រដ្ឋាភិបាលយេម៉ែន ចោទក្រុមហ៊ូទីថារៀបចំផែនការយកថ្លៃសេវាសម្រាប់ការឆ្លងកាត់សមុទ្រក្រហម

រដ្ឋមន្ត្រីម្នាក់នៅក្នុងរដ្ឋាភិបាលយេម៉ែន បានឱ្យដឹងកាលពីថ្ងៃពុធ ទី២៩ ខែកក្កដាថា ក្រុមឧទ្ទាមហ៊ូទីកំពុងធ្វើការជាមួយប្រទេសអ៊ីរ៉ង់ដើម្បីយកថ្លៃសេវាសម្រាប់នាវាឆ្លងកាត់សមុទ្រក្រហម ជាការគំរាមដល់ផ្លូវទឹកមួយផ្សេងទៀតបន្ទាប់ពីការបិទច្រកសមុទ្រ Hormuz របស់ទីក្រុងតេអេរ៉ង់។

ផ្លូវសមុទ្រតូចចង្អៀតនៅសមុទ្រក្រហម គឺជាផ្លូវទឹកសំខាន់មួយសម្រាប់ការដឹកជញ្ជូនប្រេងឆៅរបស់ប្រទេសអារ៉ាប៊ីសាអ៊ូឌីតទៅកាន់ទីផ្សារអន្តរជាតិបន្ទាប់ពីការវាយប្រហារនិងការគំរាមកំហែងរបស់អ៊ីរ៉ង់ដែលបានរារាំងការនាំចេញថាមពលរបស់រដ្ឋឈូងសមុទ្រតាមរយៈច្រកសមុទ្រ Hormuz ។
រដ្ឋមន្ត្រីក្រសួងព័ត៌មានលោក Moammar al-Eryani បានប្រាប់សារព័ត៌មាន AFP ថា ចំណាត់ការនេះគឺជា «ការកើនឡើងដ៏គ្រោះថ្នាក់ក្នុងបំណងផ្លាស់ប្តូរច្រករបៀងសមុទ្រជាយុទ្ធសាស្ត្របំផុតមួយរបស់ពិភពលោកទៅជាប្រភពមូលនិធិអចិន្ត្រៃយ៍សម្រាប់សកម្មភាពយោធា និងភេរវកម្មរបស់កងជីវពល»។
លោក Eryani បាននិយាយថា ការវាយតម្លៃ ត្រូវបានផ្តល់ដោយ «ព័ត៌មានចារកម្មត្រូវបានបញ្ជាក់» ខណៈទើបទទួលបាននាពេលថ្មីៗនេះ ដែលបង្ហាញថាឆ្មាំបដិវត្តន៍អ៊ីរ៉ង់កំពុងជួយរៀបចំកិច្ចខិតខំប្រឹងប្រែងនេះ។ «ព័ត៌មានចារកម្មបង្ហាញថា អ្នកជំនាញនិងទីប្រឹក្សារបស់កងឆ្មាំបដិវត្តអ៊ីស្លាមអ៊ីរ៉ង់(IRGC) បានចូលរួមដោយផ្ទាល់ក្នុងការរៀបចំក្របខ័ណ្ឌបច្ចេកទេស និងគ្រប់គ្រងគម្រោង»៕