយាយកាលពីខែមុនថា ខ្លួនបានធ្វើការសាកល្បងបាញ់មីស៊ីលយុទ្ធសាស្ត្រពីនាវាមុជទឹកនុយក្លេអ៊ែរដោយជោគជ័យ ប៉ុន្មានម៉ោង បន្ទាប់ពីខ្លួនជូនដំណឹងដល់ប្រទេសប៉ាស៊ីហ្វិកជាច្រើនអំពីការសាកល្បងគ្រោងទុក។
ការបាញ់នេះ បានសម្គាល់ការសាកល្បងមីស៊ីលយុទ្ធសាស្ត្រលើកទីពីររបស់ប្រទេសចិន ចាប់តាំងពីបាញ់មីស៊ីលផ្លោងអន្តរទ្វីប (ICBM) ចូលទៅក្នុងមហាសមុទ្រប៉ាស៊ីហ្វិកក្នុងខែកញ្ញា ឆ្នាំ២០២៤ ដែលជាការសាកល្បងលើកដំបូង ចាប់តាំងពីឆ្នាំ១៩៨០ ។
បើទោះបីជាយ៉ាងណាក៏ដោយ ប្រទេសហត្ថលេខីបានជំរុញ ជាពិសេសដល់រដ្ឋមានអាវុធនុយក្លេអ៊ែរដែលបាញ់មីស៊ីលផ្លោងអន្តរទ្វីប(ICBM) មីស៊ីលផ្លោងបាញ់ចេញពីនាវាមុជទឹក(SLBM) និងយានអវកាស (SLV) ឱ្យចេញការជូនដំណឹងយ៉ាងហោចណាស់ ២៤ ម៉ោងជាមុន៕