កូរ៉េខាងត្បូង នឹងបណ្តុះបណ្តាល «អ្នកចម្បាំងដ្រូន» ចំនួន ៥០០,០០០ នាក់ដើម្បីទប់ទល់នឹងកូរ៉េខាងជើង

(សេអ៊ូល)៖ ក្រសួងការពារជាតិកូរ៉េខាងត្បូង បានប្រកាសថានឹងពង្រីកសមត្ថភាពយន្តហោះគ្មានមនុស្សបើករបស់ខ្លួនយ៉ាងឆាប់រហ័ស ដើម្បីទប់ទល់នឹងកូរ៉េខាងជើង រួមទាំងការបណ្តុះបណ្តាល «អ្នកចម្បាំងយន្តហោះគ្មានមនុស្សបើក» ចំនួន ៥០០,០០០ នាក់ និងពង្រាយប្រព័ន្ធការពារយន្តហោះគ្មានមនុស្សបើករាប់ម៉ឺនគ្រឿងនៅទូទាំងអង្គភាពជួរមុខ។

យោងតាមអង្គភាពរ៉យទ័រ ផ្សាយនៅថ្ងៃទី២៦ ខែមិថុនានេះថា យោធាក៏មានគម្រោងផលិតយន្តហោះគ្មានមនុស្សបើកចំនួន ១១០,០០០ គ្រឿងនៅឆ្នាំ ២០២៩ សម្រាប់ដាក់ពង្រាយនៅទូទាំងកងទ័ពជើងគោក កងទ័ពជើងទឹក កងទ័ពអាកាស និងកងម៉ារីន ដោយមានគោលបំណងធ្វើឱ្យយន្តហោះគ្មានមនុស្សបើកក្លាយជារបស់របរស្តង់ដារសម្រាប់ទាហានម្នាក់ៗ។

រដ្ឋមន្ត្រីក្រសួងការពារជាតិ លោក Ahn Gyu-back បានលើកឡើងថា «យន្តហោះគ្មានមនុស្សបើកលែងជាឧបករណ៍ដែលប្រើប្រាស់ដោយអង្គភាពមួយចំនួនមានកំណត់ទៀតហើយ ប៉ុន្តែជាឧបករណ៍ប្រយុទ្ធជាសកល» ដោយបន្ថែមថា យន្តហោះទាំងនោះគួរតែត្រូវបានប្រើប្រាស់ដោយកងទ័ពដូចជា «អាវុធផ្ទាល់ខ្លួនទីពីរ»។

លើសពីនោះ ទីក្រុងសេអ៊ូលនឹងពឹងផ្អែកលើគ្រឿងបន្លាស់ដែលផលិតក្នុងស្រុក ១០០% ជាជាងគ្រឿងបន្លាស់របស់ប្រទេសចិនក្នុងការសាងសង់ប្រព័ន្ធនានា ដើម្បីឆ្លើយតបទៅនឹងការព្រួយបារម្ភអំពីសន្តិសុខជាតិ។

ការប្រកាសនេះកើតឡើងនៅពេលដែលកូរ៉េទាំងពីរបង្កើនល្បឿនកសាងសមត្ថភាពយន្តហោះគ្មានមនុស្សបើក ដែលបង្កើតឡើងដោយមេរៀនពីជម្លោះនៅអ៊ុយក្រែន និងមជ្ឈិមបូព៌ា ជាកន្លែងដែលប្រព័ន្ធគ្មានមនុស្សបើកបានលេចចេញជាកត្តាផ្លាស់ប្តូរហ្គេមនៅលើសមរភូមិ៕