ឪពុករបស់កីឡាករបាល់ទាត់ Lionel Messi បានទទួលមរណភាពក្នុងអាយុ ៦៨ឆ្នាំ ដោយសារជំងឺរ៉ាំរ៉ៃ

លោក Jorge Messi ឪពុករបស់តារាបាល់ទាត់ Lionel Messi បានទទួលមរណភាពនៅយប់ថ្ងៃទី៩ ខែសីហានេះ ក្នុងជន្មាយុ ៦៨ឆ្នាំ នៅឯគ្លីនិកមួយក្នុងទីក្រុង Rosario ប្រទេសអាហ្សង់ទីន បន្ទាប់ពីមានជំងឺរ៉ាំរ៉ៃ នេះបើយោងតាមការបញ្ជាក់របស់ក្រុមគ្រួសារកីឡាករបាល់ទាត់រូបនេះ។

លោក Jorge បានចំណាយពេលប៉ុន្មានខែចុងក្រោយរបស់គាត់ ដោយប្តូរវេនគ្នារវាងមជ្ឈមណ្ឌលវេជ្ជសាស្ត្រមួយក្នុងទីក្រុង Rosario និងផ្ទះរបស់លោក ដោយមានភរិយាឈ្មោះ Celia និងកូនៗឈ្មោះ Rodrigo, Matias និង Maria Sol អមដំណើរ។

កីឡាករ Lionel Messi បានចំណាយពេលជាមួយឪពុករបស់លោកបន្ទាប់ពីព្រឹត្តិការណ៍ World Cup មុនពេលចូលរួមជាមួយក្លឹប Inter Miami ដែលលោកបានវិលត្រឡប់មកលេងវិញកាលពីមួយសប្តាហ៍មុន។

យ៉ាងណាម៉ិញ លោក Jorge បានដើរតាមកូនប្រុសរបស់លោក Lionel យ៉ាងជិតស្និទ្ធពេញមួយអាជីព ដោយចាប់ផ្តើមជាមួយនឹងឆ្នាំដំបូងនៅក្លិប Barcelona។ លោកបានដើរតួជាសសរស្តម្ភដ៏សំខាន់នៃការគាំទ្រ ហើយអស់រយៈពេលជាច្រើនឆ្នាំ លោកបានបម្រើការជាអ្នកតំណាង Lionel ។

តារាបាល់ទាត់ Lionel បាននិយាយពីមុនថា «ខ្ញុំតែងតែត្រូវការការយល់ព្រមពីឪពុករបស់ខ្ញុំ តាំងពីខ្ញុំនៅក្មេង។ បន្ទាប់ពីការប្រកួតនីមួយៗ ខ្ញុំនឹងសួរគាត់ថាគាត់គិតយ៉ាងណាចំពោះរបៀបដែលខ្ញុំលេង»។

គូសបញ្ជាក់ថា ក្នុងអំឡុងពេលព្រឹត្តិការណ៍ World Cup ប្រធានក្រុមជម្រើសជាតិអាហ្សង់ទីនបានជួបប្រទះនឹងអារម្មណ៍ចម្រុះបន្ទាប់ពីស៊ុតបញ្ចូលទីបានបីគ្រាប់ក្នុងការប្រកួតបើកឆាកទល់នឹងអាល់ហ្សេរី ដោយយំសោកពេលកំពុងអបអរគ្រាប់បាល់ដំបូងរបស់ខ្លួន។

ក្រោយមក នៅក្នុងសន្និសីទសារព័ត៌មានមួយ Lionel បានពន្យល់ថា ទឹកភ្នែករបស់លោកគឺដោយសារតែ «អ្វីមួយដែលមិនទាក់ទងនឹងបាល់ទាត់» បន្ទាប់ពីឆ្លងកាត់ «ថ្ងៃដ៏លំបាក និងស្មុគស្មាញមួយចំនួន»។

ប៉ុន្មានថ្ងៃក្រោយមក ក្រុមគ្រួសារបានចេញសេចក្តីថ្លែងការណ៍មួយទាក់ទងនឹង «ស្ថានភាពសុខភាព» របស់លោក Jorge ដោយជូនដំណឹងដល់សាធារណជនថា លោកកំពុងទទួលការព្យាបាលនៅមន្ទីពេទ្យ៕