ព័ត៌មានអន្តរជាតិ
១៤ប្រទេស ប្រកាសបង្កើតក្រុមចម្រុះការពារដែនសមុទ្រ ដើម្បីធានាសុវត្ថិភាពផ្លូវទឹកសំខាន់ៗ
ប្រទេសអារ៉ាប៊ីសាអ៊ូឌីត និងប្រទេសចំនួន១៣ផ្សេងទៀតបានប្រកាសពីការបង្កើតក្រុមចម្រុះយោធាដែនសមុទ្រដើម្បីការពារសេរីភាពនៃការធ្វើនាវាចរណ៍តាមច្រកសមុទ្រ Bab al-Mandeb សមុទ្រក្រហម និងឈូងសមុទ្រ Aden។
នៅក្នុងសេចក្តីថ្លែងការណ៍មួយ ដែលបានចេញផ្សាយកាលពីថ្ងៃទី៣១កក្កដានេះថា ក្រសួងការពារជាតិរបស់ប្រទេសអារ៉ាប៊ីសាអ៊ូឌីតបាននិយាយថា ក្រុមចម្រុះការពារដែនសមុទ្រពហុជាតិសាសន៍ត្រូវបានបង្កើតឡើងជាក្របខ័ណ្ឌមួយដើម្បីពង្រឹងកិច្ចសហប្រតិបត្តិការការពារដែនសមុទ្ររួម។
រដ្ឋនានា បានប្រកាសពីបំណងរបស់ខ្លួនក្នុងការការពារសេរីភាពនៃការធ្វើនាវាចរណ៍ ធានាសុវត្ថិភាពផ្លូវពាណិជ្ជកម្មអន្តរជាតិ និងផ្លូវផ្គត់ផ្គង់ថាមពលតាមរយៈផ្លូវទឹកទាំងបីនេះ ដែលបង្កើតជាច្រករបៀងផ្លូវសមុទ្រជាយុទ្ធសាស្ត្រភ្ជាប់មហាសមុទ្រឥណ្ឌាទៅនឹងសមុទ្រមេឌីទែរ៉ាណេ។
ចំណាត់ការនេះធ្វើឡើងខណៈជម្លោះរវាងសហរដ្ឋអាមេរិក និងអ៊ីរ៉ង់ បានផ្តោតសំខាន់លើច្រកសមុទ្រ Hormuz។ ការបិទផ្លូវ ដែលកាលពីពេលមុនមានការដឹកជញ្ជូនប្រហែល ២០ ភាគរយនៃការនាំចេញប្រេង និងឧស្ម័នសកល កំពុងដាក់បន្ទុកយ៉ាងខ្លាំងទៅលើសេដ្ឋកិច្ចពិភពលោក។
នៅក្នុងការរីកធំជម្លោះថ្មីៗនេះ ច្រកសមុទ្រ Bab el-Mandeb សមុទ្រក្រហម និងឈូងសមុទ្រ Aden បានរងការវាយប្រហារម្តងហើយម្តងទៀតពីក្រុមឧទ្ទាមហ៊ូទីគាំទ្រដោយអ៊ីរ៉ង់ នៅក្នុងប្រទេសយេម៉ែន៕