រដ្ឋមន្ត្រីការបរទេសម៉ាឡេស៊ី៖ មីយ៉ាន់ម៉ា មានឆន្ទៈទទួលយកវិញ​នូវ​ជនភៀសខ្លួន ៥.០០០នាក់

រដ្ឋមន្ត្រីការបរទេសម៉ាឡេស៊ី លោក Mohamad Hasan បានសរសើរថានៅថ្ងៃទី​១០ ខែសីហានេះ​ថា សហភាព​មីយ៉ាន់ម៉ាបានបង្ហាញពីឆន្ទៈ ក្នុងការទទួលយកវិញ​នូវ​ជនភៀសខ្លួនចំនួន ៥.០០០នាក់ ក្នុង​នោះ​រួមមាន​ទាំងសមាជិកមកពីក្រុមជនជាតិភាគតិចរ៉ូហ៊ីងយ៉ាផងដែរ។

លោកថា បញ្ហានេះត្រូវបានពិភាក្សា ក្នុងអំឡុងពេលមាន​កិច្ចប្រជុំថ្មីៗរបស់លោក ជាមួយរដ្ឋមន្ត្រីការបរទេសមីយ៉ាន់ម៉ា លោក Tin Maung Swe។​ នេះបើយោងតាមការចុះផ្សាយរបស់ទីភ្នាក់ងារសារព័ត៌មានរដ្ឋ Bernama។

លោកបានសង្កត់ធ្ងន់ថា «នៅពេលដែលខ្ញុំបានជួបជាមួយរដ្ឋមន្ត្រីការបរទេសថ្មីរបស់សហភាព​មីយ៉ាន់ម៉ា ពួកគេបានបង្ហាញពីការត្រៀមខ្លួន ក្នុងការនាំត្រឡប់​ទៅវិញ​នូវជនភៀសខ្លួនចំនួន ៥.០០០នាក់ តាមនាវា​។ ប៉ុន្តែបញ្ហា គឺសុវត្ថិភាពរបស់មនុស្សទាំង ៥.០០០នាក់នោះ​»។

លោកបានបន្ថែមថា បញ្ហាជនភៀសខ្លួនមកពីប្រទេសមីយ៉ាន់ម៉ា មិនគួរត្រូវបានមើលតែទស្សនៈលើ​ជនជាតិរ៉ូហ៊ីងយ៉ាតែមួយ​នោះទេ ព្រោះក្រុមជនជាតិភាគតិចដទៃទៀតមកពីប្រទេសនេះ ក៏បានក្លាយជាជនភៀសខ្លួនផងដែរ ក្នុង​នោះ​រួមទាំងសហគមន៍ Chin និង Karen។

គួរបញ្ជាក់​ថា នាយករដ្ឋមន្ត្រីម៉ាឡេស៊ី លោក Anwar Ibrahim បាននិយាយកាល​ពី​ចុងខែកក្កដាថា សហភាព​មីយ៉ាន់ម៉ាបានយល់ព្រមទទួលយកវិញនូវ​ក្រុមជនភៀសខ្លួនរ៉ូហ៊ីងយ៉ា ៥.០០០នាក់ដំបូង ដែលកំពុងរស់នៅក្នុងប្រទេសម៉ាឡេស៊ី បន្ទាប់ពីមាន​ការចរចាទ្វេភាគី៕