លោក Trump អរគុណលោក Xi និងលោក Putin ដែល «អព្យាក្រឹត» ក្នុងសង្គ្រាមអ៊ីរ៉ង់

ប្រធានាធិបតីអាម៉េរិក ដូណាល់ ត្រាំ បានលើកឡើងអំពីប្រធានាធិបតីចិន ស៊ី ជីនពីង និងប្រធានាធិបតីរុស្ស៊ី វ្ល៉ាឌីមៀរ ពូទីន ថា «អព្យាក្រឹត» ក្នុងអំឡុងពេលសង្គ្រាមជាមួយអ៊ីរ៉ង់ ដោយលើកឡើងថា ពួកគេមិនបានរារាំងកិច្ចខិតខំប្រឹងប្រែងរបស់លោកក្នុងការទប់ស្កាត់មហិច្ឆតានុយក្លេអ៊ែររបស់ទីក្រុងតេអេរ៉ង់នោះទេ។ នេះបើយោងតាមការផ្សាយរបស់រ៉យទ័រថ្ងៃទី១៧ ខែមិថុនានេះ។

លោក ត្រាំ បានបញ្ជាក់បន្ទាប់ពីការអនុម័តកិច្ចព្រមព្រៀងឈប់បាញ់ក្នុងជម្លោះថា «ខ្ញុំគ្រាន់តែចង់អរគុណពួកគេ ពីព្រោះពួកគេបានធ្វើឱ្យវាកាន់តែប្រសើរឡើងច្រើន»។

លោកបន្ថែមថា «ខ្ញុំចង់ថ្លែងអំណរគុណដល់ប្រទេសចិន ប្រធានាធិបតី ស៊ី។ ខ្ញុំនៅជាមួយលោក ហើយលោកនៅតែអព្យាក្រឹត អព្យាក្រឹតទាំងស្រុង ហើយខ្ញុំពេញចិត្តវា ហើយខ្ញុំចង់ថ្លែងអំណរគុណដល់លោក Vladimir Putin លោកមានអព្យាក្រឹតខ្លាំងណាស់ ពួកគេអាចធ្វើឱ្យវាកាន់តែពិបាកសម្រាប់យើង»។

យ៉ាងណាម៉ិញ ការអត្ថាធិប្បាយរបស់លោក ត្រាំ គឺផ្ទុយពីការអត្ថាធិប្បាយរបស់លោកជាមួយសម្ព័ន្ធមិត្តអាម៉េរិកចាប់ពីប្រទេសជប៉ុនរហូតដល់អឺរ៉ុប ដែលលោកបានរិះគន់ចំពោះការមិនជួយក្នុងប្រតិបត្តិការយោធា ឬកិច្ចខិតខំប្រឹងប្រែងជាបន្តបន្ទាប់ដើម្បីសម្អាតច្រកសមុទ្រ Hormuz ដែលជាផ្លូវពាណិជ្ជកម្មផ្លូវសមុទ្រដែលអ៊ីរ៉ង់រារាំង។

ទីក្រុងមូស្គូ និងទីក្រុងប៉េកាំងរក្សាទំនាក់ទំនងជិតស្និទ្ធជាមួយទីក្រុងតេអេរ៉ង់។ ទន្ទឹមគ្នានេះ ប្រទេសរុស្ស៊ីថា សង្គ្រាមនេះអាចនាំឱ្យមានការប្រណាំងប្រជែងសព្វាវុធនុយក្លេអ៊ែរនៅមជ្ឈិមបូព៌ា។

ដោយឡែក ទីក្រុងប៉េកាំងបានថ្កោលទោសការវាយប្រហាររបស់ទីក្រុងវ៉ាស៊ីនតោនទៅលើទីក្រុងតេអេរ៉ង់ថាជាការរំលោភបំពានយ៉ាងឃោរឃៅលើអធិបតេយ្យភាពរបស់ប្រទេស។

ពេលកន្លងទៅថ្មីៗនេះ មន្ត្រីស៊ើបការណ៍សម្ងាត់អាម៉េរិកថា ទីក្រុងប៉េកាំងបានផ្គត់ផ្គង់ទំនិញដល់ទីក្រុងតេអេរ៉ង់ដែលមានសក្តានុពលសម្រាប់ការប្រើប្រាស់យោធា។ រោងចក្រចម្រាញ់ប្រេងឯករាជ្យរបស់ប្រទេសចិនគឺជាអតិថិជនសំខាន់របស់អ៊ីរ៉ង់ក្នុងអំឡុងពេលជម្លោះ ដោយប្រឆាំងនឹងទណ្ឌកម្មរបស់សហរដ្ឋអាម៉េរិក។

ប៉ុន្តែលោក ត្រាំ បាននិយាយថា លោក ស៊ី បានជួយដោះស្រាយជម្លោះ ហើយបានជៀសវាងការបញ្ជូន «អាវុធធំៗ» ឬមីស៊ីលបាញ់ពីលើអាកាស៕