ព័ត៌មានអន្តរជាតិ
កេនយ៉ាស៊ើបអង្កេតជាតិពុលដ៏មានសក្តានុពល ក្រោយដំរី ១៥ក្បាលងាប់នៅតំបន់ប្រព័ន្ធអេកូឡូស៊ី Amboseli
ដំរី ១៥ក្បាល បានងាប់នៅតំបន់ប្រព័ន្ធអេកូឡូស៊ី Amboseli របស់កេនយ៉ាចាប់ពីថ្ងៃទី ២៤ ខែមិថុនា ដល់ថ្ងៃទី ២៤ ខែកក្កដា ហើយការធ្វើតេស្តដំបូងរកឃើញសារធាតុពុលដ៏មានសក្តានុពលនៅក្នុងសំណាករបស់សត្វដំរីជាច្រើនក្បាល ។ នេះបើយោងតាមការអះអាងនៅក្នុងសេចក្តីថ្លែងការណ៍របស់សេវាកម្មសត្វព្រៃកេនយ៉ា(KWS) បានឲ្យដឹងកាលពីថ្ងៃទី២៨ ខែកក្កដានេះ។
តំបន់ប្រព័ន្ធអេកូឡូស៊ី Amboseli រួមមានទាំងឧទ្យានជាតិ និងហ៊ុមព័ទ្ធដោយដីសហគមន៍នៅតំបន់ភាគខាងត្បូងកេនយ៉ាង ស្ថិតនៅជិតព្រំដែនប្រទេសតង់ហ្សានី ផ្តល់ជាទីជម្រក និងផ្លូវធ្វើដណើររបស់សត្វដំរី ហើយនិងសត្វព្រៃផ្សេងទៀតនៅក្រោមតំបន់ភ្នំ Kilimanjaro ។
សេវាកម្ម KWS និយាយថា សត្វដំរី ១០ក្បាល បង្ហាញរោគសញ្ញាស្រដៀងគ្នាដែលធ្វើឲ្យពួកវាមិនអាចក្រោកឈរបាន មុនពេលវាងាប់ក្នុងរយៈពេល ១ថ្ងៃ ឬ ២ថ្ងៃ ។
សត្វដំរីងាប់ទាំងអស់នេះដែរ ត្រូវបានរកឃើញនៅឧទ្យានជាតិ Amboseli តំបន់ទីជម្រកសត្វព្រៃ Kimana និងតំបន់វាលស្មៅ Kuku ៕