ព័ត៌មានអន្តរជាតិ
វៀតណាម ចាប់ផ្តើមសាងសង់នាវាចម្បាំងទំនើបបំផុតដោយខ្លួនឯង សម្រាប់ប្រឆាំងនាវាមុជទឹក
ប្រទេសវៀតណាមបានចាប់ផ្តើមសាងសង់នាវាចម្បាំងប្រឆាំងនាវាមុជទឹកផលិតក្នុងស្រុកធំបំផុត និងទំនើបបំផុតប្រចាំប្រទេស។ នេះបើយោងតាមកាសែតយោធា Quan Doi Nhan Dan របស់វៀតណាម នៅថ្ងៃទី១១ ខែសីហានេះ។
តាមរាយការណ៍ នាវាចម្បាំងទាំងនោះកំពុងសាងសង់នៅកន្លែងផលិតនាវា Song Thu របស់ក្រសួងការពារជាតិក្នុងទីក្រុង Danang រួមទាំងអាវុធ និងឧបករណ៍យោធាជាច្រើនទៀតត្រូវបានអភិវឌ្ឍ និងផ្គុំផងដែរ ។
ប្រទេសវៀតណាម បានជាប់ពាក់ព័ន្ធក្នុងជម្លោះដែនសមុទ្រជាមួយប្រទេសចិនជាយូរមកហើយ និងកំពុងស្វេងរកការពង្រីកសមត្ថភាពផលិតផលការពារជាតិក្នុងស្រុក ខណៈកាត់បន្ថយការពឹងផ្អែកលើសម្ភារៈយោធានាំចូលពីប្រទេសរុស្ស៊ី។
យោងតាមសេចក្តីថ្លែងការណ៍របស់រដ្ឋាភិបាល គម្រោងនេះគូសបញ្ជាក់ពីគោលនយោបាយរបស់វៀតណាមក្នុងការអភិវឌ្ឍឧស្សាហកម្មការពារជាតិស្វយ័ត ពឹងផ្អែកលើខ្លួនឯង ពង្រឹង ប្រើប្រាស់បាន និងទំនើប។
មិនតែប៉ុណ្ណោះ ក្រុមហ៊ុនទូរគមនាគមន៍ និងបច្ចេកវិទ្យា Viettel គ្រប់គ្រងដោយយោធា រួមជាមួយអង្គភាពស្រាវជ្រាវ និងផលិតការពារជាតិផ្សេងទៀត នឹងធ្វើការយ៉ាងជិតស្និទ្ធជាមួយកងទ័ពជើងទឹក និងក្រុមហ៊ុនសម្ភារៈការពារជាតិ Song Thu អំឡុងពេលសាងសង់នាវា រួមទាំងការអភិវឌ្ឍ និងការដំឡើងអាវុធ និងឧបករណ៍ផងដែរ។
កងទ័ពជើងទឹកវៀតណាមបានឆ្លងកាត់ការជំរុញទំនើបកម្មដ៏សំខាន់មួយក្នុងរយៈពេលប៉ុន្មានទសវត្សរ៍កន្លងមកនេះ ជាមួយនឹងការទិញនាវាមុជទឹកថ្នាក់ Kilo និងនាវាចម្បាំងថ្នាក់ Gepard ផលិតដោយរុស្ស៊ី រួមទាំងកងនាវាទូកមីស៊ីល និងនាវាល្បាតផលិតក្នុងស្រុកកាន់តែច្រើន។
គួរបញ្ជាក់ថា វៀតណាមគ្រោងនឹងធ្វើជាម្ចាស់ផ្ទះនៃពិព័រណ៍ការពារជាតិអន្តរជាតិវៀតណាមនៅទីក្រុងហាណូយក្នុងខែធ្នូ ដែលជាព្រឹត្តិការណ៍លើកទី៣ នៃព្រឹត្តិការណ៍ពីរឆ្នាំម្តង ខណៈប្រទេសនេះកំពុងស្វែងរកការជំរុញផលិតកម្មការពារជាតិក្នុងស្រុក និងធ្វើពិពិធកម្មប្រភពឧបករណ៍យោធា៕