អ៊ីរ៉ង់ពង្រីកការវាយប្រហារលើរដ្ឋឈូងសមុទ្រ និងបិទច្រកសមុទ្រហ័រមូសទាំងស្រុង

កងកម្លាំងសហរដ្ឋអាម៉េរិក និងអ៊ីរ៉ង់បានវាយប្រហារគ្នាដោយមីស៊ីល និងយន្តហោះគ្មានមនុស្សបើកយ៉ាងធ្ងន់ធ្ងរ ដោយទីក្រុងតេអេរ៉ង់បានកំណត់គោលដៅលើទីតាំងរបស់សហរដ្ឋអាម៉េរិកនៅក្នុងរដ្ឋនានាទូទាំងឈូងសមុទ្រនៅថ្ងៃអាទិត្យ និងប្រកាសថាខ្លួនបានបិទច្រកសមុទ្រហ័រមូសដ៏សំខាន់ម្តងទៀត។ អំពើហិង្សាដែលបានកើតឡើងជាថ្មីនេះបានបង្កើតការសង្ស័យបន្ថែមទៀតលើអនាគតនៃកិច្ចព្រមព្រៀងបណ្តោះអាសន្នរវាងសហរដ្ឋអាម៉េរិក និងអ៊ីរ៉ង់ដែលបានចុះហត្ថលេខាកាលពីខែមុន ដែលមានគោលបំណងបើកច្រកសមុទ្រឡើងវិញ និងបញ្ចប់សង្គ្រាមបន្ទាប់ពីការចរចារយៈពេល ៦០ ថ្ងៃបន្ថែមទៀត។

បើតាមការផ្សាយរបស់រ៉យទ័រនៅថ្ងៃទី១៣ ខែកក្កដានេះបានឱ្យដឹងថា ការវាយប្រហារទាំងនេះគឺជាការវាយប្រហារចុងក្រោយបំផុតនៅក្នុងវដ្តនៃការវាយប្រហារ និងការតបតវិញ ខណៈដែលអ៊ីរ៉ង់កំពុងព្យាយាមអះអាងការគ្រប់គ្រងលើការដឹកជញ្ជូនឆ្លងកាត់ច្រកសមុទ្រ Hormuz។

ការវាយប្រហាររបស់អ៊ីរ៉ង់បានពង្រីកដល់ប្រទេសកាតា និងអារ៉ាប់រួម ដែលជាអ្នកសម្របសម្រួលក្នុងការចរចាបទឈប់បាញ់ ដែលមិនត្រូវបានវាយប្រហារចាប់តាំងពីខែមេសា។

កាលពីយប់ម៉ិញនេះ យោធាសហរដ្ឋអាម៉េរិកបានចាប់ផ្តើមវាយប្រហារបន្ថែមទៀតប្រឆាំងនឹងអ៊ីរ៉ង់ ដើម្បីបន្តធ្វើឱ្យខូចសមត្ថភាពរបស់ពួកគេក្នុងការវាយប្រហារនាវិកស៊ីវិល និងនាវាពាណិជ្ជកម្មដែលឆ្លងកាត់ដោយសេរីនៅច្រកសមុទ្រ Hormuz។

សង្គ្រាមដែលសហរដ្ឋអាម៉េរិក និងអ៊ីស្រាអែលបានចាប់ផ្តើមប្រឆាំងនឹងអ៊ីរ៉ង់នៅថ្ងៃទី ២៨ ខែកុម្ភៈ បានធ្វើឱ្យតំបន់ឈូងសមុទ្រមានអស្ថិរភាព ជាកន្លែងដែលអ៊ីរ៉ង់បានវាយប្រហារប្រទេសដែលមានមូលដ្ឋានទ័ពសហរដ្ឋអាម៉េរិក។ ការបិទច្រកសមុទ្រដ៏មានប្រសិទ្ធភាពរបស់ប្រទេសអ៊ីរ៉ង់បានជំរុញឱ្យតម្លៃថាមពលកើនឡើង និងជំរុញឱ្យមានអតិផរណាសកល៕