ក្រុមឧទ្ទាមហ៊ូធីប្រកាសបិទផ្លូវកងទ័ពជើងទឹកអារ៉ាប៊ីសាអូឌីត ដោយគំរាមបង្កើតរណសិរ្សថ្មីនៅក្នុងសង្គ្រាមអាម៉េរិក-អ៊ីរ៉ង់

ក្រុមហ៊ូធីដែលមានសម្ព័ន្ធភាពជាមួយអ៊ីរ៉ង់នៅប្រទេសយេម៉ែនបានប្រកាសថា ពួកគេនឹងបិទផ្លូវកងទ័ពជើងទឹកលើប្រទេសអារ៉ាប៊ីសាអូឌីត ដោយបើករណសិរ្សថ្មីដ៏មានសក្តានុពលប្រឆាំងនឹងសហរដ្ឋអាម៉េរិកនៅក្នុងសង្គ្រាមជាមួយអ៊ីរ៉ង់ និងបង្កើនការគំរាមកំហែងដល់ការផ្គត់ផ្គង់ថាមពលសកល និងពាណិជ្ជកម្មហួសពីឈូងសមុទ្រ។

តាមការផ្សាយរបស់រ៉យទ័របានឱ្យដឹងនៅថ្ងៃទី២១ ខែកក្កដានេះថា ការកើនឡើងនេះកើតឡើងបន្ទាប់ពីរយៈពេលដ៏សាហាវបំផុតមួយនៅក្នុងសង្គ្រាមសម្រាប់កងទ័ពអាម៉េរិក។ មន្ទីរបញ្ចកោណកាលពីថ្ងៃចន្ទបានកំណត់អត្តសញ្ញាណទាហានអាម៉េរិកពីរនាក់ដែលត្រូវបានសម្លាប់នៅពេលដែលអ៊ីរ៉ង់វាយប្រហារមូលដ្ឋានអាម៉េរិកមួយនៅហ្ស៊កដានីកាលពីថ្ងៃសុក្រ។

បន្ទាប់ពីក្រុមហ៊ូធីបានប្រកាសពីការបិទផ្លូវរបស់ពួកគេ ក្រុមចម្រុះដឹកនាំដោយអារ៉ាប៊ីសាអូឌីតនៅយេម៉ែនបានឆ្លើយតបភ្លាមៗថា ខ្លួននឹងឆ្លើយតបទៅនឹងពួកគេដោយកម្លាំង ហើយក៏បានចាប់ផ្តើមអនុវត្តវិធានការការពារសម្រាប់កប៉ាល់របស់ខ្លួនដែលធ្វើដំណើរឆ្លងកាត់ច្រកសមុទ្របាបអែលម៉ាន់ដេប ដែលជាផ្លូវនាំចេញដ៏សំខាន់សម្រាប់ប្រេងរបស់អារ៉ាប៊ីសាអូឌីត។

យ៉ាងណាម៉ិញ តម្លៃប្រេងបានកើនឡើងមួយរយៈខ្លីបន្ទាប់ពីសេចក្តីថ្លែងការណ៍របស់ក្រុមហ៊ូធី ប៉ុន្តែក្រោយមកបានធ្លាក់ចុះវិញ ខណៈដែលពាណិជ្ជករមានក្តីសង្ឃឹមចំពោះ ផ្នែកការទូតដើម្បីបញ្ចប់ជម្លោះ។ ប៉ុន្តែថ្លៃធានារ៉ាប់រងនៃការដឹកជញ្ជូនទំនិញឆ្លងកាត់សមុទ្រក្រហមបានកើនឡើងវិញ ដោយសារតែហានិភ័យកើនឡើងសម្រាប់ការដឹកជញ្ជូនទំនិញ។

គូសបញ្ជាក់ថា អ៊ីរ៉ង់បានជំរុញឱ្យក្រុមហ៊ូធីបិទច្រកទ្វារបាបអែលម៉ាន់ដេបទៅកាន់សមុទ្រក្រហម ប្រសិនបើសហរដ្ឋអាម៉េរិកបន្តវាយប្រហារហេដ្ឋារចនាសម្ព័ន្ធថាមពលរបស់អ៊ីរ៉ង់។ ការបិទច្រកសមុទ្រទាំងស្រុងនឹងកាត់បន្ថយការផ្គត់ផ្គង់ប្រេងសកលចំនួន ៧% ព្រោះវានឹងធ្វើឱ្យការនាំចេញប្រេងរបស់អារ៉ាប៊ីសាអូឌីតមិនអាចចាកចេញពីតំបន់នេះបាន៕