ប្រធានាធិបតីអ៊ុយក្រែន មានបំណងចាប់ផ្តើមផលិតមីស៊ីលស្ទាក់ចាប់ដែលមានអាជ្ញាប័ណ្ណ

ប្រធានាធិបតីអ៊ុយក្រែន លោក Volodymyr Zelenskyy ថ្មីៗនេះបានជួបជាមួយប្រធានាធិបតីសហរដ្ឋអាមេរិក លោក Donald Trump និងមន្ត្រីមកពីក្រុមហ៊ុនខ្នាតយក្សផលិតយុទ្ធោបករណ៍ការពារជាតិរបស់អាមេរិក។

លោក Zelenskyy បានបង្ហាញក្តីសង្ឃឹមសម្រាប់ការចាប់ផ្តើមផលិតមីស៊ីលស្ទាក់ចាប់ដែលមានអាជ្ញាប័ណ្ណនៅប្រទេសអ៊ុយក្រែនឱ្យបានឆាប់។
លោក Zelenskyy ដែលបានជួបពិភាក្សាជាមួយលោក Trump នៅសេតវិមានកាលពីថ្ងៃទី២៨ ខែកក្កដានេះ ដោយបាននិយាយនៅក្នុងសារបង្ហោះលើបណ្តាញផ្សព្វផ្សាយសង្គមថា មេដឹកនាំទាំងពីរបានពិភាក្សាអំពីការផ្តល់អាជ្ញាប័ណ្ណផលិតមីស៊ីលស្ទាក់ចាប់ដែលប្រើប្រាស់ក្នុងប្រព័ន្ធការពារដែនអាកាសប៉ាទ្រីយ៉ូត(Patriot) ផលិតនៅសហរដ្ឋអាមេរិក ព្រមទាំងការគាំទ្រដល់អ៊ុយក្រែន ក្នុងចំណោមបញ្ហាផ្សេងៗទៀត។
ប្រធានាធិបតីអ៊ុយក្រែនក៏បានជួបជាមួយមន្ត្រីជាន់ខ្ពស់មកពីក្រុមហ៊ុន Lockheed Martin ដែលផលិតមីស៊ីលផងដែរ។ លោកបាននិយាយថា ជំនួបនោះបានពិភាក្សាអំពីការពង្រឹងកិច្ចសហប្រតិបត្តិការ។ លោក Zelenskyy ក៏បាននិយាយផងដែរថា «ក្រុមការងាររបស់យើង កំពុងធ្វើការលើដំណោះស្រាយជាក់លាក់រួចហើយ ដើម្បីឈានទៅរកការសហការផលិតឱ្យបានឆាប់តាមដែលអាចធ្វើទៅបាន និងបង្កើនសមត្ថភាពរបស់យើងក្នុងការការពារជីវិត»។
អ៊ុយក្រែនកំពុងប្រឈមនឹងកង្វះមីស៊ីលស្ទាក់ចាប់យ៉ាងខ្លាំងក្នុងការឆ្លើយតបទៅនឹងការវាយប្រហារដោយមីស៊ីលបាលីស្ទីករបស់រុស្ស៊ី។ លោក Trump បានបង្ហាញថា ប្រទេសរបស់លោកនឹងអនុញ្ញាតឱ្យអ៊ុយក្រែនផលិតមីស៊ីលស្ទាក់ចាប់។ ប៉ុន្តែអ្នកជំនាញម្នាក់និយាយថា វានឹងចំណាយពេលប្រហែលពីរឆ្នាំដើម្បីចាប់ផ្តើមការផលិត ទោះបីជាអ៊ុយក្រែនទទួលបានអាជ្ញាប័ណ្ណក៏ដោយ៕